ନୂଆଦିଲ୍ଲୀ,୧୯।୧୨: ସଂସଦରେ ଭାଜପା ଏବଂ କଂଗ୍ରେସ ମଧ୍ୟରେ ଗୁରୁବାର ହୋଇଥିବା ମୁହାଁମୁହିଁ ସ୍ଥିତିକୁ ନେଇ ରାଜନୀତି ସରଗରମ ରହିଛି। ଘଟଣାକୁ ନେଇ ଉଭୟ ଦଳର ପ୍ରତିନିଧି ପାର୍ଲାମେଣ୍ଟ ଷ୍ଟ୍ରିଟ୍ ଥାନାରେ ପହଞ୍ଚିଛନ୍ତି। ପ୍ରଥମେ ଭାଜପା ଏମ୍ପି ଅନୁରାଗ ଠାକୁର, ବନସୁରୀ ସ୍ବରାଜ ଏବଂ ହେମାଙ୍ଗ ଜୋଶୀ ପ୍ରମୁଖ ଅପରାହ୍ନ ୧.୩୦ରେ ଥାନାରେ ପହଞ୍ଚିଥିଲେ। ସେମାନେ ଥାନା ପରିସରରେ ଥିବା ନୂଆଦିଲ୍ଲୀ ଜିଲାର ଡିଏସ୍ପି ଦେବେଶ ମହଲାଙ୍କ ଅଫିସରେ ପହଞ୍ଚି ଅଭିଯୋଗ କରିଥିଲେ। ଏଥିରେ ସିଧାସଳଖ ଭାବେ ରାହୁଲଙ୍କ ଉପରେ ଅଭିଯୋଗ ଲଗାଯାଇଥିଲା।
ଅଭିଯୋଗ କପରେ ଅନୁରାଗ ଠାକୁର କହିଛନ୍ତି, ରାହୁଲଙ୍କ ବିରୋଧରେ ଅଭିଯୋଗ କରିଛୁ। ଆଜି ସଂସଦରେ ଯାହା ସବୁ ଘଟିଛି ପୋଲିସକୁ ସମସ୍ତ ବିଷୟ ଜଣାଯାଇଛି। ରାହୁଲଙ୍କ ଯେଉଁଭଳି ବ୍ୟବହାର ତାକୁ ଦେଖିଲେ ଲାଗୁଛି ସେ ଆଇନରୁ ଉପରେ ବୋଲି ଭାବୁଛନ୍ତି, ଗାନ୍ଧି ପରିବାର ନିଜକୁ ଆଇନର ଊର୍ଦ୍ଧ୍ୱରେ ବୋଲି ବିବେଚନା କରିଥାଏ। ସେ ନାଗାଲାଣ୍ଡର ମହିଳା ଏମ୍ପିଙ୍କୁ ବହୁତ ଅହଙ୍କାର ସହ ଅସଦାଚରଣ କରିଛନ୍ତି। ଆକ୍ରମଣ କରିବା ଏବଂ ଉକୁସାଇବା କାମ ରାହୁଲଙ୍କ କାମ। ତେବେ ଅନୁରାଗ ଠାକୁର କହିଛନ୍ତି ଯେ ନିଜର ଅଭିଯୋଗରେ ବିଏନ୍ଏସ୍ର ଧାରା ୧୦୯,୧୧୫,୧୨୫, ୧୩୧ ଏବଂ ୩୫୧ ଅଧୀନରେ ଦିଆଯାଇଛି।
ଆସନ୍ତୁ ଜାଣିବା ଏସବୁ ଧାରାରେ କେଉଁ ଅଭିଯୋଗ ଲଗାଯାଇଛି।
-ଧାରା ୧୦୯-ହତ୍ୟାର ପ୍ରୟାସ
-ଧାରା ୧୧୫- ନିଜ ଇଚ୍ଛାରେ ଆଘାତ ପହଞ୍ଚାଇବା
-ଧାରା ୧୧୭- ନିଜ ଇଚ୍ଛାରେ ଗଭୀର ଆଘାତ ଦେବା
-ଧାରା ୧୨୫- ଅନ୍ୟର ଜୀବନ ନଚେତ ବ୍ୟକ୍ତିଗତ ସୁରକ୍ଷାକୁ ବିପଦରେ ପକାଇବା କାର୍ଯ୍ୟ
-ଧାରା ୧୩୧-ଅପରାଧିକ ଶକ୍ତିର ପ୍ରୟୋଗ
-ଧାରା ୩୫୧- ଅପରାଧିକ ଧମକ
-ଧାରା ୩)(୫)- ଭାରତୀୟ ନ୍ୟାୟ ସଂହିତାର ସାମାନ୍ୟ ଇଚ୍ଛା
ଅପରପକ୍ଷେ କଂଗ୍ରେସ ଭାଜପା ବିରୋଧରେ ପାର୍ଲାମେଣ୍ଟ ଏସ୍ପି ଅଜୟ କୁମାରଙ୍କୁ ଲିଖିତ ଅଭିଯୋଗ ଦେଇଥିଲେ। ଦଳ ନିଜର ଅଭିଯୋଗରେ ଭାଜପା ଏମ୍ପିଙ୍କ ଉପରେ ଜାଣିଶୁଣୀ ରାସ୍ତା ରୋକିବା ଏବଂ ଠେଲାପେଲା କରିବା ଅଭିଯୋଗ ଲଗାଇଛି। କଂଗ୍ରେସ ଅଭିଯୋଗରେ କହିଛି ଯେ ‘ଭାଜପାର ଏହା ଷଡ଼ଯନ୍ତ୍ର। ଆମେ ବିରୋଧ କରିବା ଲାଗି ଆମ୍ବେଦକରଙ୍କ ପ୍ରତିମୂର୍ତ୍ତୀଠାରୁ ମକର ଦ୍ୱାର ଯାଏ ଶାନ୍ତିପୂର୍ବକ ଯାତ୍ରା କରିବାକୁ ଚାହୁଁଥିଲୁ। ହେଲେ ତାହା କରାଇ ଦିଆଯାଇନାହିଁ।ଭାଜପା ଏମ୍ପିଙ୍କ ହାତରେ ଲାଠି କେଉଁ କାରଣରୁ ଥିଲା? ଏହା ବଡ଼ ଷଡ଼ଯନ୍ତ୍ର। ଖଡ୍ଗେଙ୍କୁ ଜାଣିଶୁଣି ଧକ୍କା ଦେଇ ତଳେ ପକାଇ ଦିଆଯାଇଥିଲା। ତାଙ୍କ ଆଣ୍ଠୁରେ ଆଘାତ ଲାଗିଛି। ତାଙ୍କ ଉପରେ ହୋଇଥିବା ଆକ୍ରମଣକୁ ନେଇ ଏସ୍ସି/ଏସ୍ସି ଆକ୍ଟ ମଧ୍ୟ ଲଗାଯିବା ଉଚିତ।’
