କେନ୍ଦ୍ରାପଡ଼ା/ଆଳି,୧ା୩(ଜଗନ୍ନାଥ ଧଳ/ବନମାଳୀ ସେନାପତି): ଆଳି ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଏକ ଲୁଟେରା ଗ୍ୟାଙ୍ଗ ସିରିଜ ଲୁଟ୍ କରିବା ସହ ଜଣେ ବ୍ୟବସାୟୀଙ୍କ ଘରେ ଓ ଅଫିସରେ ସଶସ୍ତ୍ର ଲୁଟେରା ଗ୍ୟାଙ୍ଗ ପଶିବା ଘଟଣା ଆଳି ଅଞ୍ଚଳବାସୀଙ୍କୁ ଆତଙ୍କିତ କରିଦେଇଛି। ଆଳି ଥାନାଠାରୁ ମାତ୍ର ଗୋଟାଏ କିଲୋମିଟର ଦୂରରେ ଥିବା ଲୋକାପଡ଼ା ଗ୍ରାମରେ ଲୁଟେରା ଗ୍ୟାଙ୍ଗ ଏଭଳି କାଣ୍ଡ ଭିଆଇଛନ୍ତି l ଯୁବ ବ୍ୟବସାୟୀ ସମ୍ବିତ ଦାସଙ୍କ ଘରେ ଓ ଅଫିସରେ ଲୁଟେରାମାନେ ମୁହଁରେ ମାସ୍କ ବାନ୍ଧି ବିଭିନ୍ନ ମାରଣାସ୍ତ୍ର ଧରି ଲୁଟ୍ ଉଦ୍ୟମ କରି ବିଫଳ ହୋଇଥିବା ବେଳେ ତାଙ୍କ ଜୀବନ ପ୍ରତି ବିପଦ ଥିବା ନେଇ ସେ ଆଳି ଥାନାରେ ଅଭିଯୋଗ କରିଛନ୍ତି।
ସେହିପରି ଗ୍ରାମର ମନୋଜ ରାୟଙ୍କ ପରିବାର ଲୋକେ ଏକ ବିବାହ ଉତ୍ସବ ନିମନ୍ତେ ଭୁବନେଶ୍ୱର ଯାଇଥିବା ବେଳେ ତାଙ୍କ ଘରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ସହ ନଗଦ ଟଙ୍କା ଲୁଟିନେବା ସହ ଶରତ ରାୟଙ୍କ ଘରୁ ମଧ୍ୟ ଚୋରି ହୋଇଛି। ଗୋଟିଏ ରାତିରେ ଲୁଟେରାଙ୍କ ଏହି କାଣ୍ଡ ସାଧାରଣରେ ଆତଙ୍କ ଖେଳାଇ ଦେଇଥିବା ବେଳେ ପୋଲିସ ପାଟ୍ରୋଲିଂ ଅଭାବରୁ ଲୁଟେରାମାନେ ଖୁଲମଖୁଲା ଲୁଟ୍ କରି ଚାଲିଛନ୍ତି। ପୋଲିସ କେବେ ଏହି ଲୁଟେରା ଗ୍ୟାଙ୍ଗକୁ କାବୁ କରୁଛି ତାହା ଦେଖିବାକୁ ବାକି ରହିଲା।
