ନୂଆଦିଲ୍ଲୀ,୩୦।୩: ଭାରତ ବିପକ୍ଷ ନିର୍ଣ୍ଣାୟକ ଦିନିକିଆରେ ଇଂଲଣ୍ଡର ଯୁବ ଅଲରାଉଣ୍ଡର ସାମ କୁରାନ ଉଲ୍ଲେଖନୀୟ ବ୍ୟାଟିଂ କରିଥିଲେ। ଦଳ ପକ୍ଷରୁ ୮ମ ଖେଳାଳି ଭାବେ ସେ ପଡ଼ିଆକୁ ଓହ୍ଲାଇଥିଲେ। ନିଜର ପାଳିରେ ସେ ୮୩ ବଲ୍ରେ ୯ ଚୌକା ଏବଂ ୩ ଛକା ସହ ୯୫ରନ୍ କରିଥିଲେ। ଇଂଲଣ୍ଡ ଟିମ୍ ଉକ୍ତ ମ୍ୟାଚ୍ ୭ରନ୍ରେ ହାରିଥିଲେ ହେଁ ଅନେକଙ୍କ ହୃଦୟ ଜିତିଥିଲେ ସାମ୍। ତାଙ୍କ ଯୋଗୁ ଭାରତ ପରାଜିତ ହୋଇପାରେ ବୋଲି ଆଶଙ୍କା କରାଯାଉଥିଲା। ହେଲେ ଶେଷ ଓଭରରେ ଭାରତୀୟ ଦ୍ରୁତ ବୋଲର ଟି. ନଟରାଜନ ତାହା କରାଇଦେଇ ନ ଥିଲେ। ଏହାକୁ ନେଇ ନଟରାଜନଙ୍କ ପ୍ରଶଂସା କରିଛନ୍ତି ସାମ୍।
ଇଂଲଣ୍ଡକୁ ଜିତିବା ଲାଗି ଶେଷ ଓଭରରେ ୧୪ରନ୍ର ଆବଶ୍ୟକତା ଥିଲା। ସେତେବେଳେ ମଇଦାନରେ ସାମ ଏବଂ ମାର୍କ ଉଡ ଥିଲେ। ଚାପ ସତ୍ତ୍ୱେ ନଟରାଜନଙ୍କୁ ବୋଲିଂ କରିବାକୁ କହିଥିଲେ କୋହଲି। ସେ ମଧ୍ୟ ଅଧିନାୟକଙ୍କୁ ନିରାଶ ନ କରି ଓଭରର ପ୍ରଥମ ବଲ୍ରେ ଉଡଙ୍କ ଉଇକେଟ ନେଇଥିଲେ। ପରେ ସେ ଦ୍ୱିତୀୟ ବଲ୍ରେ ୧ ରନ୍, ତୃତୀୟ-ଚତୁର୍ଥରେ ୦ ରନ୍, ପଞ୍ଚମରେ ଚୌକା, ଷଷ୍ଠରେ କୌଣସି ରନ୍ ନ ଦେବା ଯୋଗୁ ଭାରତ ସିରିଜ ଜିତି ଯାଇଥିଲା। ମ୍ୟାଚ୍ ପରେ ସାମ କରନ୍ କହିଥିଲେ, ଆମେ ସିରିଜ ଜିତି ପାରିଲୁ ନାହିଁ। ହେଲେ ନିଜର ପ୍ରଦର୍ଶନକୁ ନେଇ ମୁଁ ବେଶ ଖୁସି ଅଛି। ଜିତିବା ମୋତେ ପସନ୍ଦ। ହେଲେ ଏହା ଏକ ଭଲ ଅନୁଭବ ଥିଲା। ଦୀର୍ଘ ସମୟ ଧରି ଦଳ ପାଇଁ ଏଭଳି ଖେଳି ନ ଥିଲି। ଏହାସତ୍ତ୍ୱେ ଆମେ ପରାଜିତ ହେଲୁ। ଶେଷ ଓଭରରେ ନଟରାଜନ ଭଲ ବୋଲିଂ କରି ନିଜେ କ’ଣ ପାଇଁ ଶ୍ରେଷ୍ଠ ତାହା ଜଣାଇଥିବା ସେ କହିଛନ୍ତି। ଏହାଛଡ଼ା ପୁଣେର କ୍ରିକେଟ ପଡ଼ିଆ ଖେଳ ପାଇଁ ବେଶ୍ ଭଲ। ଭାରତର ବ୍ୟାଟିଂ ଅର୍ଡର ଭଲ ଥିଲା। କିଛି ସପ୍ତାହ ପରେ ଏହି ପରିସ୍ଥିତିରେ ଆଇପିଏଲ୍ ଖେଳିବାର ସୁଯୋଗ ମିଳିବ ବୋଲି ସେ କହିଛନ୍ତି।
