ଗଞ୍ଜାମ,୩୧ା୧୨(ବିଦ୍ୟାଧର ସାହୁ ): କୁକୁର ମୁଁହରୁ ଆହତ ହରିଣକୁ ଉଦ୍ଧାର କଲେ ମଲାଡ଼ ସରପଞ୍ଚ ପ୍ରତିନିଧି ସୁଦାମ ବେହେରା । ମଲାଡ଼ ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର କିଛି ଦୂର ଜଙ୍ଗଲ ମଧ୍ୟରୁ ଚାରୋଟି କୁକୁର ଏକ ହରିଣକୁ ଗୋଡ଼ାଇ ଗୋଡ଼ାଇ ଖଣ୍ଡିଆ କରୁଥିଲେ । ଏହା ଦେଖିବା ପରେ ସେଠାରେ ଉପସ୍ଥିତ ଥିବା ସରପଞ୍ଚ ପ୍ରତିନିଧି ସୁଦାମ ବେହେରା ଆହତ ହରିଣକୁ ଉଦ୍ଧାର କରି ନିକଟସ୍ଥ ପ୍ରାଣୀଧନ ଚିକିତ୍ସା କେନ୍ଦ୍ରକୁ ଚିକିତ୍ସା କରିବାକୁ ନେଇଥିଲେ ।
ସେଠାରେ ସାମାନ୍ୟ ହରିଣଟି ସୁସ୍ଥ ହେବା ପରେ ବନବିଭାଗକୁ ହସ୍ତାନ୍ତର କରାଯାଇଥିବା ଜଣାପଡିଛି । ବର୍ତ୍ତମାନ ସମୟରେ ଚାରିଆଡେ ଜଙ୍ଗଲ କାଟି ପଦା କରି ଦିଆଯାଇଛି । ସେହି ସ୍ଥାନରେ ବିଭିନ୍ନ କଳକାରଖାନା ନିର୍ମାଣ କରାଯାଉଛି । ଇଟା ଭାଟି, ପଥର କୁଆଁରରୁ ଉଚ୍ଚ ଶବ୍ଦ ଯୋଗୁଁ ବିଭିନ୍ନ ସମୟରେ ପଶୁ ଜନ୍ତୁ ଜନବସତି ଅଞ୍ଚଳକୁ ଚାଲି ଆସୁଛନ୍ତି ।
