ଓ୍ବାଶିଂଟନ/ମସ୍କୋ, ୧୩।୨ : ୟୁକ୍ରେନ ଏବଂ ରୁଷିଆ ମଧ୍ୟରେ ଚାଲିଥିବା ସଙ୍କଟ କମିବା ପରିବର୍ତ୍ତେ ବଢ଼ିବାରେ ଲାଗିଛି। ବିବାଦକୁ ଶାନ୍ତ କରିବା ପାଇଁ ଆମେରିକାର ରାଷ୍ଟ୍ରପତି ଜୋ ବାଇଡେନ ରୁଷିଆ ପ୍ରତିପକ୍ଷ ବ୍ଲାଡିିମୀର ପୁଟିନଙ୍କ ସହ ଫୋନରେ ୬୨ ମିନିଟ ଧରି କଥାବାର୍ତ୍ତା କରିଛନ୍ତି। ଆଲୋଚନା ସମୟରେ ବାଇଡେନ ପୁଟିନଙ୍କୁ ଯୁଦ୍ଧ ସ୍ଥଗିତ ରଖିବାକୁ ନିବେଦନ କରିଥିଲେ ଏବଂ ଯଦି ଯୁଦ୍ଧ ହୁଏ ତେବେ ରୁଷିଆକୁ ଏହାର ଉଚିତ ଉତ୍ତର ମିଳିବ ବୋଲି ଚେତାବନୀ ମଧ୍ୟ ଦେଇଛନ୍ତି।
କଥାବାର୍ତ୍ତାର କିଛି ସମୟ ପରେ ୟୁକ୍ରେନରେ ଥିବା ନିଜର ଦୂତାବାସକୁ ଖାଲି କରିବାକୁ ଆମେରିକା ନିର୍ଦ୍ଦେଶ ପଠାଇଛି। ପରିସ୍ଥିତିର ସ୍ଥିରତା ସମ୍ପର୍କରେ ଦୁଇ ବରିଷ୍ଠ ନେତାଙ୍କ ମଧ୍ୟରେ ଆଲୋଚନା ହୋଇ ପାରିନାହିଁ ବୋଲି ଆମେରିକା ସୁରକ୍ଷା ଅଧିକାରୀମାନେ କହିଛନ୍ତି।
ଖବର ଅନୁଯାୟୀ, ୬୨ ମିନିଟର ବାର୍ତ୍ତାଳାପରେ ବାଇଡେନ ପୁଟିନଙ୍କୁ କହିଛନ୍ତି ଯେ ଯଦି ରୁଷିଆ ୟୁକ୍ରେନ ଉପରେ ଆକ୍ରମଣ କରେ ତେବେ ଆମେରିକା ଏବଂ ଏହାର ସହଯୋଗୀ ଦେଶ ଏହାର ଉଚିତ ଉତ୍ତର ଦେବେ। ବାଇଡେନ କହିଛନ୍ତି ଯେ ଏହି ଯୁଦ୍ଧ ମଣିଷ ସମାଜକୁ ବହୁତ କ୍ଷତି ପହଞ୍ଚାଇବ, ତେଣୁ ରୁଷିଆ ଯୁଦ୍ଧ ବିଷୟରେ ଚିନ୍ତା କରିବା ଉଚିତ ନୁହେଁ। ଏଥି ସହିତ ଆମେରିକା ରୁଷିଆକୁ ଆଶ୍ୱାସନା ଦେଇଛି ଯେ ୟୁକ୍ରେନ ଉପରେ କୂଟନୈତିକ ଆଲୋଚନା ପାଇଁ ପ୍ରସ୍ତୁତ।
ତେବେ ରୁଷିଆର ଉତ୍ତରରେ ଆମେରିକା ସରକାର ସନ୍ତୁଷ୍ଟ ନୁହଁନ୍ତି। ବାଇଡେନ ଏବଂ ପୁଟିନଙ୍କ ଆଲୋଚନା ପରେ ଆମେରିକାର ପ୍ରତିରକ୍ଷା ମନ୍ତ୍ରଣାଳୟର ଜଣେ ଅଧିକାରୀ ଗଣମାଧ୍ୟମକୁ କହିଛନ୍ତି ଯେ ରୁଷିଆ ଆକ୍ରମଣ କରିବ କି ନାହିଁ ତାହା ଉପରେ କୌଣସି ନିଶ୍ଚିତତା ନାହିଁ। ଏଥି ସହିତ, ଆମେରିକାର ପ୍ରତିରକ୍ଷା ମନ୍ତ୍ରଣାଳୟ ୟୁକ୍ରେନରେ କାର୍ଯ୍ୟ କରୁଥିବା ୧୬୦ ସୈନ୍ୟ ଅଧିକାରୀଙ୍କୁ ଫେରାଇ ଆଣିବାକୁ ଯୋଜନା କରିଛି। ସେହିପରି ଅନ୍ୟ ୮୦ ସୈନ୍ୟ ଅଧିକାରୀଙ୍କୁ ଶୀଘ୍ର ଫେରିବାକୁ କୁହାଯାଇଛି।
ଏହି ଫୋନ କଲ ପରେ ରୁଷିଆ ସଂସଦର ଶୀର୍ଷ ବୈଦେଶିକ ନୀତି ପରାମର୍ଶଦାତା ୟୁରୀ ୟୁଶାକୋଭ କହିଛନ୍ତି ଯେ ଆମେରିକାର ସନ୍ଦେହ ଚରମ ସ୍ଥିତିରେ ପହଞ୍ଚିଛି। ସେ କହିଛନ୍ତି ଯେ ୟୁକ୍ରେନ ଉପରେ ରୁଷିଆର ଆକ୍ରମଣର ତାରିଖ ମଧ୍ୟ ଆମେରିକା ଘୋଷଣା କରିଛି। ଗଣମାଧ୍ୟମକୁ ଆମ ବିଷୟରେ ଭୁଲ ତଥ୍ୟ କାହିଁକି ଦିଆଗଲା ଆମେ ବୁଝି ପାରୁନାହୁଁ।
ୟୁଶାକୋଭ କହିଛନ୍ତି ଯେ ଆମେରିକା-ରୁଷିଆ ଫୋନ-କଲ ସୋମବାର ପାଇଁ ଯୋଜନା କରାଯାଇଥିଲା, କିନ୍ତୁ ଆମେରିକା ଏହାକୁ ଶନିବାର କରିବାକୁ ଅନୁରୋଧ କରିଥିଲା।
ଆମେରିକା ଏବଂ ବ୍ରିଟେନ ପରେ ଜର୍ମାନୀ ମଧ୍ୟ ଏହାର ନାଗରିକମାନଙ୍କୁ ଚେତାବନୀ ଦେଇଛି। ୟୁକ୍ରେନରେ ରହୁଥିବା ନାଗରିକମାନଙ୍କୁ ଶୀଘ୍ର ଫେରିବାକୁ ଜର୍ମାନ ବୈଦେଶିକ ବିଭାଗ ନିବେଦନ କରିଛି। ଏହା ସହିତ ଜର୍ମାନୀ ମଧ୍ୟ ଏହାର ଦୂତାବାସ ଅଧିକାରୀଙ୍କୁ ସ୍ବଦେଶ ଫେରିବାକୁ କହିଛି।
