ମୁମ୍ବାଇ,୧୧।୨: ଗୁରୁବାର ଦେଶବ୍ୟାପୀ ବ୍ୟାଙ୍କ ଧର୍ମଘଟ ପାଇଁ ବିଭିନ୍ନ ବ୍ୟାଙ୍କ କର୍ମଚାରୀ ସଙ୍ଘ ଆହ୍ୱାନ ଦେଇଛନ୍ତି। ଏହି ପରିପ୍ରେକ୍ଷୀରେ ଦେଶର ସବୁଠାରୁ ବଡ଼ ସରକାରୀ ବ୍ୟାଙ୍କ ‘ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ’ (SBI) ନିଜର ଗ୍ରାହକମାନଙ୍କୁ ସତର୍କ କରାଇଛି। ଧର୍ମଘଟ ଯୋଗୁଁ ବ୍ୟାଙ୍କିଙ୍ଗ୍ ସେବା କିଛି ମାତ୍ରାରେ ପ୍ରଭାବିତ ହୋଇପାରେ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି।
କେନ୍ଦ୍ର ସରକାରଙ୍କ ନୂତନ ୪ଟି ‘ଶ୍ରମ କୋଡ୍’କୁ ବିରୋଧ କରି ୧୦ଟି କେନ୍ଦ୍ରୀୟ ଶ୍ରମିକ ସଙ୍ଘ ପକ୍ଷରୁ ଏହି ପ୍ରତିବାଦ କରାଯାଉଛି। ଏହା ସହ ୫ ଦିନିଆ ବ୍ୟାଙ୍କିଙ୍ଗ୍ ଏବଂ କର୍ମକ୍ଷେତ୍ରରେ ଉନ୍ନତ ସମନ୍ୱୟ ପାଇଁ ବ୍ୟାଙ୍କ ୟୁନିୟନଗୁଡ଼ିକ ଦାବି କରିଛନ୍ତି। ଅଲ୍ ଇଣ୍ଡିଆ ବ୍ୟାଙ୍କ ଏମ୍ପ୍ଲୋଇଜ୍ ଆସୋସିଏସନ (AIBEA), AIBOA ଏବଂ BEFI ଭଳି ପ୍ରମୁଖ ସଙ୍ଘ ଏଥିରେ ସାମିଲ ହେଉଛନ୍ତି।
ଏସବିଆଇ ସମେତ ବ୍ୟାଙ୍କ ଅଫ୍ ବରୋଦା ଏବଂ ଆଇଡିବିଆଇ ବ୍ୟାଙ୍କ ମଧ୍ୟ ସେବା ବାଧାପ୍ରାପ୍ତ ହେବା ନେଇ ସୂଚନା ଦେଇଛନ୍ତି। ତେବେ ଆରବିଆଇ (RBI) ପକ୍ଷରୁ ଏହି ଦିନ ଛୁଟି ଘୋଷଣା କରାଯାଇ ନାହିଁ। ମୋବାଇଲ୍ ବ୍ୟାଙ୍କିଙ୍ଗ୍, ୟୁପିଆଇ (UPI) ଏବଂ ଇଣ୍ଟରନେଟ୍ ବ୍ୟାଙ୍କିଙ୍ଗ୍ ସେବା ସ୍ୱାଭାବିକ ରହିବାର ସମ୍ଭାବନା ଅଛି।
ତେବେ ଚେକ୍ କ୍ଲିୟରାନ୍ସ ଏବଂ ନଗଦ କାରବାର ଭଳି ଶାଖା ଭିତ୍ତିକ କାର୍ଯ୍ୟରେ ବିଳମ୍ବ ହୋଇପାରେ। ଗ୍ରାହକମାନେ ନିଜର ଜରୁରୀ କାର୍ଯ୍ୟଗୁଡ଼ିକୁ ଧର୍ମଘଟ ପୂର୍ବରୁ ସାରିବାକୁ ପରାମର୍ଶ ଦିଆଯାଇଛି।
