ଦାରିଙ୍ଗବାଡ଼ି,୧୯ା୧(ଅରୁଣ ସାହୁ): ଓଡ଼ିଶା ରାଜ୍ୟ ସରପଞ୍ଚ ମହାସଂଘର ରାଜ୍ୟ କାର୍ଯ୍ୟକାରିଣୀ ବୈଠକ ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ି ରାଣୀଦୁର୍ଗା କଲ୍ୟାଣମଣ୍ଡପଠାରେ କନ୍ଧମାଳ ଜିଲା ସଭାପତି ରୋହିତ କହଁରଙ୍କ ଆବାହକତ୍ୱରେ ଅନୁଷ୍ଠିତ ହୋଇଯାଇଛି। ବୈଠକ ଆରମ୍ଭରୁ ଥଣ୍ଡା ପାଗରେ ସୃଷ୍ଟି ହୋଇଥିଲା ଗରମ ଆଲୋଚନା। ସମସ୍ତ ସରପଞ୍ଚ ଓ ରାଜ୍ୟସ୍ତରୀୟ ନେତାମାନେ ରାଜ୍ୟ ସରକାରଙ୍କ ଉପରେ ବର୍ଷିଥିଲେ। ସରକାର ଶହ ଶହ ଯୋଜନା କରନ୍ତୁ ଆମେ ବିରୋଧ କରୁନାହୁଁ କିନ୍ତୁ ତାକୁ ସଠିକ ଦିଗରେ ପରିଚାଳନା କରନ୍ତୁ ବିଶେଷ କରି ପଞ୍ଚାୟତ ଅଞ୍ଚଳର ବିକାଶ ପାଇଁ କରାଯାଉଥିବା କାର୍ଯ୍ୟକୁ ସଠିକ୍ ଭାବେ ଗ୍ରାମସଭା ପାଇଁ ପଦକ୍ଷେପ ନିଆଯାଉ, ଗ୍ରାମସଭାକୁ ୧୫ ଦିନ ପୁର୍ବରୁ ଚିଠି ହୋଇ ସଭା କରାଯିବା ଆବଶ୍ୟକ ସ୍ଥଳେ ଏହା କରା ନ ଯାଇ ରାତି ଅଧରେ ଚିଠି ଆସୁଛି ସକାଳୁ ସଭା ହେଉଛି ବୋଲି ଅଭିଯୋଗ ହୋଇଥିଲା। ସେହିପରି ଏବେକାର ସରକାର ବିକଶିତ ଗାଁ ବିକଶିତ ଓଡ଼ିଶା ଯୋଜନାକୁ ଗାଁ ଓ ପଞ୍ଚାୟତରେ ଯୋଜନା ସଠିକ ଭାବେ କାର୍ଯ୍ୟ କରାଇଦେଉ ନ ଥିବା ଅଭିଯୋଗ ହୋଇଥିଲା। ଏମ୍ଜିଏନ୍ଆର୍ଇଜିଏଏସ୍ ଯୋଜନାର ନାମ ପରିବର୍ତ୍ତନ କଲେ କିନ୍ତୁ ଶ୍ରମିକଙ୍କ ମୁଲ୍ୟ ବୃଦ୍ଧି ହେଉ ନ ଥିବା ଅଭିଯୋଗ ହୋଇଥିଲା। ଏହାର ଆବଶ୍ୟକତା ନ ଥିଲା ବୋଲି କୁହାଯାଇଥିଲା। ସେହିପରି ଯଦି ନେତା, ବିଧାୟକ ପେନ୍ସନ୍ ପାଉଛନ୍ତି ଆମେ କାହିଁକି ନୁହଁ ବୋଲି ପ୍ରଶ୍ନ ଉଠାଇଛି ମହାସଂଘ। ସରପଞ୍ଚମାନଙ୍କୁ ଜନସାଧାରଣ ମତଦାନ କରନ୍ତି କିନ୍ତୁ ଓ୍ବାର୍ଡସଭ୍ୟାସଭ୍ୟମାନେ ଅନାସ୍ଥା ଆଣି ଅନେକ ସମୟରେ ସରପଞ୍ଚମାନଙ୍କ ବିକାଶ ଚିନ୍ତାକୁ ବାଧକ ସୃଷ୍ଟି ହେଉଛି। ଏମିତିକି ରାଷ୍ଟ୍ରପତି ପୁରସ୍କାର ପ୍ରାପ୍ତ ସରପଞ୍ଚଙ୍କୁ ମଧ୍ୟ ଅନାସ୍ଥାର ଶିକାର କରାଯାଇଥିବା