ଦୁବାଇ,୪।୩:ଚାମ୍ପିଅନ୍ସ ଟ୍ରଫି ସେମିଫାଇନାଲରେ ଅଷ୍ଟ୍ରେଲିଆ ବିପକ୍ଷରେ ରୋହିତ ଶର୍ମା ପୁଣି ଥରେ ଟସ ହାରିଯାଇଛନ୍ତି। ଏହିପରି ରୋହିତ ଶର୍ମା ଦିନିକିଆ ଫର୍ମାଟରେ କ୍ରମାଗତ ୧୪ତମ ଥର ପାଇଁ ଟସ ହାରିଛନ୍ତି। ଏପର୍ଯ୍ୟନ୍ତ କୌଣସି ଅଧିନାୟକ ଏହାଠାରୁ ଅଧିକ ଥର ଲଗାତାର ଟସ ହାରି ନାହାଁନ୍ତି।
ରୋହିତ ଶର୍ମାଙ୍କ ପରେ, ସର୍ବାଧିକ କ୍ରମାଗତ ଟସ ହାରିଥିବା ଅଧିନାୟକଙ୍କ ତାଲିକାରେ ୱେଷ୍ଟଇଣ୍ଡିଜର ବ୍ରାଏନ ଲାରା ଦ୍ୱିତୀୟ ସ୍ଥାନରେ ଅଛନ୍ତି। ବ୍ରାଏନ ଲାରା ଲଗାତାର ୧୨ଟି ଦିନିକିଆ ମ୍ୟାଚରେ ଟସ ହାରିଥିଲେ। ରୋହିତ ଶର୍ମା ଏବଂ ବ୍ରାଏନ ଲାରାଙ୍କ ପରେ, ନେଦରଲ୍ୟାଣ୍ଡର ପିଟର ବୋରେନ ତୃତୀୟ ସ୍ଥାନରେ ଅଛନ୍ତି। ପିଟର ବୋରେନ ଲଗାତାର ୧୧ଟି ମ୍ୟାଚରେ ଟସ ହାରିଥିଲେ।
ଆଜି ଚାମ୍ପିଅନ୍ସ ଟ୍ରଫି ସେମିଫାଇନାଲରେ ଭାରତ ଏବଂ ଅଷ୍ଟ୍ରେଲିଆ ଦଳ ମୁହାଁମୁହିଁ ହୋଇଛନ୍ତି। ଅଷ୍ଟ୍ରେଲିଆ ଅଧିନାୟକ ଷ୍ଟିଭ ସ୍ମିଥ ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ। ଭାରତୀୟ ଦଳକୁ ଫାଇନାଲରେ ପହଞ୍ଚିବା ପାଇଁ ରନ ପିଛା କରିବାକୁ ପଡିବ। ଚାମ୍ପିଅନ୍ସ ଟ୍ରଫିର ଦ୍ୱିତୀୟ ସେମିଫାଇନାଲ ବୁଧବାର ଖେଳାଯିବ। ଦ୍ୱିତୀୟ ସେମିଫାଇନାଲରେ ଦକ୍ଷିଣ ଆଫ୍ରିକା ଏବଂ ନ୍ୟୁଜିଲାଣ୍ଡ ଦଳ ମୁହାଁମୁହିଁ ହେବେ। ଏହା ପରେ ଟୁର୍ଦାମେଣ୍ଟର ଫାଇନାଲ ୯ ମାର୍ଚ୍ଚରେ ଖେଳାଯିବ। ଯଦି ଭାରତୀୟ ଦଳ ଫାଇନାଲ ଖେଳେ, ତେବେ ଟାଇଟଲ ମ୍ୟାଚ ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବ, କିନ୍ତୁ ଯଦି ରୋହିତ ଶର୍ମାଙ୍କ ଅଧିନାୟକତ୍ୱରେ ଭାରତୀୟ ଦଳ ଫାଇନାଲ ପହଞ୍ଚିବାରେ ବିଫଳ ହୁଏ, ତେବେ ଫାଇନାଲ ଲାହୋରରେ ଖେଳାଯିବ।
ଚାମ୍ପିଅନ୍ସ ଟ୍ରଫିରେ ଏପର୍ଯ୍ୟନ୍ତ ଭାରତର ପ୍ରଦର୍ଶନ ଭଲ ରହିଛି। ରୋହିତ ଶର୍ମାଙ୍କ ଅଧିନାୟକତ୍ୱରେ ଭାରତୀୟ ଦଳ ବାଂଲାଦେଶକୁ ପରାସ୍ତ କରି ଏହାର ଅଭିଯାନ ଆରମ୍ଭ କରିଥିଲା। ଏହା ପରେ ଟିମ ଇଣ୍ଡିଆ ପାକିସ୍ତାନକୁ ପରାସ୍ତ କରିଥିଲା। ଭାରତ ତାର ଶେଷ ଗ୍ରୁପ ପର୍ଯ୍ୟାୟ ମ୍ୟାଚ୍ରେ ନ୍ୟୁଜିଲାଣ୍ଡକୁ ୪୪ ରନରେ ପରାସ୍ତ କରିଥିଲା। ଏବେ ଭାରତୀୟ ଦଳ ପ୍ରଥମ ସେମିଫାଇନାଲରେ ଅଷ୍ଟ୍ରେଲିଆକୁ ଭେଟିବ।
