ଭୁବନେଶ୍ୱର,୫ା୩(ଅନିଲ ଦାସ):ରାଜ୍ୟ ସରକାର ୧୨ଟି ଜିଲାରେ ହେବାକୁ ଥିବା ୪୦୬୬.୭୧ କୋଟି ଟଙ୍କାର ୨୨ଟି ଶିଳ୍ପ ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି। ଏଥିରେ ୨୫, ୫୨୫ ଜଣଙ୍କୁ ନିଯୁକ୍ତି ସୁଯୋଗ ମିଳି ପାରିବ। ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ସୋମବାର ଲୋକସେବା ଭବନଠାରେ ଅନୁଷ୍ଠିତ ସିଙ୍ଗଲ୍ଓ୍ବିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସ୍ଡବ୍ଲ୍ୟୁସିଏ) ବୈଠକରେ ଏହାକୁ ଅନୁମୋଦନ କରାଯାଇଛି। ସବୁଜ ଶକ୍ତି, କେମିକାଲ, ବୟନ ଶିଳ୍ପ ଓ ପୋଷାକ, ଷ୍ଟିଲ, ଲୁହା ଓ ଫେରୋଆଲଏଜ, ଆଲୁମିନିୟମ, ଖାଦ୍ୟ ପ୍ରକ୍ରିୟାକରଣ, ଶକ୍ତି, ଆଇଟି ଇତ୍ୟାଦି କ୍ଷେତ୍ରରେ ଉକ୍ତ ପୁଞ୍ଜି ବିନିଯୋଗ ହେବ।
ଓ୍ବାରିକ୍ଲିନ ଏନର୍ଜି ସଲ୍ୟୁଶନ ଖୋର୍ଦ୍ଧାଠାରେ ୪୩୫ କୋଟି ପୁଞ୍ଜିନିବେଶରେ ଏକ ଇଲେକ୍ଟ୍ରୋଲାଇଜର ମାନୁଫାକ୍ଚରିଂ ପ୍ଲାଣ୍ଟ ସ୍ଥାପନ କରିବ। ଏଥିରେ ୩୦୦ ଜଣଙ୍କୁ ନିଯୁକ୍ତି ସୁଯୋଗ ମିଳି ପାରିବ। ସେହିପରି ସାଲିମାର ପେଣ୍ଟସ ଲିମିଟେଡ ବାଲେଶ୍ୱର ଠାରେ ୧୩୫ କୋଟି ଟଙ୍କା ବ୍ୟୟରେ ଏକ ରଙ୍ଗ ଉତ୍ପାଦନ କାରଖାନା ସ୍ଥାପନ କରିବ। ଏଥିରେ ପ୍ରାୟ ୨୦୦ ଜଣଙ୍କୁ ନିଯୁକ୍ତି ସୁଯୋଗ ମିଳିବା ସମ୍ଭାବନା ରହିଛି। କଟକ ଓ ଢେଙ୍କାନାଳଠାରେ ରିଲାଏନ୍ସ ବାୟୋ ଏନର୍ଜି ୨୪୨.୪୨ କୋଟି ଟଙ୍କା ବ୍ୟୟରେ ଦୁଇଟି କମ୍ପ୍ରେସ୍ଡ ବାୟୋଗ୍ୟାସ ଓ ଫରମେଣ୍ଟେଡ ଅର୍ଗାନିକ ମାନ୍ୟୁଅର ପ୍ରକଳ୍ପ କରିବ। ଏଥିରେ ୧୩୮ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ।
ସେହିପରି ଏଏସ୍ଆଇଏଲ୍ ପେଣ୍ଟସ ଇଣ୍ଡଷ୍ଟ୍ରିଜ ଲିମିଟେଡ ପକ୍ଷରୁ ଖୋର୍ଦ୍ଧାଠାରେ ୧୫୦ କୋଟି ଟଙ୍କା ବ୍ୟୟରେ ଏକ ରଙ୍ଗ ତିଆରି ଓ ଆନୁଷଙ୍ଗିକ କାରଖାନା ନିର୍ମାଣ କରାଯିବ। ଏଥିରେ ୨୦୦ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ସେହିପରି ଖୋର୍ଦ୍ଧାଠାରେ ବୟନ ଶିଳ୍ପ ଓ ପୋଷାକ କ୍ଷେତ୍ରରେ ଓଏଫ୍ବି ଟେକ୍ ପ୍ରାଇଭେଟ ଲିମିଟେଡ ୮୫୭ କୋଟି ଟଙ୍କାର ପୁଞ୍ଜି ବିନିଯୋଗରେ ମହିଳା, ପୁରୁଷ ଓ ପିଲାମାନଙ୍କ ପାଇଁ ପୋଷାକ ଓ ଲେଦର ଉତ୍ପାଦ ତିଆରି ପ୍ଲାଣ୍ଟ ସ୍ଥାପନ କରିବ। ଏଥିରେ ପ୍ରାୟ ୧୫ ହଜାର ଜଣଙ୍କୁ ନିଯୁକ୍ତି ମିଳିପାରିବ। ସେହିପରି ଏନ୍ରିଚ କ୍ଲଥିଂ ଇଙ୍କ୍ କଟକଠାରେ ୫୨.୫୦ କୋଟି ପୁଞ୍ଜିବିନିଯୋଗରେ ଏକ ରେଡିମେଡ ଗାର୍ମେଣ୍ଟ ପ୍ରସ୍ତୁତି ୟୁନିଟ ସ୍ଥାପନ କରିବ। ଏଥିରେ ପ୍ରାୟ ୧୦୨୦ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ।
ସେହିପରି ବିଏମ୍ଡବ୍ଲ୍ୟୁ ଇଣ୍ଡଷ୍ଟ୍ରିଜ୍ ଲିମିଟେଡ ୭୧୩ କୋଟି ଟଙ୍କା ବ୍ୟୟରେ ଯାଜପୁରଠାରେ ଏକ ପ୍ଲେନ କଏଲ, କଲର କୋଟିଂ ଲାଇନ ଏବଂ କୋଲ୍ଡ ରୋଲିଂ ମିଲ୍ ସ୍ଥାପନ କରିବ। ଏଥିରେ ମୋଟ ୨୭୬ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ସେହିପରି ସେଗମା ପ୍ରୋଫାଇଲ୍ସ ଲିମିଟେଡ, ଶ୍ୟାମ ଷ୍ଟିଲ ଫେବ୍ରିକେଶନ ଭଳି ଅନେକ କମ୍ପାନୀ ପକ୍ଷରୁ ଦିଆଯାଇଥିବା ପୁଞ୍ଜିନିବେଶ ପ୍ରସ୍ତାବକୁ ଏସ୍ଏଲ୍ଏସ୍ଡବ୍ଲ୍ୟୁସିଏ ଅନୁମୋଦନ କରିଛି।
