ଖଇରା, ୨୧ା୨(ଡି.ଏନ.ଏ.): ବାଲେଶ୍ୱର ଜିଲା ଖଇରା ବ୍ଲକ ଅଧୀନ କୁପାରୀ ପଞ୍ଚାୟତରେ ବିଭିନ୍ନ ଯୋଜନାକୁ ନେଇ ପ୍ରାକ୍ତନ ଲୋକ ପ୍ରତିନିଧି ଓ ବର୍ତ୍ତମାନର ଲୋକ ପ୍ରତିନିଧିଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଚାଲିବା ପରେ କୁପାରୀ ରାଜନୀତି ସରଗରମ ହୋଇପଡିଛି। କିଛିଦିନ ତଳେ କୁପାରୀରେ ରହୁଥିବା ଅନ୍ୟ ରାଜ୍ୟର ଲୋକଙ୍କ ଆଧାର ସଂଶୋଧନ ଓ ଖାଦ୍ୟ ସୁରକ୍ଷା ଯୋଜନା ଚାଉଳ ବଣ୍ଟନରେ ଅନିୟମିତତା ଅଭିଯୋଗ ଆଣି ପ୍ରାକ୍ତନ ବ୍ଲକ ଉପାଧ୍ୟକ୍ଷା ଓ ବର୍ତ୍ତମାନର ଏମ୍ପି ପ୍ରତିନିଧି ଜୟନ୍ତ କୁମାର ରାଉତ ବର୍ତ୍ତମାନର ସରପଞ୍ଚଙ୍କୁ ଏଥିପାଇଁ ଦାୟୀ କରିଥିଲେ। ପ୍ରତିବାଦରେ ସୋମବାର ସରପଞ୍ଚ ଜ୍ୟୋତ୍ସ୍ନାରାଣୀ ଦାସ, ସମିତିସଭ୍ୟ ଅକ୍ଷୟ ଜେନା, ଜିଲା ପରିଷଦ ସଭ୍ୟ ଗଜେନ୍ଦ୍ର ପ୍ରସାଦ ଦାସ ଏକ ଖବରଦାତା ସମ୍ମିଳନୀରେ ଉପରୋକ୍ତ ଦୁଇ ପ୍ରସଙ୍ଗ ବ୍ୟତୀତ ପ୍ରଧାନମନ୍ତ୍ରୀ ଆବାସ ତାଲିକାରୁ ହିତାଧିକାରୀ ବାଦ୍ ସମେତ ଅନେକ ପ୍ରସଙ୍ଗ ଉପରେ ମୁହଁ ଖୋଲିଛନ୍ତି ା ଏଥିପାଇଁ ରାଉତଙ୍କ କାର୍ଯ୍ୟ ଉପରେ ଅଙ୍ଗୁଳି ଉଠାଇଛନ୍ତି। ୨୦୨୨ରେ ସେମାନେ କ୍ଷମତାରେ ରହିବା ପୂର୍ବରୁ କୁପାରୀ ପଞ୍ଚାୟତର ହିତାଧିକାରୀଙ୍କୁ ଅଧିକାଂଶ ସମୟରେ ୩ ମାସରେ ଥରେ ଚାଉଳ ମିଳୁଥିଲା । ସେତେବେଳେ ସରକାର ଶତ ପ୍ରତିଶତ ଚାଉଳ ଯୋଗାଇ ଦେଉଥିବା ବେଳେ ବର୍ତ୍ତମାନ ୩ ପର୍ଯ୍ୟାୟରେ ଶତ ପ୍ରତିଶତ ଚାଉଳ ଆସୁଥିବାରୁ ଏକାଥରେ ଚାଉଳ ଆସିବା ପରେ ଦିଆଯାଉଛି । ଏଥିପାଇଁ ହୁଏତ ହିତାଧିକାରୀଙ୍କୁ କିଛିଦିନ ଅପେକ୍ଷା କରିବାକୁ ପଡୁଛି । ସେହିଭଳି କୁପାରୀରେ ତହସିଲରୁ ଅସ୍ଥାୟୀ ଅନୁମତି ନେଇ ରହୁଥିବା କେତେଜଣ ପଶ୍ଚିମବଙ୍ଗ ବାସିନ୍ଦାଙ୍କୁ ମେଡିକାଲ ଓ ସେମାନଙ୍କର ପିଲାମାନଙ୍କ ଶିକ୍ଷାର ସୁବିଧା ପାଇଁ ଆଧାର କାର୍ଡ ସଂଶୋଧନ କରାଯାଇଥିଲା। କୁପାରୀର କିଛି ସଙ୍ଗଠନ ଆପତ୍ତି ଉଠାଇବା ପରେ ତାଙ୍କୁ ସେଠାରୁ ଚାଲିଯିବାକୁ କୁହାଯାଇଥିଲା । ହେଲେ ଏମାନଙ୍କ ମଧ୍ୟରୁ ଅଧିକାଂଶ ବାସିନ୍ଦାଙ୍କର କାର୍ଡ ପୂର୍ବ ସରପଞ୍ଚଙ୍କ ସମୟରେ ସଂଶୋଧନ କରାଯାଇଥିଲା ଏବଂ କରୋନା ବେଳେ ସେମାନଙ୍କୁ ମଧ୍ୟ ପଞ୍ଚାୟତ ତରଫରୁ ଖାଦ୍ୟ ଖାଇବାକୁ ଦିଆଯାଇଥିଲା। ଏହାଛଡା ପ୍ରଧାନମନ୍ତ୍ରୀ ଆବାସରେ ୨୩୮ଜଣ ତାଲିକାଭୁକ୍ତ ଥିବା ବେଳେ ୧୦୨ଜଣଙ୍କ ନାମ ବାଦ୍ ପଡିବାକୁ ନେଇ ପୂର୍ବ ଲୋକ ପ୍ରତିନିଧିଙ୍କୁ ଦାୟୀ କରିଛନ୍ତି । ସେହିଭଳି ମହାନଗ ପୋଖରୀ ଓ ହଦ ପୋଖରୀ ଖୋଳାରେ ଦୁର୍ନୀତି ହୋଇଥିବା ନେଇ ମଧ୍ୟ ଅଭିଯୋଗ କରିଛନ୍ତି।
‘ଦୁର୍ନୀତି ପ୍ରମାଣ ଦେଲେ ରାଜନୀତି ଛାଡିଦେବି’ ବର୍ତ୍ତମାନର ସରପଞ୍ଚ ଏବଂ ଅନ୍ୟ ଲୋକ ପ୍ରତିନିଧିଙ୍କ ଅଭିଯୋଗର ଉତ୍ତର ରଖିଛନ୍ତି ପ୍ରାକ୍ତନ ବ୍ଲକ ଉପାଧ୍ୟକ୍ଷ ଜୟନ୍ତ କୁମାର ରାଉତ। କରୋନା ସମୟରେ ଅନ୍ୟ ରାଜ୍ୟରୁ ଆସିଥିବା ଲୋକଙ୍କୁ ପ୍ରବାସୀ ଭାବେ ବିବେଚିତ କରାଯାଇଥିଲା ଏବଂ ବର୍ତ୍ତମାନ ଆସିଥିବା ଲୋକଙ୍କୁ ଅଧିବାସୀ ଭାବେ ଆଧାରକାର୍ଡ ଦିଆଯାଇଛି । ପୋଖରୀ ଖୋଳା ହେଉ କି ଆବାସ ତାଲିକାରୁ ହିତାଧିକାରୀ ବାଦ୍ ପଡିବା ହେଉ ସବୁ କିଛି ସରକାରୀ ନିର୍ଦ୍ଦେଶନାମା ମଧ୍ୟରେ କରାଯାଇଛି। ବର୍ତ୍ତମାନ ଏହି ଲୋକ ପ୍ରତିନିଧି ଦଳୀୟ ମନୋଭାବ ରଖି ଅଭିଯୋଗ କରି କିଛି ଗରିବ ଲୋକଙ୍କ ନାମ କାଟିଛନ୍ତି । ଯଦି ତାଙ୍କ ସମୟରେ ହୋଇଥିବା ଦୁର୍ନୀତିର ଗୋଟିଏ ପ୍ରମାଣ ଦିଅନ୍ତି ତେବେ ରାଜନୀତି ଛାଡିଦେବେ ବୋଲି କହିଛନ୍ତି ।
