ନୂଆଦିଲ୍ଲୀ,୩୧ା୭: ସାଉଦି ଆରବର ତାଇଫସ୍ଥିତ ଗ୍ରୀନ୍ ମାଉଣ୍ଟେନ୍ ପାର୍କରେ ଗୁରୁବାର ଏକ ଭୟଙ୍କର ଦୁର୍ଘଟଣା ଘଟିଛି। ‘୩୬୦ ଡିଗ୍ରୀ’ ନାମକ ଏକ ଥ୍ରିଲ୍ ରାଇଡ୍ ମଝିରେ ଭାଙ୍ଗି ଦୁଇ ଖଣ୍ଡ ହୋଇଯାଇଥିବାରୁ ଅତି କମ୍ରେ ୨୩ ଜଣ ଆହତ ହୋଇଛନ୍ତି, ଯେଉଁମାନଙ୍କ ମଧ୍ୟରୁ ତିନି ଜଣଙ୍କ ଅବସ୍ଥା ଗୁରୁତର ରହିଛି।
ସୋସିଆଲ ମିଡିଆରେ ଏହି ଘଟଣାର ଏକ ଭିଡିଓ ଭାଇରାଲ ହୋଇଛି, ଯେଉଁଥିରେ ରାଇଡ୍ର ମୁଖ୍ୟ ଖୁଣ୍ଟ ଦୁଇ ଖଣ୍ଡ ହେବା ଓ ରାଇଡରେ ଥିବା ଲୋକମାନେ ଚିତ୍କାର କରି ପ୍ରାର୍ଥନା କରୁଥିବା ଦୃଶ୍ୟ ଦେଖାଯାଇଛି। ଖଲିଜ୍ ଟାଇମ୍ସ ରିପୋର୍ଟ ଅନୁଯାୟୀ, ରାଇଡ୍ର ଖୁଣ୍ଟ ତୀବ୍ର ଗତିରେ ଭାଙ୍ଗି ପଡ଼ିଥିଲା, ଯାହା ଫଳରେ ଅନେକ ଲୋକ ଆହତ ହୋଇଛନ୍ତି।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ରାଇଡ୍ର ଖୁଣ୍ଟି ଅତି ଜୋରରେ ପଛକୁ ଆସି ଅନ୍ୟ ପାର୍ଶ୍ୱରେ ଥିବା କିଛି ଲୋକଙ୍କୁ ଆଘାତ କରିଥିଲା। ରାଇଡ୍ ଭାଙ୍ଗିବା ସମୟରେ ଏଥିରେ ବସିଥିବା କିଛି ଲୋକ ମଧ୍ୟ ଆହତ ହୋଇଛନ୍ତି। ଘଟଣା ପରେ ନିରାପତ୍ତା ଓ ଜରୁରୀକାଳୀନ ସେବା ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ପ୍ରାଥମିକ ଚିକିତ୍ସା ପ୍ରଦାନ କରି ହସ୍ପିଟାଲକୁ ପଠାଇଥିଲେ।
ଏହି ଦୁର୍ଘଟଣାର କାରଣ ଜାଣିବା ପାଇଁ ସମ୍ପୃକ୍ତ କର୍ତ୍ତୃପକ୍ଷ ଏକ ଜରୁରୀ ତଦନ୍ତ ଆରମ୍ଭ କରିଛନ୍ତି। ଉଲ୍ଲେଖଯୋଗ୍ୟ, ଚଳିତ ବର୍ଷ ଦିଲ୍ଲୀର ଫନ୍ ଏନ୍ ଫୁଡ୍ ୱାଟର ପାର୍କରେ ମଧ୍ୟ ଏକ ସମାନ ଘଟଣାରେ ସିଟ୍ ବେଲ୍ଟ ଖରାପ ହେବା ଯୋଗୁଁ ୨୪ ବର୍ଷୀୟା ପ୍ରିୟାଙ୍କା ନାମକ ଜଣେ ମହିଳା ରୋଲର କୋଷ୍ଟରରୁ ଖସି ମୃତ୍ୟୁବରଣ କରିଥିଲେ।
Video: Screams, Prayers As Saudi Amusement Park Ride Crashes On Camera https://t.co/LFSKXq80Bq pic.twitter.com/qMFdMMBGTZ
— NDTV WORLD (@NDTVWORLD) July 31, 2025
