କିଭ୍, ୨୨ା୮: ସୋଭିଏଟ୍ ସଂଘଠାରୁ ଅଲଗା ହୋଇଥିବା ୟୁକ୍ରେନ୍ ଆସନ୍ତା ୨୪ ତାରିଖରେ ଏହାର ସ୍ବାଧୀନତା ଦିବସ ପାଳନ କରିବ। ପ୍ରାୟ ୬ ମାସ ଧରି ରୁଷିଆ ଆକ୍ରମଣର ମୁକାବିଲା କରୁଥିବା ଏହି ପୂର୍ବ ୟୁରୋପୀୟ ଦେଶର ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ୩୧ତମ ସ୍ବାଧୀନତା ଦିବସ ଉପଲକ୍ଷେ ଲୋକଙ୍କୁ ଅଧିକ ସତର୍କ ରହିବାକୁ ଅପିଲ୍ କରିଛନ୍ତି। ଏହି ଦିନ ରୁଷିଆ ବଡ଼ ଧରଣର ଆକ୍ରମଣ କରିପାରେ ବୋଲି ସେ କହିଛନ୍ତି।
ମସ୍କୋ ନିୟନ୍ତ୍ରଣରେ ଥିବା କ୍ରିମିଆ ଉପଦ୍ୱୀପରେ ନିକଟରେ ହୋଇଥିବା ବିସ୍ଫୋରଣ, ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ଅତି ନିକଟତମ ସହଯୋଗୀ ଆଲେକ୍ଜାଣ୍ଡର ଡଗିନ୍ଙ୍କ ଝିଅ ଏକ କାର୍ ବିସ୍ଫୋରଣରେ ନିହତ ହେବା ଘଟଣାର ରାଗ ଶୁଝାଇବା ପାଇଁ ୟୁକ୍ରେନ୍ ଉପରେ ଭୟଙ୍କର ଆକ୍ରମଣ ନିର୍ଦ୍ଦେଶ ଦେଇପାରନ୍ତି ବୋଲି ଆଶଙ୍କା କରାଯାଇଛି। ତେବେ ଏଥିରେ ୟୁକ୍ରେନ୍ର କୌଣସି ସମ୍ପୃକ୍ତି ନ ଥିବା କିଭ୍ କହିଛି। ୟୁକ୍ରେନ୍ବାସୀଙ୍କୁ ଟାର୍ଗେଟ କରି ସେମାନଙ୍କୁ ଭୟଭୀତ କରିବା ନିମନ୍ତେ ମସ୍କୋର ଏହି ଯୋଜନାକୁ ସଫଳ ହେବାକୁ ଦିଆଯିବ ନାହିଁ ବୋଲି ଜେଲେନ୍ସ୍କି ଦେଶବାସୀଙ୍କୁ ସମ୍ବୋଧିତ କରି କହିଛନ୍ତି।
ସୀମା ନିକଟରେ ରୁଷିଆ ବହୁ ମାତ୍ରାରେ ଅସ୍ତ୍ରଶସ୍ତ୍ର ଏବଂ ମିଶାଇଲ ଠୁଳ କରୁଥିବା କିଭ୍ର ଏକ ଏନ୍ଜିଓ ସେଣ୍ଟର ଫର୍ ଷ୍ଟ୍ରାଟେଜିକ୍ କମ୍ୟୁନିକେଶନ (ଷ୍ଟ୍ରାଟ୍କମ୍) ପୂର୍ବରୁ ସତର୍କ କରାଇଛି। ସୀମାରେ ଏସ୍-୩୦୦ କ୍ଷେପଣାସ୍ତ୍ର ମଧ୍ୟ ରହିଛି। ସ୍ବାଧୀନତା ଦିବସ ପୂର୍ବରୁ ରୁଷିଆରୁ କେତେକ ଟ୍ରେନ୍ ସେଠାକୁ ଆସିବାକୁ ଥିବା ଏବଂ ବହୁସଂଖ୍ୟାରେ ରୁଷୀୟ ସୈନ୍ୟ ଆକ୍ରମଣ ପାଇଁ ପ୍ରସ୍ତୁତ ହେଉଥିବା କିଭ୍ ପୋଷ୍ଟରେ ପ୍ରକାଶିତ ରିପୋର୍ଟରେ କୁହାଯାଇଛି। ରୁଷିଆ ଏବେ ପୂର୍ବ ୟୁକ୍ରେନ୍କୁ ଦଖଲ କରିବାକୁ ଧ୍ୟାନ କେନ୍ଦ୍ରୀଭୂତ କରିଥିବାବେଳେ କିଭ୍ କ୍ରିମିଆକୁ ଫେରାଇଆଣିବାକୁ ରଣନୀତି ପ୍ରସ୍ତୁତ କରୁଥିବା କୁହାଯାଉଛି।
ନିକଟରେ କ୍ରିମିଆ ଉପରେ ସିରିଜ୍ ବିସ୍ଫୋରଣ ନେଇ ଜେଲେନ୍ସ୍କି କହିଥିଲେ, ଏବେ କ୍ରିମିଆକୁ ସମସ୍ତେ ଅନୁଭବ କରିପାରୁଥିବେ। ଜୋରଜବରଦସ୍ତି କବ୍ଜା ଅସ୍ଥାୟୀ। ୟୁକ୍ରେନ୍ର ସେହି ଅଂଶ ଫେରୁଛି। ତେବେ ସ୍ବାଧୀନତା ଦିବସ ଅବସରରେ ରୁଷିଆର ଆକ୍ରମଣ ଆଶଙ୍କାକୁ ନେଇ ଚିନ୍ତା ଉପୁଜିଛି। ୟୁକ୍ରେନ୍ର ଦ୍ୱିତୀୟ ବୃହତ୍ତମ ସହର ଖର୍କିଭରେ ବୁଧବାର ପର୍ଯ୍ୟନ୍ତ କର୍ଫ୍ୟୁ ବଢ଼ାଯାଇଛି। ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଇଛି।
ସେପଟେ ଗତ ମାର୍ଚ୍ଚରୁ ରୁଷିଆ ନିୟନ୍ତ୍ରଣରେ ଥିବା ଜାପୋରିଜିଝିଆ ନ୍ୟୁକ୍ଲିଅର ପାଓ୍ବାର ପ୍ଲାଣ୍ଟ ନିକଟରେ ସେଲ୍ମାଡ଼କୁ ନେଇ ମସ୍କୋ ଏବଂ କିଭ୍ ପରସ୍ପର ଉପରେ ଦୋଷାରୋପ କରିଚାଲିଛନ୍ତି। ୟୁରୋପର ସର୍ବବୃହତ ପାଓ୍ବାର ପ୍ଲାଣ୍ଟର ସୁରକ୍ଷା ପାଇଁ ଜେଲେନ୍ସ୍କି ଜାତିସଂଘକୁ ନିବେଦନ କରିଥିବାବେଳେ ଗତ ସପ୍ତାହରେ ଜାତିଂସଘ ମହାସଚିବ ଆଣ୍ଟୋନିଓ ଗୁଟେରସ୍, ତୁର୍କୀ ରାଷ୍ଟ୍ରପତି ରେସେପ୍ ତୟିପ୍ ଏର୍ଡୋଗାନ୍ଙ୍କ ସହ ସେ ଆଲୋଚନା କରିଛନ୍ତି।
