ଭୁବନ, ୧୦।୬(ଡି.ଏନ.ଏ.) ଭୋର୍ ସମୟରୁ ମନ୍ଦିର ହେବ ପୋଲିସ ଛାଉଣି। କାହାରିକୁ ପୀଠ ଭିତରକୁ ପ୍ରବେଶ କରିବାକୁ ମିଳିବନି ଅନୁମତି। ମନ୍ଦିର ପରିଚାଳନା କମିଟି କଟକଣା ଭାଙ୍ଗି ପୂଜା କରିବାକୁ ଅନୁମତି ଦେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପ୍ରଶାସନର ଏଭଳି କଡ଼ା ତାଗିଦ୍ ପରେ ପୂଜା କେମିତି ହେବ, ପୁରାଣ କେମିତି ପଢ଼ାଯିବ ଏବଂ ବ୍ରତ କେମିତି ପାଳନ କରାଯିବ ତାହାକୁ ନେଇ ଚିନ୍ତାରେ ପଡ଼ିଛନ୍ତି ସାବିତ୍ରୀ। ଗତବର୍ଷ ଭଳି ଚଳିତବର୍ଷ ମଧ୍ୟ କାମଚଳାରେ ବ୍ରତ ପାଳନ କରିବାକୁ ମାନସିକସ୍ତରରେ ପ୍ରସ୍ତୁତ ହେଉଛନ୍ତି ଢେଙ୍କାନାଳ ଜିଲା ଭୁବନ ଅଞ୍ଚଳର ବ୍ରତଧାରୀ।
ମହାମାରୀ ପାଇଁ ଫିକା ପଡୁଛି ଗୋଟିଏ ପରେ ଗୋଟିଏ ପ୍ରମୁଖ ପର୍ବପର୍ବାଣି। ଗତବର୍ଷ ଭଳି ଚଳିତ ବର୍ଷ ଓଡ଼ିଆ ଘରର ପ୍ରମୁଖ ପର୍ବ ସାବିତ୍ରୀ ଅମାବାସ୍ୟା ଉପରେ ଲାଗିଛି କରୋନା ଗ୍ରହଣ। ଦ୍ୱିତୀୟ ଲହର ସଂକ୍ରମଣ ରୋକିବାକୁ ମେ ପ୍ରଥମ ସପ୍ତାହରୁ ରାଜ୍ୟରେ ଲକ୍ଡାଉନ୍ ଚାଲିଥିବାବେଳେ ଶ୍ରଦ୍ଧାଳୁଙ୍କ ମନ୍ଦିର ପ୍ରବେଶ ବାରଣ କରାଯାଇଛି। ପୀଠରେ କେବଳ ଠାକୁରଙ୍କ ନୀତିକାନ୍ତି ହେଉଛି। ଏଭଳି ସ୍ଥିତିରେ ଗୁରୁବାର ହେଉଥିବା ସାବିତ୍ରୀ ଅମାବାସ୍ୟ ପାଳନକୁ ନେଇ ସଧବାଙ୍କ ଚିନ୍ତା ବଢ଼ିଛି। ସେମାନେ ଘରେ ପୂଜକଙ୍କୁ ଡାକି ନିରାଡମ୍ବର ଭାବେ ପୂଜା କରିବାକୁ ଯୋଜନା କରୁଛନ୍ତି।
ଅନ୍ୟପଟେ ଏବେ ବ୍ଲକରେ ସଂକ୍ରମଣ ସ୍ଥିତିରେ ସୁଧାର ଆସୁଛି। ଏଭଳି ସମୟରେ ସାମାନ୍ୟ ଅବହେଳା ପରିସ୍ଥିତି ବିଗାଡ଼ି ଦେଇପାରେ। ତେଣୁ ମନ୍ଦିରରେ କଟକଣା ଜଗିବା, ଅମାନିଆଙ୍କୁ ସାବାଡ଼ କରିବାକୁ ପୋଲିସ ପ୍ରଶାସନ ସଜାଗ ହୋଇଉଠିଛି। ଏ ନେଇ ଥାନାଧିକାରୀ ପ୍ରଶାନ୍ତ କୁମାର ପାତ୍ର କୁହନ୍ତି, ସାବିତ୍ରୀ ପାଇଁ ବଜାର ଭିଡ଼ ହେବାର ଆଶଙ୍କା