ମୁମ୍ବାଇ,୨୬।୪: ମହାରାଷ୍ଟ୍ରର ଏକନାଥ ଶିନ୍ଦେ ସରକାରଙ୍କୁ ନେଇ କିଛିଦିନ ହେବ ଚର୍ଚ୍ଚା ଯୋର ଧରିଛି। ଇତିମଧ୍ୟରେ ଶିବାସନା(ୟୁବିଟି) ଏକ ବଡ ଦାବି କରିଛି। ଶିବସେନା (ୟୁବିଟି) ଦାବି କରିଛି କି ଭାରତୀୟ ଜନତା ପାର୍ଟି(ଭାଜପା) ହାଇକମାଣ୍ଡ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କୁ ଇସ୍ତଫା ପତ୍ର ପ୍ରସ୍ତୁତ କରି ରଖିବାକୁ କହିଛନ୍ତି। ମୁଖପତ୍ର ’ସାମନା’ରେ ପ୍ରକାଶିତ ଏକ ସ୍ତମ୍ଭରେ କୁହାଯାଇଛି କି ଏଥିପାଇଁ ଶିନ୍ଦେ ଭାଜପା ଉପରେ ଅସନ୍ତୁଷ୍ଟ ଅଛନ୍ତି। ଆଉ ଶିନ୍ଦେ ରାଗିଯାଇ ଗାଁକୁ ପଳାଇ ଯାଇଥିବା ବେଳେ ସେଠାରେ ସେ ୩ ଦିନ ଛୁଟି କାଟିବେ ବୋଲି କୁହାଯାଉଛି।
ସାମନାରେ ଉଲ୍ଲେଖ କରାଯାଇଛି ମହାରାଷ୍ଟ୍ରରେ ରାଜନୈତିକ ହଲଚଲ ମଧ୍ୟରେ ଏନସିପି ନେତା ଅଜିତ ପାଓ୍ବାର କେତେଜଣ ବିଧାୟକଙ୍କ ସହ ଭାଜପାକୁ ସମର୍ଥନ ଦେବେ, ଏମିତି ଚର୍ଚ୍ଚା ଆରମ୍ଭ ହୋଇଛି। ହେଲେ ମିଡିଆ ସାମ୍ନାରେ ଅଜିତ ପାଓ୍ବାର ସ୍ପଷ୍ଟ କରିଥିଲେ କି ମୁଁ ସବୁବେଳ ଏନସିପିରେ ରହିବି ଓ ଶରଦ ପାଓ୍ବାରଙ୍କ ମାର୍ଗଦର୍ଶନରେ କାମ କରିବି। ଏସବୁ ଭିତରେ ଶିନ୍ଦେଙ୍କୁ ମୁଖ୍ୟମନ୍ତ୍ରୀ ଆସନରୁ ହଟାଇବାକୁ ନେଇ ଦିଲ୍ଲୀରେ ଚର୍ଚ୍ଚା ହେଉଥିଲା। ଏଭଳି ପରିସ୍ଥିତିରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ୩ ଦିନ ପାଇଁ ଗାଁକୁ ଚାଲି ଯାଇଛନ୍ତି।
