ହାଇଦ୍ରାବାଦ, ୬ା୩ (ପି.ଟି.): ଭାରତୀୟ ଟେନିସ କିମ୍ବଦନ୍ତୀ ସାନିଆ ମିର୍ଜା ରବିବାର ତାଙ୍କ କ୍ୟାରିୟରର ଅନ୍ତିମ ମ୍ୟାଚ ରବିବାର ଖେଳିଛନ୍ତ, ଯେଉଁଠାରେ ସେ ଆରମ୍ଭ କରିଥିଲେ। ସ୍ଥାନୀୟ ଲାଲବାହାଦୁର ଷ୍ଟାଡିୟମରେ ସେ ରୋହନ ବୋପାନ୍ନା, ଯୁବରାଜ ସିଂ ଓ ତାଙ୍କ ବାନ୍ଧାବୀ ବେଥାନି ମାଟେକ୍-ସାଣ୍ଡ୍ସ, ଇଭାନ୍ ଡୋଗିଗ୍, କାରା ବ୍ଲାକ୍ ଓ ମାରିଅନ ବାର୍ତ୍ତୋଲିଙ୍କୁ ନେଇ ପ୍ରଦର୍ଶନୀ ମ୍ୟାଚ ଖେଳିଥିଲେ।
ଏଥିସହ ସେ ତାଙ୍କ କ୍ୟାରିୟରକୁ ଗୁଡ୍ବାଏ କରିଥିଲେ। ପ୍ରାୟ ଦୁଇ ଦଶନ୍ଧି ପୂର୍ବେ ସେ ଏଠାରେ ଏକ ଐତିହାସିକ ଡବ୍ଲ୍ୟୁଟିଏ ଟାଇଟଲ ସଫଳତା ହାସଲ କରିଥିଲେ। ମ୍ୟାଚ ଖେଳିସାରିବା ପରେ ସାନିଆଙ୍କ ଆଖିରେ ଆନନ୍ଦାଶ୍ରୁ ଦେଖିବାକୁ ମିଳିଥିଲା।
ପ୍ରଦର୍ଶନୀ ମ୍ୟାଚ ଦେଖିବା ଲାଗି ଆସିଥିବା ମାନ୍ୟଗଣ୍ୟ ବ୍ୟକ୍ତିବିଶେଷଙ୍କ ମଧ୍ୟରେ ରହିଥିଲେ, କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁ, ଭାରତ କ୍ରିକେଟ ଟିମ୍ର ପୂର୍ବତନ ଅଧିନାୟକ ମହମ୍ମଦ ଆଝାରୁଦ୍ଦିନ, ଯୁବରାଜ ସିଂ ରବିନ ଉଥାପ୍ପା, ଅନନ୍ୟା ବିର୍ଲା, ହୁମା କୁରେଶୀ ଦୁଲକେର ସଲମନ, ତାଙ୍କ ପ୍ରଶଂସକ, ବନ୍ଧୁ ପରିଜନ, କ୍ରୀଡ଼ା ବ୍ୟକ୍ତିତ୍ୱ ଏବଂ ସାନିଆ ମିର୍ଜା ଟେନିସ ଏକାଡେମୀର ଛାତ୍ରୀଛାତ୍ର। ଏହି ଅବସରରେ ୬ଥର ଗ୍ରାଣ୍ଡସ୍ଲାମ ବିଜେତା (୩ଥର ମହିଳା ଡବଲ୍ସ ଓ ୩ଥର ମିକ୍ସଡ ଡବଲ୍ସ) ତାଙ୍କ ବିଦାୟୀ ଭାଷଣ ଦେବାବେଳେ ଭାବ ପ୍ରବଣ ହୋଇ ପଡ଼ିଥିଲେ। ଦେଶ ପାଇଁ ଦୀର୍ଘ ୨୦ ବର୍ଷ ଧରି ଖେଳିବା ତାଙ୍କ ପାଇଁ ସବୁଠାରୁ ବଡ଼ ସମ୍ମାନ ବୋଲି କହିଥିଲେ।
