ଡର୍ବାନ୍,୯।୧୧: ଭାରତୀୟ ଉଇକେଟ୍ କିପର- ବ୍ୟାଟ୍ସମ୍ୟାନ୍ ସଞ୍ଜୁ ସାମସନଙ୍କ ବିସ୍ଫୋରକ ଯୋଗୁ ଟିମ ଇଣ୍ଡିଆ ପ୍ରଥମ ଟି-୨୦ରେ ଦକ୍ଷିଣ ଆଫ୍ରିକାକୁ ୬୧ ରନ୍ରେ ପରାସ୍ତ କରିଛି। ଚାରି ମ୍ୟାଚ ବିଶିଷ୍ଟ ଟି-୨୦ ସିରିଜର ପ୍ରଥମ ମ୍ୟାଚରେ ଟିମ ଇଣ୍ଡିଆ ପ୍ରଥମେ ଖେଳି ୮ ଉଇକେଟ ହରାଇ ୨୦୨ ରନ ସଂଗ୍ରହ କରିଥିଲା। ଏହାର ଜବାବରେ ଆୟୋଜକ ଦକ୍ଷିଣ ଆଫ୍ରିକା ୧୪୧ ରନରେ ଅଲଆଉଟ୍ ହୋଇଯାଇଥିଲା ସଞ୍ଜୁ ସାମସନ ଭାରତର ବିଜୟର ହିରୋ ଥିଲେ। ସାମସନ ମାତ୍ର ୫୦ ବଲରେ ୧୦୭ ରନର ଏକ ଇନିଂସ ଖେଳି ୫ଟି ବଡ ରେକର୍ଡ ସୃଷ୍ଟି କରିଥିଲେ।
– ଦକ୍ଷିଣ ଆଫ୍ରିକା ବିପକ୍ଷରେ ଶତକ ହାସଲ କରିଥିବା ପ୍ରଥମ ଭାରତୀୟ ଉଇକେଟ କିପର
ସଞ୍ଜୁ ସାମସନ ମାତ୍ର ୫୦ ବଲରେ ୧୦୭ ରନର ଇନିଂସ ଖେଳିଥିଲେ। ତାଙ୍କ ବ୍ୟାଟରୁ ୭ ଚୌକା ଓ ୧୦ ଛକା ଆସିଥିଲା। ଏହା ସହ ସାମସନ ପ୍ରଥମ ଭାରତୀୟ ଉଇକେଟ କିପର ହୋଇପାରିଛନ୍ତି, ଯିଏ ଦକ୍ଷିଣ ଆଫ୍ରିକା ବିପକ୍ଷରେ ଟି -୨୦ରେ ଶତକ ହାସଲ କରିଛି।
-ଅନ୍ତର୍ଜାତୀୟ ଟି-୨୦ରେ ଦ୍ରୁତତମ ଶତକ
ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟି-୨୦ରେ ସଞ୍ଜୁ ସାମସନ ମାତ୍ର ୪୭ ବଲରେ ଶତକ ହାସଲ କରିଥିଲେ। ଏହା ସହ ସେ ଅନ୍ତର୍ଜାତୀୟ ଟି-୨୦ରେ ଦକ୍ଷିଣ ଆଫ୍ରିକା ବିପକ୍ଷରେ ଦ୍ରୁତତମ ଶତକ ହାସଲ କରିବାକୁ ଭାରତୀୟ ବ୍ୟାଟ୍ସମ୍ୟାନ ହୋଇଛନ୍ତି। ସାମସନ ସୂର୍ଯ୍ୟକୁମାର ଯାଦବଙ୍କ ରେକର୍ଡ ଭାଙ୍ଗିଛନ୍ତି।
– ଟି-୨୦ର ଗୋଟିଏ ଇନିଂସରେ ସର୍ବାଧିକ ଛକା
ସଞ୍ଜୁ ସାମସନ ତାଙ୍କ ଶକ୍ତିଶାଳୀ ଇନିଂସ ସମୟରେ ମୋଟ ୧୦ ଛକା ମାରିଥିଲେ। ଏହା ସହ ସେ ଟି-୨୦ ଅନ୍ତର୍ଜାତୀୟ ମ୍ୟାଚରେ ମିଳିତ ସର୍ବାଧିକ ଛକା ମାରିଥିବା ଭାରତୀୟ ବ୍ୟାଟ୍ସମ୍ୟାନ ହୋଇଛନ୍ତି। ଏହାପୂର୍ବରୁ କେବଳ ରୋହିତ ଶର୍ମା ଟି-୨୦ ମ୍ୟାଚରେ ଭାରତ ପାଇଁ ୧୦ ଛକା ମାରିଥିଲେ।
-ଗୋଟିଏ ଅନ୍ତର୍ଜାତୀୟ ଟି-୨୦ରେ ସର୍ବାଧିକ ରନ୍
ସାମସନଙ୍କ ନାମରେ ଆଉ ଏକ ଅନନ୍ୟ ରେକର୍ଡ କରାଯାଇଛି। ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ଟି-୨୦ ମ୍ୟାଚରେ ସାମସନ ବର୍ତ୍ତମାନ ସର୍ବାଧିକ ରନ ସ୍କୋରର ହୋଇଛନ୍ତି। ସେ ଡେଭିଡ ମିଲରଙ୍କ ରେକର୍ଡ ଭାଙ୍ଗିଛନ୍ତି।
– କ୍ରମାଗତ ଦୁଇ ଶତକ ସ୍କୋର କରିବାରେ ପ୍ରଥମ ଭାରତୀୟ
ସଞ୍ଜୁ ସାମସନ ଦକ୍ଷିଣ ଆଫ୍ରିକା ବିପକ୍ଷରେ ବ୍ୟାଟିଂ କରି ତାଙ୍କ ନାମରେ ଏକ ବଡ଼ ରେକର୍ଡ ସୃଷ୍ଟି କରିଛନ୍ତି। ରୋହିତ ଶର୍ମା ଏବଂ ବିରାଟ କୋହଲିଙ୍କ ଭଳି ଖେଳାଳି ମଧ୍ୟ ଏହା କରିପାରି ନ ଥିଲେ। ସାମସନ ପ୍ରଥମ ଭାରତୀୟ ଭାବେ କ୍ରମାଗତ ଦୁଇଟି ଅନ୍ତର୍ଜାତୀୟ ଟି-୨୦ରେ ଶତକ ହାସଲ କରିଛନ୍ତି।