ନଜିର ରହିଛି। ଅନାସ୍ଥା ଆସିଲା ବେଳେ ପ୍ରଶାସନ ପଦକ୍ଷେପ ପୂର୍ବରୁ ଭଲ ଭାବେ ତଦନ୍ତ କରାଯିବାକୁ ସରପଞ୍ଚମାନେ ବୈଠକରେ କହିଥିଲେ। ଏଥି ସହ ଅନାସ୍ଥା ପ୍ରସ୍ତାବ ନିୟମକୁ ସଂଶୋଧନ ଦାବି କରାଯିବା ସହ ଦରମା ବୃଦ୍ଧି ଓ ପେନ୍ସନ୍ ଲାଗୁ ପାଇଁ ଦାବି ହୋଇଛି। ଏହି ସବୁ ସମସ୍ୟାର ସମାଧାନ ପାଇଁ ଲଢେଇ ଦରକାର ତେଣୁ ଆମ ହକ୍ ପାଇଁ ଲଢେଇ କରିବା, ସଂଗଠନକୁ ମଜବୁତ କରିବା ଆମେ କୌଣସି ରାଜନୈତିକ ଦଳ ନୁହଁ ବୋଲି କହିଲେ ରାଜ୍ୟ ସରପଞ୍ଚ ମହାସଂଘ ଆଗକୁ ଭୁବନେଶ୍ୱରରେ ରାଜ୍ୟ ସ୍ତରୀୟ ଆନ୍ଦୋଳନ ପାଇଁ ନିଷ୍ପତ୍ତି ନିଆଯାଇଛି।
ପ୍ରକାଶ ଯେ, ବୈଠକରେ ରାଜ୍ୟ ମହାସଂଘର ସଭାପତି ରୋମାଞ୍ଚ ସାହୁ ମୁଖ୍ୟ ଅତିଥିଭାବେ ଯୋଗଦେଇଥିବା ବେଳେ ଅନ୍ୟତମ ଅତିଥିଭାବେ କାର୍ଯ୍ୟକାରିଣୀ ସଭାପତି ବୀରବର ସାହୁ,ରାଜ୍ୟ ସଂଘର ଉପସଭାପତି ତଥା ଗଞ୍ଜାମ ଜିଲା ସଭାପତି ମନୋରଞ୍ଜନ ଗୌଡ଼, ଉପଦେଷ୍ଟା ତଥା ପୁରୀ ଜିଲା ସଭାପତି ଉପେନ୍ଦ୍ର କୁମାର କାନୁନଗୋ,ରାଜ୍ୟ ଉପସଭାନେତ୍ରୀ ସଂଘମିତ୍ରା ଶବର, ପଶ୍ଚିମାଞ୍ଚଳ ଜୋନ୍ ସଭାପତି ତଥା ସୁନ୍ଦରଗଡ଼ ଜିଲା ସଭାପତି ଉଗ୍ରସେନ କିଷାନ, ରାଜ୍ୟ ସମ୍ପାଦିକା ତଥା କେନ୍ଦୁଝର ଜିଲା ପ୍ରତିନିଧି ଦୀପ୍ତି ସାହୁ, ବରଗଡ଼ ଜିଲା ସଭାପତି ଗୋବିନ୍ଦ ପ୍ରଧାନ, କୋରାପୁଟ ଜିଲା ସଭାପତି ନବ ମୁଦୁଲି, ନବରଙ୍ଗପୁର ଜିଲା ସଭାପତି କୃଷ୍ଣଚନ୍ଦ୍ର ଭଦ୍ରା, ମୟୂରଭଞ୍ଜ ଜିଲା ସଭାପତି ଖଗେଶ୍ୱର ସିଂ, ରାଜ୍ୟ ମହାସଂଘର ଉପଦେଷ୍ଟା ଶିରିଶ ରଞ୍ଜନ ନାୟକ, ବୌଦ୍ଧ ଜିଲା ସଭାପତି ଅରୁଣ ବାଘ, ସୋନପୁର ଜିଲାର ଉପଦେଷ୍ଟା ହିମଚାନ୍ଦ ସିଂ ଦେଓ, କନ୍ଧମାଳ ଜିଲାର ଉପଦେଷ୍ଟା ବନ ପଟ୍ଟନାୟକଙ୍କ ସମେତ ଅନ୍ୟ ଜିଲା ଓ ରାଜ୍ୟର ପ୍ରତିନିଧିମାନେ ଯୋଗଦାନ କରିଥିଲେ। କାର୍ଯ୍ୟକ୍ରମରେ କନ୍ଧମାଳ ଜିଲା ସମ୍ପାଦକ ସଞ୍ଜୟ କୁମାର ନାୟକ ମଞ୍ଚ ପରିଚାଳନା କରିଥିଲେ।
