ମହାକାଳପଡ଼ା, ୩ା୯ (ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଖରିନାସୀ ପଞ୍ଚାୟତ ହରିଆବାଙ୍କ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀଙ୍କୁ ବଦଳି କରିବା ପ୍ରତିବାଦରେ ମଙ୍ଗଳବାର ପୂର୍ବାହ୍ନରେ ପରିଚାଳନା କମିଟି ସଦସ୍ୟ, ଅଭିଭାବକମାନେ ତାଲା ପକାଇ ଦେଇଥିଲେ। ଫଳରେ ଶିକ୍ଷୟିତ୍ରୀମାନେ ପୂର୍ବାହ୍ନ ୧୦ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ବାହାରେ ବସି ରହିଥିଲେ। ସୁରକ୍ଷା ପାଇଁ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀ ସୁକାନ୍ତି ରାଉଳ ୧୧୨କୁ କଲ୍ କରି ସହାୟତା ନିବେଦନ କରିଥିଲେ। ପୋଲିସ କଣ୍ଟ୍ରୋଲ ରୁମ୍ରୁ ଖବରପାଇ ଜମ୍ବୁ ସାମୁଦ୍ରିକ ଥାନା ଅଧିକାରୀ ସୌମ୍ୟ ରଞ୍ଜନ ବିଶ୍ୱାଳଙ୍କ ସହିତ ପୋଲିସ ଟିମ୍ ଅପରାହ୍ନ ୪ ଟାରେ ବିଦ୍ୟାଳୟରେ ପହଞ୍ଚତ୍ ତାଲା ଖୋଲିଥିଲେ।
ଏହି ବିଦ୍ୟାଳୟରେ ୮୮ ଛାତ୍ରୀଛାତ୍ର ଶିକ୍ଷାଦାନ କରନ୍ତି। ପୂର୍ବରୁ ବିଦ୍ୟାଳୟରେ ଅବ୍ୟବସ୍ଥା ନେଇ ପରିଚାଳନା କମିଟି ସଦସ୍ୟ, ସିଆରସିସି ଓ ପ୍ରଧାନ ଶିକ୍ଷୟିତ୍ରୀଙ୍କ ସହିତ ଅନ୍ୟ ମୁରବିମାନେ ସମସ୍ୟାର ସମାଧାନ ପାଇଁ ପଦକ୍ଷେପ ଗ୍ରହଣ କରିଥିଲେ ମଧ୍ୟ ତାହା ସମ୍ଭବ ହୋଇ ନ ଥିଲା। ଏ ନେଇ ପରିଚାଳନା କମିଟି ସଭାପତି, ସଦସ୍ୟ ଓ ଅଭିଭାବକମାନେ ପୂର୍ବାହ୍ନରେ ଶ୍ରେଣୀ ଗୃହରେ ତାଲା ପକାଇବା ସହ ମୁଖ୍ୟ ଫାଟକରେ ତାଲା ପକାଇ ଦେଇଥିଲେ। ଫଳରେ ବିଦ୍ୟାଳୟର ଶିକ୍ଷୟିତ୍ରୀମାନେ ବାରଣ୍ଡାରେ ବସିଥିବା ନଜରକୁ ଆସିଥିଲା। ଅପରପକ୍ଷରେ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀ ସୁକାନ୍ତିଙ୍କୁ ପଚାରିବାରେ ପିଲାମାନଙ୍କୁ ବଣ୍ଟା ଯାଉଥିବା ଲଡୁ ପ୍ରସ୍ତୁତ ଓ ପାଚିକା ସହାୟିକାଙ୍କୁ ନେଇ ସମସ୍ୟା ସୃଷ୍ଟି ହୋଇଛି ବୋଲି ସେ କହିଛନ୍ତି। ଏ ନେଇ ପରିଚାଳନା କମିଟି ସଦସ୍ୟ, ଅଭିଭାବକ ପୋଲିସ ନିକଟରେ ଦାବି କରିଛନ୍ତି। ପ୍ରଧାନ ଶିକ୍ଷୟିତ୍ରୀଙ୍କୁ ଏହି ସ୍କୁଲରୁ ଅନ୍ୟତ୍ର ବଦଳାଇବା ପାଇଁ ଦାବି କରିଥିଲେ। ଏ ସଂକ୍ରାନ୍ତରେ ଜମ୍ବୁ ସାମୁଦ୍ରିକ ଥାନା ଅଧିକାରୀ ସୌମ୍ୟରଞ୍ଜନ ବିଶ୍ୱାଳ କହିଛନ୍ତି ଶ୍ରେଣୀ ଗୃହରେ ତାଲାକୁ ଖୋଲାଯାଇଛି। ଯାହା ସମସ୍ୟା ବ୍ଲକ ଶିକ୍ଷା ଅଧିକାରୀଙ୍କ ସହିତ ଆଲୋଚନା କରି ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ବୋଲି ଲୋକମାନଙ୍କ ସହିତ ଆଲୋଚନା କରିଥିଲେ। ଏ ସଂକ୍ରାନ୍ତରେ ବ୍ଲକ ଶିକ୍ଷା ଅଧିକାରୀ କୈଳାସ ଚନ୍ଦ୍ର ଦଳାଇଙ୍କୁ ପଚାରିବାରେ ଗ୍ରାମବାସୀଙ୍କ ଉକ୍ତ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀଙ୍କୁ ବଦଳି ପାଇଁ ପୂର୍ବରୁ ଅଭିଯୋଗ କରିଥିଲେ। ତଦନ୍ତ କରି ସମସ୍ୟା ସମାଧାନ କରାଯିବ ବୋଲି କହିଛନ୍ତି। ଗ୍ରାମର ଦୁଇ ନଂ. ୱାର୍ଡ ମେମ୍ବର ଅସୀମା ମିର୍ଦ୍ଧା, ୩ ନମ୍ବର ୱାର୍ଡ ମେମ୍ବର ମଞ୍ଜୁଲତା ପ୍ରଧାନ, ମାଧବୀ ମଣ୍ଡଳ, ଖୁକୁରାଣୀ ମଣ୍ଡଳ, ବାବୁ ପ୍ରଧାନ, ସୁଦର୍ଶନ ପ୍ରଧାନ, ଗୋବିନ୍ଦ ଜାନା, ଦିଗମ୍ବର ପ୍ରଧାନଙ୍କ ସମେତ ବହୁ ସଂଖ୍ୟାରେ ଗ୍ରାମବାସୀ ଉପସ୍ଥିତ ଥିଲେ।
