ଛତ୍ରପୁର,୯।୧୨(ଡି.ଏନ୍.ଏ.): ଗଞ୍ଜାମ ଜିଲାର ବିଭିନ୍ନ ପୌରନିଗମ ଓ ଏନ୍ଏସିରେ ପରିମଳ କାମରେ ନିୟୋଜିତ ଶତାଧିକ ସ୍ବଚ୍ଛସାଥୀ ଓ ସୁପରଭାଇଜରଙ୍କ ଦରମା ବୃଦ୍ଧି, ଚାକିରିକୁ ନିୟମିତ କରିବା, ନିଯୁକ୍ତି ପତ୍ର ପ୍ରଦାନ ଆଦି ଦାବି ନେଇ ଜିଲାପାଳଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି।
ଜିଲା ସ୍ବଚ୍ଛସାଥୀ ଓ ସୁପରଭାଇଜର ସଂଘ ପକ୍ଷରୁ ପୂର୍ବାହ୍ନରେ ସ୍ଥାନୀୟ ପୁରୁଣା ବସଷ୍ଟାଣ୍ଡଠାରୁ ଏକ ଶୋଭାଯାତ୍ରା ବାହାରି ଜିଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲା। ସେଠାରେ ଜିଲା ସଭାପତି ସଂଯୁକ୍ତା ଦାସଙ୍କ ନେତୃତ୍ୱରେ ଏକ ସଭା ହୋଇଥିଲା। ଏଥିରେ ଓଡ଼ିଶା ଆଉଟସୋର୍ସିଂ ମହାସଂଘର ରାଜ୍ୟ ନେତା ପ୍ରତାପ ଚନ୍ଦ୍ର ପ୍ରଧାନ, ଆଉଟସୋର୍ସିଂ ମେଡ଼ିକାଲ କର୍ମଚାରୀ ନେତା ସି.ଏଚ୍ ସୁନୀଲ ପାତ୍ର, ରାଜଲକ୍ଷ୍ମୀ ସାହୁ, ବିନାୟକ ପତି, ଓଡିଶା ଆଦର୍ଶ ବିଦ୍ୟାଳୟ କର୍ମଚାରୀ ସଂଘ ସଭାପତି ପ୍ରଶାନ୍ତ ପରିଚ୍ଛା ପ୍ରମୁଖ ଯୋଗ ଦେଇ ସରକାର ସ୍ବଚ୍ଛ ସାଥି ଓ ସୁପରଭାଇଜରମାନଙ୍କୁ କମ ଦରମାରେ ଖଟେଇବା ଓ ସର୍ବନିମ୍ନ ଅଧିକାରରୁ ବଞ୍ଚିତ କରିବାକୁ ନିନ୍ଦା କରିଥିଲେ। ଏହି କର୍ମଚାରୀଙ୍କୁ କୌଣସି ଛୁଟି ଦିଆଯାଉନି ଓ ଦୈନିକ ଦଶରୁ ବାର ଘଣ୍ଟା କାମ କରିବାକୁ ବାଧ୍ୟ କରାଯାଉଛି। ସରକାର ବଜାର ଦରକୁ ଦେଖି ତୁରନ୍ତ ସେମାନଙ୍କ ଦରମା ବୃଦ୍ଧି ଓ ଚାକିରିକୁ ନିୟମିତ ନ କଲେ ରାଜ୍ୟ ସାରା ସ୍ବଚ୍ଛ ସାଥି ଓ ସୁପରଭାଇଜରମାନେ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦିଆଯାଇଛି। ସଭାପତି ସଂଯୁକ୍ତା ଦାସ, ସମ୍ପାଦିକା ସୁଦୋଷ୍ଣା ନାୟକଙ୍କ ନେତୃତ୍ୱରେ ୮ଦଫା ଦାବି ସମ୍ବଳିତ ସ୍ମାରକପତ୍ର ଜିଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳଙ୍କୁ ପ୍ରଦାନ କରାଯାଇଛି।
