ନୂଆଦିଲ୍ଲୀ,୩।୪: ରାଜ୍ୟ ସଭାରେ ୱକଫ ବିଲ ଉପରେ ଶିବସେନା ୟୁବିଟି ଏମପି ସଞ୍ଜୟ ରାଉତ ଭାଜପା ଏବଂ କେନ୍ଦ୍ର ସରକାରଙ୍କୁ କଡ଼ା ଟାର୍ଗେଟ କରିଥିଲେ। ସେ କହିଛନ୍ତି ଯେ କେନ୍ଦ୍ର ସରକାର ପ୍ରକୃତ ପ୍ରସଙ୍ଗରୁ ଧ୍ୟାନ ହଟାଇବା ପାଇଁ ଏହି ବିଲ ଆଣିଛନ୍ତି। ଯେଉଁମାନେ ମୁସଲମାନମାନଙ୍କୁ ଚୋର କୁହନ୍ତି ସେମାନେ କେବେଠାରୁ ସେମାନଙ୍କ ବିଷୟରେ ଚିନ୍ତା କରିବା ଆରମ୍ଭ କଲେ ବୋଲି ସେ ପ୍ରଶ୍ନ କରିଛନ୍ତି।
ରାଜ୍ୟ ସଭାରେ ୱକଫ (ସଂଶୋଧନ) ବିଲ ୨୦୨୪ ଉପରେ ଭାଷଣ ଦେଇ ଶିବସେନା ୟୁବିଟି ନେତା ସଞ୍ଜୟ ରାଉତ କହିଛନ୍ତି, ‘ମୁଁ ଦେଖୁଛି ଯେ ଉଭୟ ଗୃହରେ ଲୋକମାନେ ହଠାତ ଗରିବ ମୁସଲମାନମାନଙ୍କ ବିଷୟରେ ଚିନ୍ତା କରିବା ଆରମ୍ଭ କରିଛନ୍ତି। ଏହା ଏତେ ହଠାତ ଘଟିଛି ଯେ ମୁଁ, ହିନ୍ଦୁ ଏବଂ ମୁସଲମାନ ସମସ୍ତେ ଭୟଭୀତ। ମୁଁ କେନ୍ଦ୍ରମନ୍ତ୍ରୀ କିରେନ ରିଜିଜୁଙ୍କୁ ଶୁଣିଲି। ଏପରିକି ବାରିଷ୍ଟର ଜିନ୍ନା ମଧ୍ୟ ମୁସଲମାନମାନଙ୍କ ବିଷୟରେ ଏତେ ଚିନ୍ତା କରୁ ନଥିଲେ। ଏହା ଦେଖାଯାଉଛି ଯେ ତାଙ୍କ ଆତ୍ମା ଆପଣଙ୍କ ଶରୀରରେ ପ୍ରବେଶ କରିଛି।’
ସେ ଆହୁରି କହିଛନ୍ତି, ‘ମୁଁ ପୂର୍ବରୁ ଭାବୁଥିଲି ଯେ ଆମେ ଏକ ହିନ୍ଦୁ ରାଷ୍ଟ୍ର ଗଢ଼ିବାକୁ ଯାଉଛୁ, କିନ୍ତୁ ଏବେ ଏସବୁ ଦେଖିବା ପରେ ମୋତେ ଲାଗୁଛି ଯେ ଆପଣ ଏହାକୁ ହିନ୍ଦୁତ୍ୱର ଏକ ନୂତନ ପାକିସ୍ତାନ କରିବାକୁ ଯୋଜନା କରୁଛନ୍ତି। ଏହି ବିଲ୍ ଲୋକଙ୍କ ଧ୍ୟାନ ହଟାଇବା ପାଇଁ ଏକ ଯୋଜନା। ଗତକାଲି ଟ୍ରମ୍ପ ଭାରତ ଉପରେ ୨୬ ପ୍ରତିଶତ ପାରସ୍ପରିକ ଶୁଳ୍କ ଲାଗୁ କରିଥିଲେ ଏବଂ ସେହି ଦିନ ଆପଣ ଏହି ବିଲ୍ ଆଣିଥିଲେ, ଆଲୋଚନା ଏହି ଶୁଳ୍କ ଉପରେ ହେବା ଉଚିତ ଥିଲା, କିନ୍ତୁ କେନ୍ଦ୍ର ସରକାର ଏହି ପ୍ରସଙ୍ଗରୁ ଧ୍ୟାନ ହଟାଇବା ପାଇଁ ଏହି ବିଲ୍ ଆଣିଛନ୍ତି। ଯେତେବେଳେ ଆର୍ଥିକ ପ୍ରସଙ୍ଗ ଉପରେ ଆଲୋଚନା ହେବା ଉଚିତ ଥିଲା, ସେତେବେଳେ ଧାର୍ମିକ ପ୍ରସଙ୍ଗ ଉପରେ ଆଲୋଚନା ହେଉଛି।’
ତୁମେମାନେ (ଭାଜପା) ମୁସଲମାନମାନଙ୍କ କଲ୍ୟାଣ ବିଷୟରେ କହୁଛ। ତୁମେ କେବେଠାରୁ ସେମାନଙ୍କ ବିଷୟରେ ଚିନ୍ତା କରିବା ଆରମ୍ଭ କଲ ବୋଲି ସେ ପ୍ରଶ୍ନ କରିଛନ୍ତି। ତୁମେମାନେ ହିଁ ମୁସଲମାନମାନଙ୍କୁ ଚୋର, ଆତଙ୍କବାଦୀ କହୁଛ, ମହାରାଷ୍ଟ୍ରରେ ମୁସଲମାନ ଦୋକାନରୁ ମାଂସ ନ କିଣିବା ବିଷୟରେ କହୁଛ ଏବଂ ଏବେ ତୁମେ ମୁସଲମାନମାନଙ୍କ ଭୂମି ବିଷୟରେ ଚିନ୍ତିତ।
ସଞ୍ଜୟ ରାଉତ ଆହୁରି କହିଛନ୍ତି, ‘ସ୍ବରାଷ୍ଟ୍ରମନ୍ତ୍ରୀ ଗତକାଲି କହିଥିଲେ ଯେ ଆମେ ୨୦୨୫ପୂର୍ବରୁ ନିର୍ମିତ ମସଜିଦ, ଦରଗାହ ଏବଂ ମଦ୍ରାସାଗୁଡ଼ିକୁ ଛୁଇଁବୁ ନାହିଁ କିନ୍ତୁ ମୁସଲିମ ମହିଳାଙ୍କ କଲ୍ୟାଣ ପାଇଁ ଖାଲି ଜମି ବିକ୍ରି କରିବୁ, ଶେଷରେ ଆପଣ (କେନ୍ଦ୍ର ସରକାର) କିଣାବିକା କରିବାକୁ ଆସିଛନ୍ତି ବୋଲି ସଞ୍ଜୟ କହିଛନ୍ତି।
