ପାଳଲହଡ଼ା,୩୧।୮(ଦିବ୍ୟଜ୍ୟୋତି ଦାଶ): ଅନୁଗୋଳ ଜିଲା ପାଳଲହଡ଼ା ସାନବାଗଦରୀ ଗାଁରେ ସ୍କ୍ରବ ଟାଇଫସ୍(Scrub Typhus) ବ୍ୟାପିବା ଖବର ପ୍ରସାରଣ ପରେ ସ୍ବାସ୍ଥ୍ୟ ବିଭାଗର ଏକ ଡାକ୍ତରୀ ଟିମ୍ ଗାଁରେ ପହଞ୍ଚିଛି। ଡାକ୍ତରୀ ଟିମ୍ ଘରକୁ ଘର ବୁଲି ରୋଗୀଙ୍କ ରକ୍ତ ନମୁନା ସଂଗ୍ରହ କରିବା ସହ ସନ୍ଦିଗ୍ଧ ରୋଗୀଙ୍କ ପରୀକ୍ଷା ଓ ଚିକିତ୍ସା ସେବା ଆରମ୍ଭ ହୋଇଛି। ଦୁଇଦିନ ଭିତରେ ଗାଁରେ ୨୯ଜଣ ସ୍କ୍ରବ ଟାଇଫସ ପଜିଟିଭ ଚିହ୍ନଟ ହେବା ଚିନ୍ତାର ବିଷୟ ହୋଇଛି।
ଅନୁଗୋଳ ଜିଲା ପାଳଲହଡା ବ୍ଲକ ପବିତ୍ରପୁର ପଞ୍ଚାୟତ ସାନବାଗଦରୀ ଗାଁରେ ସ୍କ୍ରବ ଟାଇଫସ୍ରେ ଜଣଙ୍କର ମୃତ୍ୟୁପରେ ଗାଁରେ ଭୟର ବାତାବରଣ ସୃଷ୍ଟି ହୋଇଛି। ଅନେକ ଲୋକ ଜ୍ୱର, ମୁଣ୍ଡବ୍ୟଥା ଓ ଦେହ ହାତଗୋଡ଼ ଘୋଳାବିନ୍ଧା ଭଳି ଲକ୍ଷଣ ଅନୁଭବ କରୁଥିବା ଜଣାପଡ଼ିଛି। ଗାଁରେ ଏଭଳି ସ୍ଥିତି ନେଇ ଲୋକେ ଆତଙ୍କିତ ହୋଇପଡିଛନ୍ତି।
ଅନ୍ୟପକ୍ଷେ ଗଣମାଧ୍ୟମରେ ଖବର ପ୍ରସାରଣ ପରେ ପ୍ରଶାସନ ତତ୍ପର ହୋଇପଡିଛି। ଜିଲାରୁ ଏକ ଡାକ୍ତରୀ ଟିମ ଦୁଇ ଦିନ ହେବ ଗାଁରେ ଘରକୁ ଘର ଯାଇ ରକ୍ତ ନମୁନା ସଂଗ୍ରହ କରୁଛି।
ବର୍ତ୍ତମାନ ସୁଦ୍ଧା ଦୁଇ ଦିନରୁ ପ୍ରଥମ ଦିନରେ ୬୦ଜଣକ ରକ୍ତ ନମୁନାରୁ ୭ ଜଣ ପଜିଟିଭ ଥିବା ବେଳେ ରବିବାର ୧୨୦ ଜଣକଙ୍କ ମଧ୍ୟରୁ ୨୨ଜଣ ପଜିଟିଭ ଥିବା ଜଣାପଡ଼ିଛି।
ଏ ନେଇ ଜିଲା ମୁଖ୍ୟ ସ୍ବାସ୍ଥ୍ୟ ଅଧିକାରୀ ମଦନ ମୋହନ ପ୍ରଧାନଙ୍କ କହିବା ଅନୁଯାୟୀ ସଚେତନଟା ଓ ଟେଷ୍ଟ ପାଇଁ ପ୍ରଶାସନ ପକ୍ଷରୁ ସମ୍ପୂର୍ଣ ବ୍ୟବସ୍ଥା ଗ୍ରହଣ କରାଯାଇଛି। ଯେଉଁମାନଙ୍କୁ ଜ୍ୱର ହୋଇଛି ସେମାନକୁ ପ୍ରଥମିକତା ଦେଇ ଟେଷ୍ଟ ଜାରି ରହିଛି ଓ ଯାହା ବ୍ୟବସ୍ଥା ଗ୍ରହଣ କରାଯିବା ଦରକାର କରାଯାଉଛି।
ସୋମବାର ୩୩ଜଣଙ୍କର ରକ୍ତ ନମୁନା ପରୀକ୍ଷା କରାଯାଇଥିବବେଳେ ସମସ୍ତ ରିପୋର୍ଟ ନେଗେଟିଭ ଥିବା ଜଣାପଡିଛି I ତେବେ ୩ଦିନ ମଧ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୨୯କୁ ବୃଦ୍ଧି ପାଇଛି I
ସ୍ବାସ୍ଥ୍ୟ ବିଭାଗ ପକ୍ଷରୁ ଗାଁରେ ଔଷଧ ସିଞ୍ଚନ କରାଯାଉଥିବା ବେଳେ ଡାକ୍ତରୀ ଦଳ ସାନବାଗଦରୀ ଗାଁରେ କ୍ୟାମ୍ପ କରି ଲୋକଙ୍କ ଟେଷ୍ଟିଙ୍ଗ ଏବଂ ସ୍କ୍ରିନିଙ୍ଗ ଜାରି ରଖିଛି । ବର୍ତ୍ତମାନ ସମସ୍ତ ଟେଷ୍ଟ ରାପିଡ଼ ଟେଷ୍ଟିଙ୍ଗ କିଟ୍ ମାଧ୍ୟମରେ କରାଯାଉଛି ଏବଂ ପରେ ଜିଲା ମୁଖ୍ୟାଳୟ ଡାକ୍ତରଖାନାକୁ ନମୁନା ପଠାଯାଇ ଏଲିଶା ରିଡର ସାହାଯ୍ୟରେ ଟେଷ୍ଟ କରାଯିବ ବୋଲି ଡାକ୍ତରୀ ଟିମ୍ କୁହାଯାଇଛି।
