ନୂଆଦିଲ୍ଲୀ,୧୮।୪: ସମଲିଙ୍ଗୀ ବିବାହର ଆଇନଗତ ସ୍ବୀକୃତି ଦାବିର ଆବେଦନ ଉପରେ ସୁପ୍ରିମକୋର୍ଟରେ ଶୁଣାଣି ଆରମ୍ଭ ହୋଇଛି। ମୁଖ୍ୟ ବିଚାରପତି ଡି ଓ୍ବାଇ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଏହି ବେଞ୍ଚ ଆବେଦନଗୁଡ଼ିକର ଶୁଣାଣି କରୁଛି। ଶୁଣାଣି ସମୟରେ ବରିଷ୍ଠ ଓକିଲ କପିଲ ସିବଲ କହିଛନ୍ତି ଯେ, ଏହି ପ୍ରସଙ୍ଗରେ ସରକାରଙ୍କ ପକ୍ଷ ମଧ୍ୟ ଶୁଣାଯାଉ। ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟରେ ସରକାରଙ୍କ ପକ୍ଷ ନେଇ କହିଛନ୍ତି, କେନ୍ଦ୍ର ଏହି ମାମଲା ସୁପ୍ରିମକୋର୍ଟରେ ବିଚାର ନ କରାଯାଉ ବୋଲି ଆପତ୍ତିି ଉଠାଇଛିି। କେନ୍ଦ୍ର କହିଛି ସମଲିଙ୍ଗୀ ବିବାହ ଉପରେ ସଂସଦକୁ ନିଷ୍ପତ୍ତି ନେବାକୁ ଦିଆଯାଉ। ତେବେ ଏ ନେଇ ମୁଖ୍ୟ ବିଚାରପତି ଡି ଓ୍ବାଇ ଚନ୍ଦ୍ରଚୂଡ କହିଛନ୍ତି, ଆମେ ଏ ଶୁଣାଣିର ଦାୟିତ୍ୱରେ ଅଛୁ। ତେଣୁ କେଉଁ ମାମଲାର ଶୁଣାଣି କରିବୁ ଏବଂ କିପରି ଭାବେ କରିବୁ ତାହା ଆମେ ସ୍ଥିର କରିବୁ। ଶୁଣାଣି କରିବୁ କି ନାହିଁ, ଏ ନେଇ ଆମକୁ ଜଣାଇବାକୁ କାହାକୁ ଅନୁମତି ଦେଇ ନାହଁୁ।
ଜଣେ ଆବେଦନକାରୀ ତାଙ୍କ ପିଟିଶନରେ କହିଛନ୍ତି କି, ସମଲିଙ୍ଗୀଙ୍କ ମଧ୍ୟରେ ଏକତା ପାଇଁ ଏହି ବିବାହକୁ ସ୍ବୀକୃତି ମିଳିବା ଆବଶ୍ୟକ। ଏଥିସହିତ ଅନ୍ୟ ଜଣେ ଆବେଦନକାରୀ ତାଙ୍କ ପିଟିଶନରେ କହିଛନ୍ତି ଯେ, ସମଲିଙ୍ଗୀଙ୍କୁ ତାଙ୍କ ଅଧିକାର ପାଇବାରେ ଅସୁବିଧାର ସମ୍ମୁଖୀନ ହେବାକୁ ପଡୁଛି। ସେମାନଙ୍କ ବିବାହକୁ ଆଇନଗତ ସ୍ବୀକୃତି ମିଳିଲେ ଏହିି ସମସ୍ୟା ଦୂର ହୋଇଯିବ।
ଶୁଣାଣି ସମୟରେ ଖଣ୍ଡପୀଠ କହିଛନ୍ତି, ନବତେଜ ମାମଲା ପରଠାରୁ ସମାଜରେ ସମଲିଙ୍ଗୀ ସମ୍ପର୍କକୁ ବହୁ ସ୍ବୀକୃତି ମିଳିଛିି ଏବଂ ଏହା ଆମ ପାଇଁ ବଡ଼ ସଫଳତା। ଆଗାମୀ ଭବିଷ୍ୟତ ପାଇଁ ଏହିଭଳି ପ୍ରସଙ୍ଗକୁ ସ୍ବୀକୃତି ମିଳିବା ଆବଶ୍ୟକ ବୋଲି ଖଣ୍ଡପୀଠ କହିଛନ୍ତି।
