ମୁମ୍ବାଇ,୨୭ ।୩: ମହାରାଷ୍ଟ ରାଜନୀତିରେ ଭାରତୀୟ ଜନତା ପାର୍ଟି(ଭାଜପା) ଓ ଶିବସେନା ମୁହାଁମୁହିଁ ହୋଇଛନ୍ତି । ଶିବସେନା ନେତା ସଞ୍ଜୟ ରାଉତ ପୁଣିଥରେ ଭାଜପାକୁ ଟାର୍ଗେଟ କରିଛନ୍ତି । ସେ କହିଛନ୍ତି ମେହେବୁବା ମୁଫତିଙ୍କ ଦଳ ସହ ଭାଜପାର ଭଲ ସମ୍ପର୍କ ରହିଛି । ଉଭୟ ଭଲ ବନ୍ଧୁ । ତାଙ୍କ ଦଳସହ ମିଶି ଭାଜପା ସରକାର ଗଠନ କରିଥିଲା । ତାଙ୍କ ଦଳ ସବୁବେଳେ ପାକିସ୍ତାନର ସମର୍ଥକ ରହି ଆସିଛି । ଏହାପରେ ବି ଭାଜପା ସେହି ଦଳ ସହ ମିଶି ସରକାର ଗଠନ କରିଥିଲା । ଏବେ ମେହେବୁବା ଯାହା କହୁଛନ୍ତି ସେଥିପାଇଁ ଭାଜପା ଦାୟୀ ବୋଲି ସଞ୍ଜୟ କହିଛନ୍ତି ।
ସଞ୍ଜୟଙ୍କ ବୟାନକୁ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶଙ୍କ ବୟାନ ସହ ଯୋଡା ଯାଇଛି । ଯେଉଁଥିରେ ଫଡନବିଶ ହିନ୍ଦୁତ୍ୱକୁ ନେଇ ଶିବସେନାକୁ ପ୍ରଶ୍ନ କରିଥିଲେ । ଫଡନବିଶ କହିଥିଲେ ଏବେ ଗେରୁଆର ଦାୟିତ୍ୱ କେବଳ ଭାଜପାର । ଆମେ ଦେଖିବୁ ଅନ୍ୟମାନେ କ’ଣ କରୁଛନ୍ତି । ଶିବସେନାର ହିନ୍ଦୁତ୍ୱ ପୂର୍ବଭଳି ନାହିଁ । ଶିବସେନାର ହିନ୍ଦୁତ୍ୱ ଏବେ କୁଟିଳ ହିନ୍ଦୁତ୍ୱ ହୋଇଯାଇଛି, ସେ ଆମକୁ ହିନ୍ଦୁତ୍ୱ ନ ଶିଖାଉ ।
