ଧାମନଗର, ୬।୧୨ (ଡି.ଏନ୍.ଏ.): ଭଦ୍ରକ ଜିଲା ଧାମନଗର ଏନ୍ଏସି ଅଧୀନ ୧୧ ନମ୍ବର ୱାର୍ଡ ଦକ୍ଷିଣବାଡ଼ ଗ୍ରାମର ଡାକ୍ତର ରୁଦ୍ରନାରାୟଣ ସ୍ବାଇଁ ଡିଏମ୍ କ୍ଲିନିକାଲ ହେମାଟୋଲୋଜିରେ ସୁପର ସ୍ପେଶାଲିଟି ପ୍ରବେଶିକା ପରୀକ୍ଷାରେ ସର୍ବଭାରତୀୟସ୍ତରରେ ପ୍ରଥମ ସ୍ଥାନ ଅଧିକାର କରିଛନ୍ତି। ଏଥିରେ ସଫଳତା ପାଇ ସେ ଭଦ୍ରକ ଜିଲା ଓ ଧାମନଗର ପାଇଁ ଗୌରବ ଆଣିଛନ୍ତି। ଦକ୍ଷିଣବାଡ଼ ଗ୍ରାମର ସାମାଜିକ କର୍ମୀ ପୂର୍ଣ୍ଣଚନ୍ଦ୍ର ସ୍ବାଇଁ ଓ ଯାଜପୁର ଜିଲା ରସୁଲପୁରରେ କାର୍ଯ୍ୟରତ ଅତିରିକ୍ତ ବ୍ଲକ ଶିକ୍ଷାଧିକାରୀ ଶାନ୍ତିଲତା ରାଉତଙ୍କ ପୁଅ ରୁଦ୍ରନାରାୟଣ। ଗ୍ରାମ ସ୍କୁଲରେ ପ୍ରାଥମିକ ଶିକ୍ଷା ଓ ଧାମନଗର ସରକାରୀ ହାଇସ୍କୁଲରୁ ମାଟ୍ରିକ ପାସ୍ ପରେ ସେ ଉଚ୍ଚଶିକ୍ଷା ଗ୍ରହଣ କରି ୨୦୧୩ରେ କଟକସ୍ଥିତ ଶ୍ରୀରାମ ଚନ୍ଦ୍ର ଭଞ୍ଜ ମେଡିକାଲ କଲେଜରେ ଡାକ୍ତରୀ ପାଠ ପଢ଼ିଥିଲେ। ୨୦୨୦ରେ ପିଜିଏମ୍ ପ୍ରବେଶିକା ପରୀକ୍ଷାରେ ସର୍ବଭାରତୀୟ ସ୍ତରରେ ୨୩ ନମ୍ବର ସ୍ଥାନରେ ରହି ଚଣ୍ଡିଗଡ଼ ମେଡିକାଲ କଲେଜରେ ଏମ୍.ଡି. ମେଡିଶିନରେ ଅଧ୍ୟୟନ କରୁଛନ୍ତି। ଗତ ନଭେମ୍ବରରେ ହେମାଟୋଲୋଜିରେ ସୁପର ସ୍ପେଶାଲିଟି କୋର୍ସ ପାଇଁ ସର୍ବଭାରତୀୟ ସ୍ତରରେ ଅନୁଷ୍ଠିତ ପ୍ରବେଶିକା ପରୀକ୍ଷା ଦେଇଥିଲେ। ଗତ ୧ ତାରିଖରେ ଏହି ପରୀକ୍ଷାଫଳ ପ୍ରକାଶ ପାଇଥିବା ବେଳେ ସେ ପ୍ରଥମ ସ୍ଥାନ ହାସଲ କରିଛନ୍ତି। ତାଙ୍କର ଏହି ସଫଳତା ପାଇଁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି।