ରହିଛି। ଗହଳି ନିୟନ୍ତ୍ରଣ କରିବା ଏବଂ କୋଭିଡ୍ ଗାଇଡ୍ଲାଇନ୍ ପାଳନ ଲାଗି ସ୍ବତନ୍ତ୍ର ଯୋଜନା କରାଯାଇଛି। ଭୋର୍ ୪ଟାରୁ ଅଞ୍ଚଳର ପ୍ରମୁଖ ମଠମନ୍ଦିରଗୁଡ଼ିକ ନିକଟରେ ପୋଲିସ ମୁତୟନ କରାଯିବ। ଅମାନିଆ ହୋଇ ବ୍ୟବସାୟ କଲେ ଦୋକାନ ସିଲ୍ କରାଯିବ ବୋଲି ସେ ସୂଚନା ଦେଇଛନ୍ତି।
ମନକଷ୍ଟ ହେଉଛି
କରୋନା ପାଇଁ କେବଳ ଧନଜୀବନ ହାନି ହେଉନି, ଏହାର ପ୍ରଭାବରେ ସାଂସ୍କୃତିକ ଜୀବନ ମଧ୍ୟ ପ୍ରଭାବିତ ହେଉଛି। ସାବିତ୍ରୀ ବ୍ରତ ପାଳନରେ ସମସ୍ୟା ଉପୁଜୁଥିବାରୁ ମନରେ କଷ୍ଟ ହେଉଛି। ସରକାରଙ୍କ ନିୟମ ମାନି ଘରେ ରହି ପୂଜାର୍ଚ୍ଚନା କରିବି।
-ଗୀତାଞ୍ଜଳି ମହାରଣା, ବ୍ରତଧାରୀ
ଘରୁ ଭାର ଆସିପାରିଲାନି
ସାବିତ୍ରୀରେ ବାପଘରୁ ଭାର ଆସେ। ଚଳିତବର୍ଷ ଗାଡ଼ିମୋଟର ଚଳାଚଳ ବନ୍ଦ ଥିବାରୁ ଭାର ଆସିପାରିଲାନାହିଁ। ଏହା ବଦଳରେ ବ୍ୟାଙ୍କ ଖାତାକୁ ଟଙ୍କା ଆସିଛି। ଏଭଳି ସମସ୍ୟା କେବେ ଉପୁଜି ନ ଥିଲା। ତଥାପି ଜୀବନ ସୁରକ୍ଷାକୁ ଗୁରୁତ୍ୱ ଦେବାକୁ ପଡ଼ିବ।
-ଗାୟତ୍ରୀ ପାତ୍ର, ବ୍ରତଧାରୀ
ବ୍ରତପାଳନ ଫିକା ପଡ଼ିବ
ସରକାରୀ ନିର୍ଦ୍ଦେଶ ପରେ ଲୁଗାଦୋକାନ, ଷ୍ଟେଶନାରି ଦୋକାନ ସବୁ ବନ୍ଦ ରହିଛି। ପୂଜା ଉପକରଣ କିଣିବାରେ ସମସ୍ୟା ହେଉଛି। ଆବଶ୍ୟକ ସାମଗ୍ରୀ ଏବଂ ଫଳ ଦର ଆକାଶ ଛୁଅଁା ହୋଇଛି। ଚଳିତ ବର୍ଷ ଘରେ ପୂଜା ହେଉଥିବାରୁ ବ୍ରତପାଳନ ଫିକାପଡ଼ିବ।
-ଏଲିନା ସାହୁ, ବ୍ରତଧାରୀ
ବୁଡ଼ିଗଲା ବର୍ଷକର ବେପାର
ସାବିତ୍ରୀ ଏବଂ ରଜ ମହୋତ୍ସବ ଓଡ଼ିଆ ଘରର ପ୍ରମୁଖ ପର୍ବ। ଲୁଗା ବ୍ୟବସାୟୀମାନେ ଏଭଳି ପ୍ରମୁଖ ପର୍ବରେ ଭଲ ବ୍ୟବସାୟ ଆଶାରେ ରହିଥାଆନ୍ତି। ସାବିତ୍ରୀ ଏବଂ ରଜ ପାଇଁ ଲକ୍ଷାଧିକ ଟଙ୍କାର ଲୁଗା କିଣି ଆଣି ରଖାଯାଇଥିଲା। ହେଲେ ଦୋକାନ ବନ୍ଦ ଥିବାରୁ ବର୍ଷକର ବେପାର ବୁଡ଼ିଗଲା।
-ଦୁର୍ଗାପ୍ରସାଦ ବଲଦଓ୍ବୋ, ଲୁଗା ବ୍ୟବସାୟୀ