ଆରଡ଼ି,୨୨ା୫(ଡି.ଏନ.ଏ.): କରୋନା ମହାମାରୀ, ବନ୍ୟା, ବାତ୍ୟା ଆଦି ସମୟରେ ସେ ଗଁା ଗଁା ବୁଲି ଖାଦ୍ୟ ଯୋଗାଉଥିଲେ। ଲୋକଙ୍କ ସେବା କରୁଥିଲେ। ଏଥିସହ ସେ ବହୁ ଗରିବ ଲୋକଙ୍କୁ ଚିକିତ୍ସା ପାଇଁ ଆର୍ଥିକ ସହାୟତା କରିଛନ୍ତି। ଆଉ ଆଜି ତାଙ୍କ ଚିକିତ୍ସା ପାଇଁ ସହାୟତା ଲୋଡ଼ିଛନ୍ତି ପରିବାର ଲୋକେ। ସେ ହେଲେ ଭଦ୍ରକ ଜିଲା ଧୂଷୁରୀ ଥାନା ଅଧୀନ ଆରଡ଼ି ଗ୍ରାମର ସମର ପାଢ଼ୀ (୪୦)। ସମରଙ୍କୁ ଲିଭର ଜଣ୍ଡିସ ହୋଇଛି। ତାଙ୍କ ଲିଭର ସଂକ୍ରମିତ ହୋଇ ଅଚଳ ହେବା ଭଳି ପରିସ୍ଥିତି ଉପୁଜିଛି। ପରିବାର ଲୋକେ ଓଡ଼ିଶାର ବିଭିନ୍ନ ଘରୋଇ ହସ୍ପିଟାଲରେ ତାଙ୍କ ଚିକିତ୍ସା କରାଇ ପ୍ରାୟ ୨୫ ଲକ୍ଷ ଟଙ୍କା ଖର୍ଚ୍ଚ କରିସାରିଥିଲେ ବି କୌଣସି ସୁଫଳ ମିଳିପାରି ନାହିଁ। ବୁଧବାର ତାଙ୍କୁ ହାଇଦ୍ରାବାଦସ୍ଥିତ ଗ୍ଲୋବାଲ ହସ୍ପିଟାଲରେ ଭର୍ତ୍ତି କରାଯାଇଛି। ସେଠାକାର ଡାକ୍ତର ଲିଭର ପ୍ରତିରୋପଣ କରିବାକୁ ପରାମର୍ଶ ଦେଇଛନ୍ତି। ଏଥିପାଇଁ ପ୍ରାୟ ୪୫ ଲକ୍ଷ ଟଙ୍କା ଆବଶ୍ୟକ। ଜମିବାଡ଼ି ସହ ଅନ୍ୟାନ୍ୟ ଜିନିଷ ବିକି ତାଙ୍କର ଚିକିତ୍ସା ଚାଲିଛି। ଆଉ ତାଙ୍କ ପାଖରେ ସମ୍ବଳ ନାହିଁ ବୋଲି ସମରଙ୍କ ସ୍ତ୍ରୀ ସସ୍ମିତା ପାଢ଼ୀ କହିଛନ୍ତି। ଏଥିସହ ତାଙ୍କ ସ୍ବାମୀଙ୍କ ଜୀବନ ବଞ୍ଚାଇବାକୁ ଆର୍ଥିକ ସହାୟତା ଲାଗି ସେ ଓଡ଼ିଶାବାସୀଙ୍କୁ ହାତଯୋଡ଼ି ସୋସିଆଲ ମିଡିଆ ମାଧ୍ୟମରେ ନିବେଦନ କରିଛନ୍ତି।