ଓ୍ବାଶିଂଟନ୍/କ୍ୱିଭ୍, ୧୧ା୨:ୟୁକ୍ରେନ ସୀମା ନିକଟରେ ରୁଷିଆ ପୂୂର୍ବରୁ ଲକ୍ଷାଧିକ ସୈନ୍ୟ ମୁତୟନ କରି ଯୁଦ୍ଧ ସ୍ଥିତି ଉପୁଜାଇଥିବାବେଳେ ଏବେ ଉତ୍ତର ସୀମାକୁ ଆଉ ଲକ୍ଷେ ସୈନ୍ୟ ପଠାଇଥିବା ଆମେରିକା କହିଛି। ବେଲାରୁଷ୍କୁ ଲାଗିଥିବା ୟୁକ୍ରେନ ସୀମାଠାରେ ମସ୍କୋ ନିଜ ସ୍ଥିତି ମଜଭୁତ କରିବାରେ ଲାଗିଛି। ଏପରି କରି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ କ୍ରମାଗତ ଭାବେ ସେଠାରେ ଉତ୍ତେଜନା ବଢ଼ାଇବାରେ ଲାଗିଛନ୍ତି। କୌଣସି କୂଟନୈତିକ ରାସ୍ତା ଆପଣାଇ ୟୁକ୍ରେନ ସୀମା ନିକଟରୁ ସୈନ୍ୟ ପ୍ରତ୍ୟାହାର କରିବା ପରିବର୍ତ୍ତେ ପୁଟିନ ଉତ୍ତେଜନା ବୃଦ୍ଧି କରୁଛନ୍ତି। ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରଁ ଏହି ସପ୍ତାହରେ ପୁଟିନ୍ ଓ ୟୁକ୍ରେନ ପ୍ରତିପକ୍ଷ ଭୋଲୋଡିଭିର ଜେଲେନ୍ସ୍କିଙ୍କୁ ସାକ୍ଷାତ କରି ଦୁଇ ଦେଶ ମଧ୍ୟରେ ଶାନ୍ତି ସ୍ଥାପନ ନିମନ୍ତେ ଆଲୋଚନା କରିଥିଲେ। ଏ ବାବଦରେ ମାକ୍ରଁ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କୁ ବିବରଣୀ ଦେବା ପରେ ପେଣ୍ଟାଗନ୍ ପକ୍ଷରୁ ଏପରି ପ୍ର୍ରତିକ୍ରିୟା ପ୍ରକାଶ ପାଇଛି। ଅନ୍ୟପକ୍ଷରେ ରୁଷିଆ ଏବଂ ବେଲାରୁସ୍ ୧୦ ଦିନିଆ ଯୁଗ୍ମ ସମରାଭ୍ୟାସ ଚଳାଇଛନ୍ତି। ବେଲାରୁଷ୍ ରୁଷିଆର ନିକଟ ସହଯୋଗୀ ହୋଇଥିବାବେଳେ ୟୁକ୍ରେନ ସହ ଏହାର ଦୀର୍ଘ ସୀମା ଲାଗିଛି। ତେଣୁ ୟୁକ୍ରେନ ସମସ୍ୟା ବଢ଼ାଇବାକୁ ରୁଷିଆ ବେଲାରୁସ୍ ସୀମା ନିକଟରେ ସୈନ୍ୟଠୁଳ କରିବା ସହ ସେଠାରେ ସମରାଭ୍ୟାସ ଚଳାଇଛି। ଶୀତଳ ଯୁଦ୍ଧ ପରଠାରୁ ବେଲାରୁଷ୍ରେ ରୁଷିଆ ଏତେ ସଂଖ୍ୟାରେ ସୈନ୍ୟ ମୁତୟନ କରିବା ପ୍ରଥମ ବୋଲି ଫ୍ରାନ୍ସ କହିଛି। ମାନସିକ ସ୍ତରରେ ଚାପ ପକାଇବାକୁ କ୍ରେମେଲିନ ଏପରି କରୁଥିବା ୟୁକ୍ରେନ କହିଛି। ୟୁକ୍ରେନ ସପକ୍ଷରେ ଆମେରିକା ଓ ପାଶ୍ଚାତ୍ୟ ଦେଶଗୁଡ଼ିକ ବାହାରିଥିବାବେଳେ କ୍ୱିଭ୍କୁ ନିଜ ନିଜର ସୈନ୍ୟ ଏବଂ ଅସ୍ତ୍ରଶସ୍ତ୍ର ପଠାଇବା ଜାରି ରଖିଛନ୍ତି। ୟୁକ୍ରେନ ପ୍ରସଙ୍ଗ ଉପରେ କୌଣସି ବୁଝାମଣା ନ କରିବାକୁ ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନ୍ସନ୍ ଗୁରୁବାର କହିଛନ୍ତି।
