ନୟାଗଡ଼ ଅଫିସ,୫।୫: ଦୈନିକ ଧରିତ୍ରୀରେ ପ୍ରକାଶ ପାଉଥିବା କାର୍ଟୁନ ଦିନକୁ ଦିନ ଲୋକପ୍ରିୟ ହେବାରେ ଲାଗିଛି। ସାମ୍ପ୍ରତିକ ପରିସ୍ଥିତିକୁ ନେଇ କାର୍ଟୁନିଷ୍ଟ ଉତ୍କଳ ଗୌରବଙ୍କ ପ୍ରତି କାର୍ଟୁନ ବିଭିନ୍ନ ମହଲରେ ସଚେତନତା ସୃଷ୍ଟି କରିଚାଲିଛି। ଗତ ୯ ବର୍ଷ ହେଲା ସେହି କାର୍ଟୁନ୍ ପ୍ରେମରେ ପଡିଛନ୍ତି ନୟାଗଡ଼ ଜିଲା ନୂଆଗାଁ ବ୍ଲକ୍ ଦୁର୍ଦ୍ଦୁରା ଗାଁର ସଞ୍ଜୟ କୁମାର ସାହୁ। ପ୍ରତିଦିନ ଧରିତ୍ରୀରେ ପ୍ରକାଶ ପାଉଥିବା କାର୍ଟୁନକୁ ସେ କାଟି ଅତି ଆଦରର ସହ ଖାତାରେ ଅଠା ଦେଇ ସାଇତି ରଖୁଛନ୍ତି। ଇତିମଧ୍ୟରେ ସଞ୍ଜୟଙ୍କ ୭ଟି ଖାତା ପୂର୍ଣ୍ଣ ହୋଇ୍ସାରିଛି। ସେ ବର୍ତ୍ତମାନ ସୁଦ୍ଧା ୨୫୭୫ କାର୍ଟୁନ ସଂଗ୍ରହ କରିସାରିଛନ୍ତି। ଏହି କାର୍ଟୁନ ସଂଗ୍ରହ କରି ୱାଲର୍ଡ ରେଡ୍କ୍ରସରେ ରେକର୍ଡ କରିବା ପାଇଁ ସେ ପ୍ରୟାସ ଜାରି ରଖିଛନ୍ତି।
ସଞ୍ଜୟ ଜଣେ ସଂଗ୍ରାହକ ଓ ପରିବେଶବିତ୍ ଭାବେ ଜଣାଶୁଣା। ପିଲାଟି ଦିନରୁ ବିଭିନ୍ନ ସାମଗ୍ରୀ ସଂଗ୍ରହ କରି ସେ ଗଢ଼ିଛନ୍ତି ଶ୍ରୀଜଗନ୍ନାଥ ସଂଗ୍ରହାଳୟ। ନିଜ ସଂଗ୍ରହାଳୟରେ ସେ ରଖିଛନ୍ତି ବହୁ ପୁରାତନ ତାଳପତ୍ର ପୋଥି, ବିଭିନ୍ନ କିସମର ଧାନ, ଦିଆସିଲି ଖୋଳ, ପାଞ୍ଜି, କ୍ୟାଲେଣ୍ଡର ପରି ଅନେକ ଦୁର୍ଲ୍ଲଭ ସାମଗ୍ରୀ। ସେଦିନ ଥିଲା ୨୦୧୩ ନଭେମ୍ବର ୭ ତାରିଖ ଧରିତ୍ରୀରେ ପ୍ରକାଶ ପାଇଥିଲା ଆଳୁର ଦରବୃଦ୍ଧିକୁ ନେଇ ଏକ କାର୍ଟୁନ। ସେହି କାର୍ଟୁନକୁ ଦେଖି ନୟାଗଡ଼ ଧରିତ୍ରୀ ଅଫିସକୁ ଆସିଥିଲେ ସଞ୍ଜୟ। ସେଦିନର କାର୍ଟୁନ ସହିତ ପିଲାଙ୍କ ଧରିତ୍ରୀରେ ପ୍ରକାଶ ପାଇଥିବା ଚଗଲା