ନୂଆଦିଲ୍ଲୀ,୭।୯: ହକିକୁ ଜାତୀୟ ଖେଳର ମାନ୍ୟତା ଦେବା ପ୍ରସଙ୍ଗରେ ସୁପ୍ରିମ୍କୋର୍ଟ(ଏସ୍ସି) ଶୁଣାଣି କରିବାକୁ ମନା କରିଛନ୍ତି। ବର୍ତ୍ତମାନ ସୁଦ୍ଧା ହକିକୁ ଅଧିକାରିକ ଭାବେ ଜାତୀୟ ଖେଳର ମାନ୍ୟତା ମିଳି ନାହିଁ। ଦେଶର ଲୋକଙ୍କ ମଧ୍ୟରେ ପ୍ରଚଳିତ ଧାରଣା ରହିଛି ଯେ, ହକି ଭାରତର ଜାତୀୟ ଖେଳ। ମାତ୍ର ସୂଚନା ଅଧିକାର ଆଇନ ଅନ୍ତର୍ଗତ କରାଯାଇଥିବା ଏକ ଆବେଦନର ଉତ୍ତରରେ ସରକାରଙ୍କ ପକ୍ଷରୁ କୁହାଯାଇଛି ଯେ, ହକିକୁ ସେଭଳି କୌଣସି ମାନ୍ୟତା ପ୍ରଦାନ କରାଯାଇ ନାହିଁ।
ଏନେଇ ଆବେଦନକାରୀ ଶୀର୍ଷ କୋର୍ଟରେ ଦାଖଲ କରିଥିବା ଆବେଦନରେ ଉଲ୍ଲେଖ କରିଛନ୍ତି, କେନ୍ଦ୍ର ସରକାରଙ୍କୁ ଏସମ୍ପର୍କିତ ଘୋଷଣା ପାଇଁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେବା ଆବଶ୍ୟକ। ଯାହାଦ୍ୱାରା ଜାତୀୟ ଖେଳର ମାନ୍ୟତା ପ୍ରାପ୍ତ ପରେ ହକି ନିଜର ୪୧ ବର୍ଷ ତଳର ଗୌରବକୁ ଫେରାଇ ଆଣିବାକୁ ସକ୍ଷମ ହୋଇ ପାରିବ। ଏହା ସହିତ ଜାତୀୟ ଖେଳ ଘୋଷଣା କରାଯିବା ପରେ ହକି ପାଇଁ ଖର୍ଚ୍ଚ ପରିମାଣ ବୃଦ୍ଧି ପାଇବା ଦ୍ୱାରା ଖେଳାଳିମାନେ ଉପକୃତ ହୋଇ ପାରିବେ।
ତେବେ ବିଚାରପତି ୟୁ.ୟୁ. ଲଳିତ, ଏସ୍. ରବୀନ୍ଦ୍ର ଭାଟ ଏବଂ ବେଲା ତ୍ରିବେଦୀଙ୍କ ନେତୃତ୍ୱରେ ଗଠିତ ୩ ଜଣିଆ ଖଣ୍ଡପୀଠ ଏହି ପ୍ରସଙ୍ଗରେ କହିଛନ୍ତି ଯେ, ଏଭଳି ନିର୍ଦ୍ଦେଶ ଦେବା କୋର୍ଟଙ୍କ କାମ ନୁହେଁ। ଏନେଇ ସରକାରଙ୍କ ନିକଟରେ ଦାବି ଉପସ୍ଥାପନ କରାଯିବା ଆବଶ୍ୟକ।
ଖଣ୍ଡପୀଠଙ୍କ ଏଭଳି ନିଷ୍ପତ୍ତି ପରେ ଆଇନଜୀବୀ ବିଶାଳ ତିଓ୍ବାରୀଙ୍କ ପକ୍ଷରୁ ଦାଖଲ କରାଯାଇଥିବା ଆବେଦନ ଫେରାଇ ନିଆଯାଇଛି।
