ମସ୍କୋ/କିଭ୍, ୨୭ା୧୦: ୟୁକ୍ରେନ୍ ଉପରେ ରୁଷିଆ ୮ ମାସ ଧରି ଆକ୍ରମଣ ଜାରି ରଖିଥିବାବେଳେ କିଭ୍ ରେଡିଓଆକ୍ଟିଭ୍ ବିକିରଣ ପାଇଁ ‘ଡାର୍ଟି ବମ୍’ ବ୍ୟବହାର କରିପାରେ ବୋଲି ମସ୍କୋ ଅଭିଯୋଗ ଆଣିଛି। ଏହି ପ୍ରସଙ୍ଗକୁ ରୁଷିଆ ମଙ୍ଗଳବାର ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)ରେ ଉଠାଇଛି। ୟୁକ୍ରେନ୍ ସୈନ୍ୟ ରୁଷିଆ ଦଖଲରୁ ଖେରସୋନ୍କୁ ମୁକ୍ତ କରିବା ପାଇଁ ଲଢ଼େଇ ଜାରି ରଖିଥିବାବେଳେ ସେଠାରେ ଥିବା କେତେକ ଅଞ୍ଚଳକୁ ମସ୍କୋ କବଳରୁ ଛଡ଼ାଇନେଇଥିବା ଦାବି ମଧ୍ୟ କରିଛି। ଖେରସୋନ୍ ସହରକୁ ରୁଷିଆର ଅଂଶ ବୋଲି କହି ୟୁକ୍ରେନ୍ ସେଠାରେ କ୍ଷତିକାରକ ଗ୍ୟାସ୍ ପ୍ରୟୋଗ କରିବା ପାଇଁ ଯୋଜନା କରୁଥିବା କ୍ରେମ୍ଲିନ ଅଭିଯୋଗ କରିଛି। ଜାତିସଂଘ ମୁଖ୍ୟ ଆଣ୍ଟୋନିଓ ଗୁଟେରସ୍ଙ୍କୁ ଲେଖିଥିବା ଚିଠିରେ ଜାତିସଂଘରେ ଥିବା ରୁଷିଆ ରାଷ୍ଟ୍ରଦୂତ ଭାସିଲି ନେବେଞ୍ଜିଆ କହିଛନ୍ତି, କିଭ୍ ‘ଡାର୍ଟି ବମ୍’ ବ୍ୟବହାର କଲେ ତାହାକୁ ମସ୍କୋ ନ୍ୟୁକ୍ଲିୟର ଆତଙ୍କବାଦ ବୋଲି ବିଚାର କରିବ। ଅପରପକ୍ଷେ ଖେରସୋନ୍ରେ ଥିବା ଜନସାଧାରଣ ତୁରନ୍ତ ସେହି ସ୍ଥାନ ଛାଡ଼ିବାକୁ ରୁଷିଆ କହିଛି।
ଏହି ଅଭିଯୋଗକୁ ୟୁକ୍ରେନ୍ ଖଣ୍ଡନ କରିଛି।
ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କହିଛନ୍ତି, ଯଦି ରୁଷିଆ କହୁଛି ଆମେ ଏପରି କରିବାକୁ ଯୋଜନା କରିଛୁ, ତେବେ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଏହାର ନକ୍ସା ପ୍ରସ୍ତୁତ କରିସାରିଛନ୍ତି। ୟୁକ୍ରେନ୍ରେ ଏପରି ବିସ୍ଫୋରଣ କରି ନିରୀହ ଲୋକଙ୍କ ଜୀବନକୁ ବିପଦରେ ପକାଇବାକୁ ରୁଷିଆ ପ୍ଲାନ୍ କରିଛି। ନିଜେ ‘ଡାର୍ଟି ବମ୍’ କିମ୍ବା