ରାୟଗଡ଼ା ଅଫିସ,୧୪ା୩: ରାୟଗଡ଼ା ଜିଲା ପରିଷଦ ସଭାପତି ରୂପେ କାଶୀପୁର ବ୍ଲକ ‘ଗ’ ଜୋନ୍ର ଜିଲା ପରିଷଦ ସଭ୍ୟା ସରସ୍ବତୀ ମାଝି ନିର୍ବାଚିତ ହୋଇଛନ୍ତି। ବିଜେଡିରୁ ସେ ଅପ୍ରତିଦ୍ୱନ୍ଦ୍ୱୀ ଭାବେ ଏହି ଆସନ ହାତେଇବାରେ ସଫଳ ହୋଇଛନ୍ତି। ଗୁରୁତ୍ୱପୂର୍ଣ୍ଣ ବିଷୟ ହେଲା ସରସ୍ବତୀଙ୍କ ବୟସ ମାତ୍ର ୨୩ ବର୍ଷ। ରାଜନୀତିରେ ପ୍ରଥମ ଥର ପାଦଦେଇ ସେ ସର୍ବକନିଷ୍ଠ ଜିଲା ପରିଷଦ ସଭାପତି ହୋଇପାରିଛନ୍ତି। ଜିଲାର ୨୨ ଜିଲା ପରିଷଦ ସଭ୍ୟ ଉପସ୍ଥିତ ଥିଲେ ମଧ୍ୟ ବିଜେଡି ୧୬ ଆସନରେ ବିଜୟୀ ହୋଇ ସଂଖ୍ୟାଗରିଷ୍ଠତା ହାସଲ କରିଥିବାରୁ ସରସ୍ବତୀ ଜଣେ ମାତ୍ର ପ୍ରାର୍ଥୀ ଭାବେ ଜିଲା ପରିଷଦ ସଭାପତି ପଦ ପାଇଁ ନାମାଙ୍କନ ପତ୍ର ଦାଖଲ କରି ନିଦ୍ୱର୍ର୍ନ୍ଦ୍ୱରେ ନିର୍ବାଚିତ ହୋଇଛନ୍ତି। ସରସ୍ବତୀ ଗୁଣପୁର ସରକାରୀ ମହାବିଦ୍ୟାଳୟରୁ ବିଜ୍ଞାନରେ ସ୍ନାତକ ଡିଗ୍ରୀ ହାସଲ
କରିଛନ୍ତି। ରାଜନୀତିରେ ପୂର୍ବରୁ ଅଭିଜ୍ଞତା ନ ଥିଲା। ବାପା ପବିତ୍ର ମାଝି ଦୀର୍ଘଦିନ ଧରି ବିଜେଡିରେ ଜଣେ ସକ୍ରିୟ କର୍ମୀ ଥିବାରୁ ରାଜନୀତି ପ୍ରତି ଆଗ୍ରହ ଥିଲା। ରାୟଗଡ଼ା ଏକ ଆଦିବାସୀ ଅଧ୍ୟୁଷିତ ଜିଲା। ଚଳିତ ନିର୍ବାଚନରେ ଜିଲା ପରିଷଦ ସଭାପତି ଆସନଟି ଅନୁସୂଚିତ ଜନଜାତି ମହିଳାଙ୍କ ପାଇଁ ସଂରକ୍ଷିତ ଥିଲା। ସରସ୍ବତୀଙ୍କୁ ଏହି ଆସନ ପାଇଁ ଯୋଗ୍ୟ ପ୍ରାର୍ଥୀ ଭାବେ ଦଳ ପକ୍ଷରୁ ସର୍ବସମ୍ମତି କ୍ରମେ ଚୟନ କରାଯାଇଥିଲା।
ଏତେ କମ୍ ବୟସରେ ଲୋଙ୍କ ମନ ଜିଣିବାରେ କିପରି ସଫଳ ହେଲେ ବୋଲି ଏକ ପ୍ରଶ୍ନର ଉତ୍ତରରେ ସରସ୍ବତୀ କହିଛନ୍ତି ଯେ, ଜଣେ ଶିକ୍ଷିତା ଯୁବତୀ ହୋଇଥିବାରୁ ଜିଲାରେ ଶିକ୍ଷା, ସ୍ବାସ୍ଥ୍ୟ କ୍ଷେତ୍ରରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ସହ ବିକାଶ କରିବାରେ ସଫଳ ହେବେ ବୋଲି ଲୋକଙ୍କ ମନରେ ବିଶ୍ୱାସ ରହିଛି। ତେଣୁ ଜିଲା ପରିଷଦ ନିର୍ବାଚନରେ ସେମାନେ ବିଜୟୀ କରାଇଛନ୍ତି । ଅଞ୍ଚଳବାସୀଙ୍କ ସେବା କରିବା ପାଇଁ ରାଜନୀତିକୁ ଆସିଛି। ବିଶେଷକରି କାଶୀପୁର ଅଞ୍ଚଳରେ ଅନେକ ସମସ୍ୟା ରହିଛି। ଗ୍ରାମାଞ୍ଚଳରେ ରାସ୍ତା ଓ ପାନୀୟ ଜଳର ସୁବିଧା ପ୍ରତି ଧ୍ୟାନ ଦେବି। ସ୍କୁଲ ଗୃହ ଓ ଅଙ୍ଗନଓ୍ବାଡି କେନ୍ଦ୍ର ରହିଥିଲେ ମଧ୍ୟ ତାହା ଠିକ୍ରେ ପରିଚାଳନା ହେଉନାହିଁ। ଏସବୁର ଉପଯୁକ୍ତ ପରିଚାଳନା ଉପରେ ଗୁରୁତ୍ୱ ଦେବି ବୋଲି ସରସ୍ବତୀ କହିଛନ୍ତି।
