ନୂଆଦିଲ୍ଲୀ,୨୮।୯: ୨୦୨୭ ଦିନିକିଆ ବିଶ୍ୱକପ ପାଇଁ ବିଶ୍ୱର ବିଭିନ୍ନ କ୍ରିକେଟ ଦଳ ଏବେଠାରୁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ଭାରତୀୟ ଦଳ ମଧ୍ୟ ଏକ ଶକ୍ତିଶାଳୀ ଟିମ ଗଠନ ଦିଗରେ ଆଗକୁ ବଢୁଛି। ଅଧିନାୟକ ଶୁଭମନ ଗିଲଙ୍କ ସହ ରୋହିତ ଶର୍ମା, ବିରାଟ କୋହଲି, ରବୀନ୍ଦ୍ର ଜାଡେଜା ଓ କେଏଲ ରାହୁଲଙ୍କ ଭଳି ଅଭିଜ୍ଞ ଖେଳାଳିଙ୍କ ଅଭିଜ୍ଞତା ଦଳ ପାଇଁ ଗୁରୁତ୍ୱପୂର୍ଣ୍ଣ ହେବ।
ବିଶ୍ୱକପର ପ୍ରତ୍ୟେକ ସଂସ୍କରଣରେ ଅନେକ ରେକର୍ଡ ତିଆରି ହୋଇଛି ଏବଂ ଭାଙ୍ଗିଛି। ରେକର୍ଡର କଥା ଉଠିଲେ କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକରଙ୍କ ନାମ ଆଗକୁ ଆସେ। କିନ୍ତୁ ବିଶ୍ୱକପ ଇତିହାସରେ ଏପରି କିଛି ରେକର୍ଡ ରହିଛି, ଯେଉଁଥିରେ ସଚିନଙ୍କ ନାମ ନାହିଁ। ସେଥିମଧ୍ୟରୁ ଗୋଟିଏ ହେଉଛି ବିଶ୍ୱକପରେ ସର୍ବାଧିକ ଛକା ମାରିବାର ରେକର୍ଡ।
ବିଶ୍ୱକପ ଇତିହାସରେ ସର୍ବାଧିକ ଛକା ମାରିଥିବା ବ୍ୟାଟର ହେଉଛନ୍ତି ଭାରତୀୟ ତାରକା ରୋହିତ ଶର୍ମା। ରୋହିତ ଏପର୍ଯ୍ୟନ୍ତ ୨୮ଟି ଇନିଂସ୍ରେ ୫୪ଟି ଛକା ମାରିଛନ୍ତି। ବିଶ୍ୱକପ ଇତିହାସରେ ୫୦ରୁ ଅଧିକ ଛକା ମାରିଥିବା ଏକମାତ୍ର ବ୍ୟାଟର ହେଉଛନ୍ତି ରୋହିତ।
ଏହାସହ ଗୋଟିଏ ବିଶ୍ୱକପ ସଂସ୍କରଣରେ ସର୍ବାଧିକ ଛକା ମାରିବାର ରେକର୍ଡ ମଧ୍ୟ ରୋହିତଙ୍କ ନାମରେ ରହିଛି। ୨୦୨୩ ବିଶ୍ୱକପରେ ରୋହିତ ୩୧ଟି ଛକା ମାରିଥିଲେ।
-୫୪ ଛକା ରୋହିତ ଶର୍ମା
-୪୯ ଛକା କ୍ରିସ ଗେଲ
-୪୩ ଛକା ଗ୍ଲେନ ମ୍ୟାକ୍ସୱେଲ
-୪୧ ଛକା ଡେଭିଡ ୱାର୍ଣ୍ଣର
-୩୭ ଛକା ଏବି ଡିଭିଲିୟର୍ସ
ରୋହିତଙ୍କ ପଛକୁ ଏହି ତାଲିକାରେ ଦ୍ୱିତୀୟ ସ୍ଥାନରେ ରହିଛନ୍ତି ୱେଷ୍ଟଇଣ୍ଡିଜର ଧୂଆଁଧାର ବ୍ୟାଟର କ୍ରିସ ଗେଲ। ଗେଲ ବିଶ୍ୱକପର ମୋଟ ୪୯ଟି ଛକା ମାରିଛନ୍ତି। ତାଙ୍କ ପରେ ଗ୍ଲେନ ମ୍ୟାକ୍ସୱେଲ ୪୩ ଓ ଡେଭିଡ ୱାର୍ଣ୍ଣର ୪୧ ଛକା ସହ ତାଲିକାରେ ରହିଛନ୍ତି। ବିଶ୍ୱକପରେ ସର୍ବାଧିକ ଛକା ମାରିଥିବା ଭାରତୀୟଙ୍କ ତାଲିକାରେ ରୋହିତ ଶର୍ମା ଶୀର୍ଷରେ ରହିଛନ୍ତି। ତାଙ୍କ ପରେ ସଚିନ ତେନ୍ଦୁଲକର ୨୭ଟି ଛକା ସହ ଦ୍ୱିତୀୟ ସ୍ଥାନରେ ଅଛନ୍ତି।
ସେହିପରି ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲି ବିଶ୍ୱକପରେ୨୫ଟି ଛକା ମାରିଥିବା ବେଳେ ଶ୍ରେୟସ ଆୟରଙ୍କ ନାମରେ ୨୪ଟି ଛକା ରହିଛି। ଅନ୍ୟପଟେ ବିରାଟ କୋହଲି ଭାରତୀୟଙ୍କ ଟପ୍-୫ ଛକା ତାଲିକାରେ ସ୍ଥାନ ପାଇନାହାନ୍ତି।