ବମ୍ବେ: ବଲିଉଡ୍ର ତିନି ଖାନ୍ଙ୍କ ମଧ୍ୟରୁ ସଲମାନ୍ଙ୍କ ଲୋକପ୍ରିୟତା କାହିଁରେ କେତେ। ଏଯାଏ କୁଆଁରା ଥିବା ଏହି ଅଭିନେତାଙ୍କ ପୁରୁଷ ଅପେକ୍ଷା ମହିଳା ପ୍ରଶଂସକଙ୍କ ତାଲିକା ବେଶ ଲମ୍ବା। ଏଥିଲାଗି ତାଙ୍କର ଟିକିଏ ଝଲକ ପାଇବାକୁ ସେ ରହୁଥିବା ଗାଲାକ୍ସି ଆପାର୍ଟମେଣ୍ଟ ବାହାରେ ଭିଡ ଜମେ। ଅଭିନେତା ମଧ୍ୟ ଅନେକ ସମୟରେ ଘରର ବାଲକୋନୀକୁ ଆସି ପ୍ରଶଂସକଙ୍କୁ ହାତ ହଲାଇ ଅଭିବାଦନ କରନ୍ତି। ହେଲେ ଏପ୍ରିଲ ୧୪ରେ ଘର ଉପରେ ହୋଇଥିବା ଗୁଳିମାଡ଼ ଘଟଣା ଅନେକଙ୍କୁ ଚମକାଇଥିଲା। ଏବେ ପୋଲିସ ମାମଲାର ତଦନ୍ତ କରୁଥିବା ବେଳେ ସଲମାନ ସୁରକ୍ଷା ଦୃଷ୍ଟିରୁ ଘର ଛାଡ଼ି ଅନ୍ୟତ୍ର ରହିବେ ବୋଲି ଶୁଣିବାକୁ ମିଳୁଥିଲା। ଏହାକୁ ନେଇ ବଡ଼ ଖବର ସାମ୍ନାକୁ ଆସିଛି।
ଭାଇ ଅରବାଜ୍ ଏକ ସାକ୍ଷାତକାରରେ ସଲମାନଙ୍କୁ ନେଇ ଅନେକ କିଛି କହିଛନ୍ତି। ଘର ବଦଳାଇବା ସମସ୍ୟାର ସମାଧାନ ନୁହେଁ। ଯଦି ଏପରି ହୋଇଥାନ୍ତା ସେ ଲୋକମାନେ ପୂର୍ବରୁ ତାହା କରିପାରିଥାନ୍ତେ। ବାପା ସଲିମ ଦୀର୍ଘ ବର୍ଷ ଧରି ସେଠାରେ ଅଛନ୍ତି। ସଲମାନ ବି ସେଠାରେ ରହି ଆସିଛନ୍ତି। ସେ ତାଙ୍କ ଘର। ଏମିତିରେ କେବଳ ସାବଧାନତାର ସହ ରହି ହେବ। ସରକାରଙ୍କ ପକ୍ଷରୁ ସୁରକ୍ଷା ଯୋଗାଇ ଦିଆଯାଉଛି। ଏଣୁ ପୂର୍ବ ଭଳି ରହିବାକୁ ଚେଷ୍ଟା କରିବାକୁ ହେବ। କାରଣ ଡରି ଡରି ରହିଲେ କ’ଣ ହେବ। ଘରୁ ବାହାରକୁ ବାହାରି ହେବ ନାହିଁ ବୋଲି ଅରବାଜ କହିଛନ୍ତି। ଅରବାଜଙ୍କ କଥାରୁ ସଲମାନ ଘର ଛାଡ଼ିବେ ନାହିଁ ବୋଲି ସ୍ପଷ୍ଟ ହୋଇଛି।
ଅଭିନୟ ଦେଖିଲେ ସଲମାନ ୨୦୨୩ ଶେଷ ଆଡ଼କୁ ରିଲିଜ ହୋଇଥିବା ଫିଲ୍ମ ‘ଟାଇଗର ୩’ରେ ନଜର ଆସିଥିଲେ। ଆଗାମୀ ଦିନରେ ତାଙ୍କ ଚଳଚ୍ଚିତ୍ର ‘ସିକନ୍ଦର’ ରିଲିଜ ହେବ। ୨୦୨୫ ଇଦ୍ରେ ଏହା ପରଦାକୁ ଆସିବ। ମେ’ରୁ ଫିଲ୍ମର ଶୁଟିଂ ଆରମ୍ଭ ହେବ।
