ନୂଆଦିଲ୍ଲୀ,୨୯।୪: କରୋନା ସଂକ୍ରମଣ ଯୋଗୁ ଦେଶରେ ସ୍ଥିତି ଅଣାୟତ୍ତ ହେବାରେ ଲାଗିଛି। ଏପରିସ୍ଥଳେ ସରକାରଙ୍କ ପକ୍ଷରୁ ସାର୍ବଜନୀକ ଟିକାକରଣ ଅଭିଯାନ ଜାରି ରହିଛି। ତେବେ ଟିକାକରଣ ଅଭିଯାନରେ ୩୨ ହଜାର କୋଟି ଟଙ୍କା ଦୁର୍ନୀତି ହୋଇଥିବା ନେଇ ସୁପ୍ରିମ୍କୋର୍ଟରେ ଏକ ପିଟିଶନ ଦାଖଲ କରାଯାଇଛି। ଆଇନଜୀବୀ ଦୀପକ ଆନ୍ଦ ମସିହଙ୍କ ପକ୍ଷରୁ ଏହା ଦାଖଲ କରାଯାଇଛି। ଏଥିରେ କରୋନା ଲଢ଼େଇରେ କେନ୍ଦ୍ର ସରକାରଙ୍କ ପକ୍ଷରୁ ଗ୍ରହଣ କରାଯାଇଥିବା କେତେକ ପଦକ୍ଷେପ ଉପରେ ମଧ୍ୟ ପ୍ରଶ୍ନ ଉଠାଯାଇଛି। ପିଟିଶନ୍ରେ ଉଲ୍ଲେଖ କରାଯାଇଛି ଯେ, ପାଶ୍ଚାତ୍ୟ ଦେଶରେ କରୋନା ଟିକା ନାମ ୧୫୦ରୁ ୨୦୦ ଟଙ୍କା ମଧ୍ୟରେ ରହିଛି। ମାତ୍ର ଭାରତରେ ଏହି ଟିକା ସାଧାରଣ ଲୋକଙ୍କୁ ୬୦୦ ଟଙ୍କାରେ ମିଳୁଛି। ୧୮ରୁ ଅଧିକ ବର୍ଷ ବୟସ୍କଙ୍କୁ ଟିକାଦାନ କରାଯିବା ଘୋଷଣା ପରେ ଦାମ ମଧ୍ୟ ବଢ଼ିଯାଇଛି। ଏବେ ଦେଶର ପ୍ରାୟ ୮୦ କୋଟି ଲୋକଙ୍କୁ ଟିକା ଦିଆଯିବ। ଏଥିରେ ୩୨ ହଜାର କୋଟି ଟଙ୍କାରୁ ଅଧିକ ଦୁର୍ନୀତି ହେବ ବୋଲି ପିଟିଶନ୍ରେ ଦୀପକ ଆନନ୍ଦ ଦର୍ଶାଇଛନ୍ତି। ସେହିପରି ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଉଲ୍ଲେଖ କରିଛନ୍ତି ଯେ, ମୋଦି ନ୍ୟାଶନାଲ ସାଇଣ୍ଟିଫିକ୍ ଫୋର୍ସ ଗଠନ କରିଛନ୍ତି। ମାତ୍ର ଫେବୃୟାରୀରୁ ମାର୍ଚ୍ଚ ମଧ୍ୟରେ ଏହାର ବୈଠକ ଅନୁଷ୍ଠିତ ହୋଇ ନାହିଁ। ଆମେରିକା ରାଷ୍ଟ୍ରପତିଙ୍କୁ ଦେଶବ୍ୟାପୀ ଲକ୍ଡାଉନ୍ ଘୋଷଣା କରିବାର ଅଧିକାର ନ ଥିବାବେଳେ ଭାରତର ପ୍ରଧାନମନ୍ତ୍ରୀ ଏଭଳି କରିବାକୁ ସକ୍ଷମ କାହିଁକି ବୋଲି ପ୍ରଶ୍ନ କରିଛନ୍ତି। ଉପଯୁକ୍ତ ନୀତି ଆଧାରରେ ସରକାରଙ୍କ ପକ୍ଷରୁ ପଦକ୍ଷେପ ଗ୍ରହଣ କରିବା ନେଇ ସେ ପିଟିଶନରେ ଉଲ୍ଲେଖ କରିଛନ୍ତି। ଏସମ୍ପର୍କରେ ସର୍ବୋଚ୍ଚ ନ୍ୟାୟାଳୟ ଆଦେଶ ଦେବାକୁ ସେ ପିଟିଶନରେ ଅନୁରୋଧ କରିଛନ୍ତି।
