ବାଲେଶ୍ୱର, ୯।୯(ବାଞ୍ଛାନିଧି ଦେ):ବାଲେଶ୍ୱରରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି l ପୋଲିସକୁ ଚ୍ୟାଲେଞ୍ଜ କରି ଅପରାଧୀମାନେ ବିଭିନ୍ନ ସମୟରେ ଅପରାଧ ଘଟାଇ ଚାଲିଛନ୍ତି। ସଦର ଥାନା ଅନ୍ତର୍ଗତ ସାରଗାଁ ଗ୍ରାମରେ ବଡଧରଣର ଲୁଟ ହୋଇଛି l ଘରେ କେହି ନ ଥିବାର ସୁଯୋଗ ନେଇ ଦୁଇ ଭାଇଙ୍କ ଘରର ତାଲା ଭାଙ୍ଗି ଦୁର୍ବୃତ୍ତମାନେ ନଗଦ ୫.୪୫ ଲକ୍ଷ ଟଙ୍କା ସହ ସୁନା ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଛି l ସନ୍ଧାନୀ କୁକୁର, ସାଇଣ୍ଟିଫିକ ଟିମ ସହ ପୋଲିସ ପହଞ୍ଚି ତଦନ୍ତ ଜାରି ରଖିଛନ୍ତି l ବଡଭାଇ ଅରୁଣ ଦାସ ସକାଳେ ଝିଅକୁ ଚିକିତ୍ସା ପାଇଁ ଫକୀରମୋହନ ମେଡିକାଲ କଲେଜ ଓ ହସ୍ପିଟାଲକୁ ଯାଇଥିଲେ l ଅପରାହ୍ନ ଦୁଇଟା ସମୟରେ ଘରକୁ ଫେରି ଘରର ତାଲା ଭଙ୍ଗା ଯାଇଥିବା ଦେଖିଥିଲେ l ଘରେ ଆଲମିରା ଭାଙ୍ଗି ଦୁଇଟି ସୁନା ହାର, ଦୁଇ ହଳ ସୁନା କାନଫୁଲ ଓ ଏକ ହଳ ସୁନା ପଲା ସହ ନଗଦ ୫ ହଜାର ଟଙ୍କା ଲୁଟ ହୋଇଥିବା ଦେଖିଥିଲେ l ଏଥିସହ ତଳ ମହଲାରେ ରହୁଥିବା ସାନଭାଇ ତରୁଣ ଦାସଙ୍କ ପରିବାର ୧୭ ଦିନ ଧରି ଶିଶୁର ଚିକିତ୍ସା ପାଇଁ କଟକ ଶିଶୁ ଭବନରେ ରହିଛନ୍ତି l ତାଙ୍କ ଘରର ତାଲା ଭାଙ୍ଗି ନଗଦ ୫.୪୦ ଲକ୍ଷ ଟଙ୍କା ସହ ଦୁଇଟି ସୁନାହାର ଓ ଏକ ହଳ ସୁନା କାନଫୁଲ ଲୁଟ ହୋଇଥିବା ଅଭିଯୋଗ ହୋଇଛି l ଏ ସମ୍ପର୍କରେ ପୋଲିସ ଏକ ମାମଲା ରୁଜୁ କରି ଘଟଣାର ଛାନଭିନ ଆରମ୍ଭ କରିଛି l