ଅନ୍ୟ କୌଣସି ବିପଜ୍ଜନକ ଆକ୍ରମଣ କରି ମସ୍କୋ କିଭ୍ ଉପରେ ଦୋଷ ଲଦିଦେବାକୁ ଚାହୁଁଛି। ଏହାର ମସ୍କୋର ଫଲ୍ସ ଫ୍ଲାଗ୍ ଆଟାକ୍ ଯୋଜନା। ବିଶ୍ୱ ତୁରନ୍ତ ରୁଷିଆକୁ ଏପରି କରିବାରୁ ରୋକିବା ସହ କଠୋର କାର୍ଯ୍ୟାନୁଷ୍ଠାନ ନେଉ ବୋଲି ଜେଲେନ୍ସ୍କି ନିବେଦନ କରିଛନ୍ତି। ୟୁକ୍ରେନ୍ ପୂର୍ବରୁ ଆଣବିକ ଅସ୍ତ୍ର ବିସ୍ତାର ନ କରିବା ପାଇଁ ଚୁକ୍ତିବଦ୍ଧ। ଏଥିସହ କିଭ୍ ପାଖରେ କୌଣସି ‘ଡାର୍ଟି ବମ୍’ ନାହିଁ କିମ୍ବା କାହାଠାରୁ ଆଣିବା ଯୋଜନା ମଧ୍ୟ ହୋଇନାହିଁ। ତେଣୁ ରୁଷିଆ ନିଜେ ଏପରି କରି ୟୁକେନ୍ରେ ରେଡିଓଆକ୍ଟିଭ୍ ବିକିରଣ କରିବାକୁ ଯାଉଛି ବୋଲି ୟୁକ୍ରେନ୍ ବହିର୍ବ୍ୟାପାର ମନ୍ତ୍ରୀ ଡିମିଟ୍ରୋ କୁଲେବା କହିଛନ୍ତି। ସେହିପରି କିଭ୍ର ସହଯୋଗୀ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ମଧ୍ୟ ରୁଷିଆର ଏହି ଅଭିଯୋଗ ସତ ନୁହେଁ ବୋଲି କହିଛନ୍ତି। ୟୁକ୍ରେନ୍ ଉପରେ ଆକ୍ରମଣ ଯଥାର୍ଥ ବୋଲି ଦର୍ଶାଇବାକୁ ରୁଷିଆ ଏପରି କରୁଥିବା ସେମାନେ କହିଛନ୍ତି।
ଡାର୍ଟି ବମ୍ କ’ଣ
ରେଡିଓଆକ୍ଟିଭ୍ ସାମଗ୍ରୀ ଯଥା ୟୁରାନିୟମ ଓ ଅନ୍ୟ ବିସ୍ଫୋରକକୁ ନେଇ ‘ଡାର୍ଟି ବମ୍’ ପ୍ରସ୍ତୁତ କରାଯାଇଥାଏ। ଆଣବିକ ବୋମା ଭଳି ଏଥିରେ ଅଧିକ ରିଫାଇନ୍ଡ ରେଡିଓଆକ୍ଟିଭ୍ ମ୍ୟାଟେରିଆଲ ରହିବା ଆବଶ୍ୟକ ପଡ଼ି ନ ଥାଏ। ହସ୍ପିଟାଲ, ନ୍ୟୁକ୍ଲିୟର ପାଓ୍ବାର ଷ୍ଟେଶନ କିମ୍ବା ରିସର୍ଚ୍ଚ ଲାବରେଟୋରିରୁ ଏହାକୁ ସଂଗ୍ରହ କରାଯାଇ ଡାର୍ଟି ବମ୍ରେ ବ୍ୟବହାର କରାଯାଇପାରିବ। ନ୍ୟୁକ୍ଲିୟର ଅସ୍ତ୍ର ଅପେକ୍ଷା ଏହାକୁ ପ୍ରସ୍ତୁତ କରିବା ସହଜ ଏବଂ କମ୍ ବ୍ୟୟବହୁଳ। କୌଣସି ଗାଡ଼ିର ପଛରେ ଏହାକୁ ପରିବହନ କରାଯାଇପାରିବ। ଡାର୍ଟି ବମ୍ ବିସ୍ଫୋରଣ ଦ୍ୱାରା ଏଥିରୁ ନିର୍ଗତ ବିଷାକ୍ତ ରେଡିଓଆକ୍ଟିଭ୍ ଗ୍ୟାସ୍ ଦ୍ୱାରା ଗମ୍ଭୀର ସ୍ବାସ୍ଥ୍ୟ ସମସ୍ୟା ଉପୁଜିପାରେ। ବିକିରଣ ସଂସ୍ପର୍ଶରେ ଆସୁଥିବା ବ୍ୟକ୍ତିଙ୍କୁ କ୍ୟାନ୍ସର ଭଳି ରୋଗ ମଧ୍ୟ ହୋଇପାରେ। ଡାର୍ଟି ବମ୍୍ରେ ଡିନାମାଇଟ୍ ଭଳି ପାରମ୍ପରିକ ବିସ୍ଫୋରକ ବ୍ୟବହାର କରାଯାଏ। ତେବେ ଏହା ଅଣୁଅସ୍ତ୍ର ପରି ଘାତକ ନୁହେଁ।
ଅଦ୍ୟାବଧି କୌଣସି ରାଷ୍ଟ୍ର ଡାର୍ଟିବମ୍୍ର ସଫଳ ପ୍ରୟୋଗ କରିନାହାନ୍ତି।
ବାଲିଷ୍ଟିକ୍ ମିଶାଇଲ ଲଞ୍ଚ୍ କଲେ ପୁଟିନ
ୟୁକ୍ରେନ୍ରେ ଆଣବିକ ଯୁଦ୍ଧ ଆଶଙ୍କା ଭିତରେ ରୁଷିଆର ନ୍ୟୁକ୍ଲିୟର ଫୋର୍ସ ବୁଧବାର ବାଲିଷ୍ଟିକ୍ ମିଶାଇଲ ଉତ୍କ୍ଷେପଣ ଅଭ୍ୟାସ କରିଛି। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ ଏହି ମିଶାଇଲ୍ ଲଞ୍ଚ୍ ପ୍ରାକ୍ଟିସ୍ର ତଦାରଖ କରିଛନ୍ତି। ଦେଶ ଉପରେ କୌଣସି ଆଣବିକ ବିପଦ ଆସିଲେ ତାହାର ଜବାବ ଦେବା ପାଇଁ ଏହି ଅଭ୍ୟାସ କରାଯାଇଥିବା ରୁଷିଆ ପ୍ରତିରକ୍ଷା ମନ୍ତ୍ରୀ ସେରେଗି ଶୋଇଗୁ କହିଛନ୍ତି। ଅଭ୍ୟାସବେଳେ ଟିୟୁ-୯୫ ଷ୍ଟ୍ରାଟେଜିକ୍ ବମ୍ବର କ୍ରୁଜ୍ ମିଶାଇଲ ଲଞ୍ଚ କରିବା ସହ ଏହା ଟାର୍ଗେଟକୁ ସଫଳତାର ସହ ମାଡ଼ କରିଥିବା କ୍ରେମଲିନ ପକ୍ଷରୁ କୁହାଯାଇଛି। ଉତ୍ତରପଶ୍ଚିମ ୟୁରୋପରେ ଆସନ୍ତା ୩୦ ତାରିଖ ପର୍ଯ୍ୟନ୍ତ ନାଟୋର ବାର୍ଷିକ ନ୍ୟୁକ୍ଲିୟର ଡ୍ରିଲ ‘ଷ୍ଟିଡ୍ଫାଷ୍ଟ ନୁନ୍’ ଚାଲିବାକୁ ଥିବାବେଳେ ରୁଷିଆ ଏହି ସମରାଭ୍ୟାସ ଆରମ୍ଭ କରିଛି। ୟୁକ୍ରେନ୍ ବିରୋଧରେ ଅଣୁଅସ୍ତ୍ର ବ୍ୟବହାର କଲେ ତାହା ରୁଷିଆର ସବୁଠୁ ବଡ଼ ଭୁଲ ହେବ। ଏହାର ପରିଣତି ଭୟଙ୍କର ହେବ ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ୍ ଚେତାବନୀ ଦେଇଛନ୍ତି।
