ସିଡନୀ, ୨୫ା୧୦: ଭାରତୀୟ ଦଳର ଦୁଇ ସିନିୟର ଷ୍ଟାର ରୋହିତ ଶର୍ମା ଓ ବିରାଟ କୋହଲିଙ୍କ ଜବରଦସ୍ତ ପ୍ରଦର୍ଶନ ବଳରେ ଅଷ୍ଟ୍ରେଲିଆ ବିପକ୍ଷ ତୃତୀୟ ତଥା ଅନ୍ତିମ ଦିନିକିଆ କ୍ରିକେଟ୍ ମ୍ୟାଚ୍କୁ ଭାରତ ସହଜରେ ୯ ଉଇକେଟରେ ଜିତି ନେଇଛି। ସିରିଜ୍ ଆରମ୍ଭରୁ ପ୍ରଦର୍ଶନ ଲାଗି ଚାପରେ ଥିବା ରୋହିତ ଅପରାଜିତ ୧୨୧ ଓ କୋହଲି ଅପରାଜିତ ୭୪ ରନର ଇନିଂସ ଖେଳି ସମାଲୋଚକଙ୍କୁ ଚୁପ କରି ଦେଇଛନ୍ତି।
ଅଷ୍ଟ୍ରେଲିଆ ପକ୍ଷରୁ ପ୍ରଦତ୍ତ ୨୩୭ ରନର ଟାର୍ଗେଟକୁ ଭାରତ ୩୮.୩ ଓଭରରେ ୧ ଉଇକେଟ ହରାଇ ହାସଲ କରି ନେଇଥିଲା। ଏହି ପରାଜୟ ସତ୍ତ୍ୱେ ଅଷ୍ଟ୍ରେଲିଆ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍କୁ ୨-୧ରେ ଜିତି ନେଇଛି। ରୋହିତଙ୍କୁ ଉଭୟ ପ୍ଲେୟର ଅଫ୍ ଦି ମ୍ୟାଚ୍ ଓ ପ୍ଲେୟର ଅଫ୍ ଦି ସିରିଜ୍ ବିବେଚିତ କରାଯାଇଛି।
ଟସ୍ ଜିତି ବ୍ୟାଟିଂ କରିଥିବା ଅଷ୍ଟ୍ରେଲିଆକୁ ଅଧିନାୟକ ମିଚେଲ ମାର୍ଶ ଓ ଟ୍ରାଭିସ ହେଡ୍ ୬୧ ରନର ଭଲ ଆରମ୍ଭ ଦେଇଥିଲେ। ଭାରତୀୟ ପେସର ମହମ୍ମଦ ସିରାଜ ପ୍ରଥମ ପାଓ୍ବରପ୍ଲେର ଅନ୍ତିମ ଓଭରରେ ହେଡ୍ (୨୯ ରନ୍, ୬ ଚୌକା)ଙ୍କୁ ପାଭିଲିଅନ ପଠାଇଥିଲେ। ଏହାପରେ ଅଧିନାୟକ ମାର୍ଶ ୪୧ (୫ ଚୌକା ଓ ୧ ଛକା) ଓ ମାଥ୍ୟୁ ଶର୍ଟ ୩୦ (୨ ଚୌକା) ରନ କରି ଆଉଟ୍ ହୋଇଥିଲେ। ମ୍ୟାଟ ରେନଶ (୫୬ ରନ୍, ୨ ଚୌକା) ଓ ଆଲେକ୍ସ କ୍ୟାରୀ ୨୪ ଚତୁର୍ଥ ଉଇକେଟରେ ୫୯ ରନର ଭାଗୀଦାରି କରିଥିଲେ। ଏହିଠାରୁ ଅଷ୍ଟ୍ରେଲିଆର ବ୍ୟାଟିଂ ଲାଇନ୍ ଭୂଶୁଡ଼ି ପଡ଼ିଥିଲା।
ଏକଦା ୧୮୩/୩ ସ୍କୋର କରିଥିବା ଘରୋଇ ଅଷ୍ଟ୍ରେଲିଆ ଦଳ ୪୬.୪ ଓଭରରେ ୨୩୬ ରନରେ ଅଲଆଉଟ୍ ହୋଇଯାଇଥିଲା। ଭାରତ ପାଇଁ ହର୍ଷିତ ରାଣା ସର୍ବାଧିକ ୪ ଓ ଓ୍ବାଶିଂଟନ ସୁନ୍ଦର ୨ ଉଇକେଟ ନେଇଥିଲେ।
ଜବାବରେ ଭାରତକୁ ଅଧିନାୟକ ଶୁବମନ ଗିଲ ଓ ରୋହିତ ଦୃଢ଼ ଆରମ୍ଭ ପ୍ରଦାନ କରିଥିଲେ। ଦୁହେଁ ପ୍ରଥମ ଉଇକେଟରେ ୬୯ ରନ ଯୋଡ଼ିଥିଲେ। ଅଧିନାୟକ ଗିଲ ୨୪ ରନ କରି ଜୋଶ ହାଜେଲଉଡ୍ଙ୍କ ବଲରେ ଆଉଟ୍ ହୋଇପାରେ। ଏହାପରେ ଦୁଇ ପୂର୍ବତନ ଅଧିନାୟକ ରୋହିତ ଓ କୋହଲି ଦାୟିତ୍ୱ ସମ୍ଭାଳିଥିଲେ। କ୍ୟାରିୟରରେ ପ୍ରଥମ ଥର ପାଇଁ ଲଗାତର ଦୁଇ ମ୍ୟାଚ୍ରେ ଖାତା ଖୋଲିବାରେ ବିଫଳ ହୋଇଥିବା କୋହଲି ପ୍ରଥମ ବଲରେ ସିଙ୍ଗଲ ନେଇଥିଲେ, ଏହାକୁ ଦର୍ଶକ ତାଳି ମାରି ସ୍ବାଗତ କରିଥିଲେ। ଦୁହେଁ ଅବିଭାଜିତ ଦ୍ୱିତୀୟ ଉଇକେଟରେ ୧୬୮ ରନ ଯୋଡ଼ି ଦଳକୁ ଜିତାଇ ଥିଲେ। ୨୦୨୦ ପରେ ଏହା ଦୁହେଁଙ୍କ ମଧ୍ୟରେ ପ୍ରଥମ ଶତକୀୟ ଭାଗୀଦାରି ଥିଲା। ମୋଟ ଉପରେ ଏହା ଦୁହିଁଙ୍କ ୧୯ତମ ଶତକୀୟ ଭାଗୀଦାରି ଥିଲା।
Dharitri – Odisha’s No.1 Odia Daily
