ଭୁବନେଶ୍ୱର, ୮ା୬(ବ୍ୟୁରୋ): ରାଜ୍ୟର ସହରାଞ୍ଚଳରେ ଗଢ଼ି ଉଠୁଛି ମାଳ ମାଳ ବହୁତଳ ଅଟ୍ଟାଳିକା। ସେଥିରୁ ଅଧିକାଂଶ ଆପାର୍ଟମେଣ୍ଟ ଆଇନକାନୁନକୁ ନ ମାନି ପରିବେଶ ପାଇଁ ଘାତକ ସାଜୁଛନ୍ତି। ଆପାର୍ଟମେଣ୍ଟରୁ ବାହାରୁଥିବା ବର୍ଜ୍ୟବସ୍ତୁ, ବର୍ଜ୍ୟଜଳ ଓ ପାଇଖାନା ପାଣି ବିପଜ୍ଜନକ ହେଉଛି। ବହୁତଳ ଅଟ୍ଟାଳିକା ପାଇଁ ଅନୁମତି ଦେଉଥିବା ଡେଭଲପମେଣ୍ଟ ଅଥରଟି (ଉନ୍ନୟନ କର୍ତ୍ତୃପକ୍ଷ), ପରିବେଶ ସୁରକ୍ଷା ଦାୟିତ୍ୱରେ ଥିବା ରାଜ୍ୟ କିମ୍ବା କେନ୍ଦ୍ରୀୟ ସଂସ୍ଥା ଏଥିପ୍ରତି ଧ୍ୟାନ ଦେଉନାହାନ୍ତି। ଫଳରେ ଆପାର୍ଟମେଣ୍ଟରୁ ବାହାରୁଥିବା ବର୍ଜ୍ୟଜଳ ଭୂତଳ ଜଳକୁ ମଧ୍ୟ ପ୍ରଭାବିତ କଲାଣି। ଗୃହ ନିର୍ମାଣ ପ୍ଲାନ୍ ଅନୁମୋଦନ ପୂର୍ବରୁ ବିଲ୍ଡିଂ ରେଗୁଲେଶନକୁ ଏଡ଼େଇ ଭିତିରିଆ ଅନୁମତି ଦିଆଯାଉଥିବା ଅନେକ ସମୟରେ ଅଭିଯୋଗ ହେଉଛିି। ତେବେ ଯାହା କିଛି ସର୍ତ୍ତ ରଖାଯାଉଛି ତାହାକୁ ଗୃହ ନିର୍ମାଣ ସଂସ୍ଥା ଅଣଦେଖା କରୁଛନ୍ତି। ଫଳରେ ପରିବେଶ ପ୍ରତିି ଏହା ବିପଜ୍ଜନକ ହେବା ସହ ଭୂତଳ ଜଳ ମଧ୍ୟ ପ୍ରଦୂଷିତ ହେବାରେ ଲାଗିଛି। ଏଥିଯୋଗୁ ପାନୀୟଜଳ ମଧ୍ୟ ଅସୁରକ୍ଷିତ ହୋଇପଡିଛି। ବର୍ଜ୍ୟ ଜଳକୁ ଏଣେ ତେଣେ ଛାଡ଼ିବା, ସ୍ବେରେଜ ଟ୍ରିଟ୍ମେଣ୍ଟ ପ୍ଲାଣ୍ଟ(ଏସ୍ଟିପି) କାର୍ଯ୍ୟକାରୀ ନ କରିବା, ସୌରଶକ୍ତି ସଂରକ୍ଷଣ ପାଇଁ କୌଣସି ବ୍ୟବସ୍ଥା ନ କରିବା, ବର୍ଷା ଜଳ ସଂରକ୍ଷଣ ଆଦି ଉପରେ ଆଦୌ ଗୁରୁତ୍ୱ ନ ଦେବା ଘଟଣାରେ ଗ୍ରୀନ୍ ଟ୍ରିବ୍ୟୁନାଲ କ୍ଷୁବ୍ଧ ହୋଇଛନ୍ତି। ରାଜଧାନୀରେ ଥିବା ଏକ ପ୍ରତିଷ୍ଠିତ ଆପାର୍ଟମେଣ୍ଟରେ ଏଭଳି ଅବହେଳାକୁ ନେଇ ହୋଇଥିବା ଏକ ଜନସ୍ବାର୍ଥ ମାମଲାର ଶୁଣାଣି କରି ଏନ୍ଜିଟି କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ଷ୍ଟେଟ୍ ଏନ୍ଭାଇରନମେଣ୍ଟ ଇମ୍ପାକ୍ଟ ଆସେସ୍ମେଣ୍ଟ ଅଥରିଟି, କେନ୍ଦ୍ରୀୟ ଭୂତଳ ଜଳ କର୍ତ୍ତୃପକ୍ଷ, କେନ୍ଦ୍ରୀୟ ଭୂତଳ ଜଳ ବୋର୍ଡକୁ କଡ଼ା ଭର୍ତ୍ସନା କରିଛନ୍ତି। ଆପାର୍ଟମେଣ୍ଟଗୁଡ଼ିକ ପରିବେଶ ପାଳନ ନିୟମକୁ କିପରି କାର୍ଯ୍ୟକାରୀ କରୁଛନ୍ତି ସେସବୁକୁ ଅନୁଧ୍ୟାନ କରି ରିପୋର୍ଟ ଦେବାକୁ ଏନ୍ଜିଟି ଗତ ୧ ତାରିଖରେ ନିର୍ଦ୍ଦେଶ ଦେଇଛନ୍ତି।
ମିଳିଥିବା ସୂଚନାନୁଯାୟୀ ରାଜ୍ୟରେ ଛୋଟ ବଡ଼ ପ୍ରାୟ ୩୦ ହଜାରରୁ ଊର୍ଦ୍ଧ୍ୱ ଆପାର୍ଟମେଣ୍ଟ ରହିଛି। କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ ନିୟମ ଅନୁଯାୟୀ ଆପାର୍ଟମେଣ୍ଟରେ ବହୁ ସଂଖ୍ୟାରେ ଲୋକ ବସବାସ କରୁଥିବାରୁ ସ୍ବେରେଜ ଟ୍ରିଟ୍ମେଣ୍ଟ ପ୍ଲାଣ୍ଟ (ଏସ୍ଟିପି) ସ୍ଥାପନ କରିବା ବାଧ୍ୟତାମୂଳକ। ଏଥିପାଇଁ ଷ୍ଟେଟ୍ ଏନ୍ଭାଇରନମେଣ୍ଟ ଇମ୍ପାକ୍ଟ ଆସେସ୍ମେଣ୍ଟ ଅଥରିଟି ଏବଂ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡରୁ ଏନ୍ଓସି ଆଣିବାକୁ ହେବ। ଏସ୍ଟିପି ପାଇଁ ଏରିଏଶନ ଟ୍ୟାଙ୍କ, ମେବ୍ରେନ୍ ଟ୍ୟାଙ୍କ୍, ଆନୋକ୍ସି ଟ୍ୟାଙ୍କ, ସ୍ଲଜ ହୋଲ୍ଡିଂ ଟ୍ୟାଙ୍କ ଓ ଶେଷରେ ବର୍ଜ୍ୟ ବିଶୋଧନ ଜଳ ଟ୍ୟାଙ୍କ ସ୍ଥାପନ କରାଯିବ, ଆଧୁନିକ ଜ୍ଞନକୌଶଳ ଉପଯୋଗ କରି ସ୍ବେରେଜ ଜଳକୁ ବିଶୋଧନ କରାଯିବ, ଯାହାକି ଭୂତଳ କିମ୍ବା ଭୂପୃଷ୍ଠ ଜଳକୁ ଏହା ପ୍ରଭାବିତ କରିବ ନାହିଁ। ମାତ୍ର ଏହି ଗାଇଡ୍ଲାଇନକୁ ପାଳନ କରାଯାଉ ନାହିଁ। ଏପରି କି ଆପାର୍ଟମେଣ୍ଟ ଆସୋସିଏଶନ ମଧ୍ୟ ଏହାକୁ ସେତେଟା ଗୁରୁତ୍ୱ ଦେଉନାହାନ୍ତି। ଫଳରେ ଅନେକ ଆପାର୍ଟମେଣ୍ଟ ନାମକୁମାତ୍ର ଏସ୍ଟିପି କରିଥିଲେ ମଧ୍ୟ ପାଇଖାନାର ସମସ୍ତ ବର୍ଜ୍ୟ ବିନା ବିଶୋଧନରେ ଭୂଗର୍ଭସ୍ଥ ଜଳରେ ମିଶୁଛି। ଆପାର୍ଟମେଣ୍ଟଗୁଡ଼ିକରେ ସ୍ବେରେଜ ଲାଇନ ନ ଥିବାରୁ ବର୍ଜ୍ୟଜଳକୁ ବାହାରକୁ କିମ୍ବା ଭୂଗର୍ଭକୁ ଛାଡ଼ି ଦିଆଯାଉଛି। ଫଳରେ ସମଗ୍ର ଭୂତଳ ଜଳ ବିଷାକ୍ତ ହେବାରେ ଲାଗିଛି। ସମାଜସେବୀ ତଥା ରେରା ଆକ୍ଟିଭିଷ୍ଟ ବିମଳେନ୍ଦୁ ପ୍ରଧାନ କହିଛନ୍ତି, ରାଜ୍ୟରେ ଥିବା ଆପାର୍ଟମେଣ୍ଟ ମଧ୍ୟରୁ ୯୦ ପ୍ରତିଶତରୁ ଊର୍ଦ୍ଧ୍ୱ ପରିବେଶ ନିୟମ ଉଲ୍ଲଂଘନ କରୁଛନ୍ତି। ମାରାତ୍ମକ ସ୍ବେରେଜ ପାଣିକୁ ଟ୍ରିଟ୍ମେଣ୍ଟ କରାଯାଉନାହିଁ। ବର୍ଜ୍ୟଜଳକୁ ଖୋଲା ଛାଡ଼ି ଦିଆଯାଉଛି। କେହି ଏହା ଉପରେ ଦୃଷ୍ଟି ଦେଉନାହାନ୍ତି। ଫଳରେ ବେଳକୁ ବେଳ ପରିବେଶ ବିଷାକ୍ତ ହେବାରେ ଲାଗିଛି। ଆଇନ ଖିଲାପକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହେବା ଦରକାର।
ବିଏମ୍ସି ଡେପୁଟି କମିଶନର ମନୋରଞ୍ଜନ ସାହୁ କହିଛନ୍ତି, ଆପାର୍ଟମେଣ୍ଟ ସ୍ବେରେଜ ଦେଖିବା କାମ ଓ୍ବାଟ୍କୋର। ବିଏମ୍ସିର ଏଥିରେ କିଛି ଭୂମିକା ନାହିଁ। ରାଜ୍ୟ ପରିବେଶ ନିର୍ଦ୍ଦେଶକ କେ. ମୁରୁଗେସେନ କହିଛନ୍ତି , ଆସନ୍ତା ସପ୍ତାହରୁ ଆପାର୍ଟମେଣ୍ଟଗୁଡ଼ିକରେ ପରିବେଶ ନିୟମ ପାଳନ ହେଉଛି କି ନାହିଁ ତାହା ମିଳିତ ଟିମ୍ ଜରିଆରେ ତଦାରଖ କରାଯିବ। ଆଇନ ଖିଲାପ ହୋଇଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