ଭୀମୁ କାର୍ଟୁନ ସେ ସଂଗ୍ରହ କରିଥିଲେ। ପ୍ରଥମ କାର୍ଟୁନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଲକ୍ଷ୍ୟ କରି କହୁଛନ୍ତି, ଏ ୩୦ ଟଙ୍କିଆ ଆଳୁ ପ୍ରବଳ ଖଟା ଲାଗୁଛି। ଟିକିଏ ପାଟିରେ ବାଜିଲେ ମୁହଁକୁ ବଙ୍କେଇ ଦେଉଛି। ଏହାର ପ୍ରତ୍ୟୁତ୍ତରରେ ମମତା କହୁଛନ୍ତି, ଆଉ ୨ରୁ ୪ ଦିନ ଚଳାଉ ଥାଅ, ୧୪ ଟଙ୍କିଆ ଆଳୁ ପଠଉଚି। ସେହିଭଳି ଚଗଲା ଭୀମୁରେ ଟ୍ରାଫିକ୍ ପୋଲିସ ସମ୍ପର୍କରେ କାର୍ଟୁନ ସେ ସଂଗ୍ରହ କରିଥିଲେ। ସେହିଦିନଠାରୁ ସେ ପ୍ରତ୍ୟହ ଧରିତ୍ରୀ କିଣି କାର୍ଟୁନକୁ କାଟି ଖାତାରେ ଅଠା ଦେଇ ସାଇତି ରଖିଆସୁଛନ୍ତି। ଯଦି କୌଣସି ଦିନ ଧରିତ୍ରୀ ତାଙ୍କ ଘରକୁ ନ ଆସେ ସେ ବ୍ୟସ୍ତ ହୋଇପଡ଼ନ୍ତି। ହକରଙ୍କୁ ଫୋନ୍ କରି ଧରିତ୍ରୀ ଦେବାକୁ ଅନୁରୋଧ କରନ୍ତି। ଆବଶ୍ୟକ ପଡ଼ିଲେ ସେ ବଜାରକୁ ଯାଇ ଧରିତ୍ରୀ କିଣି ଆଣିଥାନ୍ତି।
ଏବେ ସଞ୍ଜୟଙ୍କ ୭ଟି ଖାତାରେ ଉତ୍କଳ ଗୌରବଙ୍କ ୨୫୭୦ କାର୍ଟୁନ ଅଛି। ସଂଗୃହୀତ କାର୍ଟୁନକୁ ସଞ୍ଜୟ ଲାଇବ୍ରେରିରେ ସାଇତି ରଖିଛନ୍ତି। ତାଙ୍କ ସଂଗ୍ରହାଳୟକୁ ଅନେକ ଲୋକ ଆସିଥାନ୍ତି। ସେମାନଙ୍କ ମଧ୍ୟରୁ ବହୁ ପାଠକ ଧରିତ୍ରୀ କାର୍ଟୁନକୁ ଦେଖି ତା’ ଉପରେ ଆଲୋଚନା କରନ୍ତି ବୋଲି ସଞ୍ଜୟ କୁହନ୍ତି। ଛାତ୍ରୀଛାତ୍ରଙ୍କ ଧରିତ୍ରୀ କାର୍ଟୁନ ବେଶି ପସନ୍ଦ ବୋଲି ସେ ମତ ଦିଅନ୍ତି। ତେବେ ସଞ୍ଜୟଙ୍କୁ ଏହି କାମରେ ତାଙ୍କ ବୋଉ ଓ ସ୍ତ୍ରୀ ସହଯୋଗ କରନ୍ତି। କାର୍ଟୁନରୁ ଅଳ୍ପ ଶବ୍ଦରେ ଅନେକ କିଛି ଶିକ୍ଷା ମିଳିଥାଏ, ଯାହା ଅନ୍ୟ କେଉଁଠି ମିଳି ନ ଥାଏ ବୋଲି ସଞ୍ଜୟ କୁହନ୍ତି।
