ନୂଆଦିଲ୍ଲୀ,୧୨।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦିଲ୍ଲୀ-ଆଜମେର ବନ୍ଦେ ଭାରତ ଏକ୍ସପ୍ରେସକୁ ସବୁଜ ପତାକା ଦେଖାଇବା ସମୟରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ କଥା ଉଠାଇଛନ୍ତି। ସେ ଗେହଲୋଟଙ୍କୁ ତାଙ୍କର ପ୍ରିୟ ମିତ୍ର ବୋଲି କହିବା ସହ କହିଥିଲେ ଆପଣଙ୍କ ଦୁଇ ହାତରେ ଲଡୁ ଅଛି।
ଏହି ସମୟରେ ମୋଦି ଗେହଲୋଟଙ୍କୁ କାର୍ଯ୍ୟକ୍ରମ ସମୟରେ କୁହନ୍ତି, ଆପଣ ଏବେ ରାଜ୍ୟରେ ରାଜନୈତିକ ସଙ୍କଟ ଦେଇ ଗତି କରୁଛନ୍ତି। ଏହାପରେ ବି ଆପଣ ବିକାଶ ପାଇଁ ଏହି କାର୍ଯ୍ୟକ୍ରମରେ ଭାଗ ନେଇଛନ୍ତି, ସେଥିପାଇଁ ମୁଁ ଆପଣଙ୍କୁ ଧନ୍ୟବାଦ ଜଣାଉଛି। ମୋଦି ଆହୁରି ମଧ୍ୟ କହିଛନ୍ତି, ମୁଁ ଗେହଲୋଟଙ୍କୁ କହିବାକୁ ଚାହୁଁଛି, ଆପଣଙ୍କର ତ ଦୁଇିହାତରେ ଲଡୁ ରହିଛି। ଆପଣଙ୍କ ରେଳମନ୍ତ୍ରୀ ରାଜସ୍ଥାନର ଓ ରେଲଓ୍ବେ ବୋଲର୍ଡର ଚେୟାରମ୍ୟାନ ବି ରାଜସ୍ଥାନର।
ମୋଦି ଆହୁରି ମଧ୍ୟ କହିଛନ୍ତି, ଯେଉଁ କାମ ଦେଶ ସ୍ବାଧୀନ ହେବା ପରେ ପରେ ହେବା କଥା ସେ କାମ ଆଜି ଆମେ କରୁଛୁ। ମୋଦି ମୁଖ୍ୟମନ୍ତ୍ରୀ ଗେହଲୋଟଙ୍କୁ କହିଛନ୍ତି, ଆପଣଙ୍କର ମୋ ଉପରେ ଏତେ ଭରସା ଯେ ଆପଣ ମୋ ସାମ୍ନାରେ କିଛି କାମ ରଖିଦେଇଛନ୍ତି। ଆପଣଙ୍କର ସେହି ବିଶ୍ୱାସ ଏହା ମୋର ବନ୍ଧୁତାର ଶକ୍ତି ଓ ଜଣେ ବନ୍ଧୁ ଭାବେ ଆପଣ ଯେଉଁ ଭରସା ରଖିଛନ୍ତି, ସେଥିପାଇଁ ମୁଁ ଆପଣଙ୍କ ପାଖରେ କୃତଜ୍ଞତା ଜଣାଉଛି।
ମୋଦିଙ୍କ ଏହି ବୟାନକୁ ଏଇଥିପାଇଁ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି, କାରଣ ରାଜସ୍ଥାନରେ ଏବେ କଂଗ୍ରେସ ଦଳ ରାଜନୈତିକ ଟଣାଭିଡା ମଧ୍ୟରେ ଚାଲିଛି। ସେଠାରେ କଂଗ୍ରେସର ପୂର୍ବତନ ପ୍ରଦେଶ ଅଧ୍ୟକ୍ଷ ଓ ପୂର୍ବତନ ଉପ ମୁଖ୍ୟମନ୍ତ୍ରୀ ସଚ୍ଚିନ ପାଇଲଟ ଗୋଟିଏ ଦିନ ପୂର୍ବରୁ ନିଜ ଦଳର ସରକାରଙ୍କ ବିରୋଧରେ ଉପବାସରେ ବସିଥିଲେ।
