ଜି ଉଦୟଗିରି, ୨୬/୯(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): ଭୁସ୍ଖଳନ ଘଟିଥିବା କଳିଙ୍ଗା ଘାଟିରେ ଯୁଦ୍ଧ କାଳୀନ ଭିତ୍ତିରେ ନିର୍ମାଣ କାର୍ଯ୍ୟ ଚାଲିଛି । ଶୁକ୍ରବାର ସିମେଣ୍ଟ କଂକ୍ରିଟ ପକାଯାଉଛି । ଉଭୟପଟକୁ ରାସ୍ତା ସଂଯୋଗ ହୋଇ ଠିକା ସଂସ୍ଥାର ରାସ୍ତା ତିଆରି ମେସିନ ଯିବା ଆସିବା କରୁଛି । କିନ୍ତୁ ଉପର ମୁଣ୍ଡରେ ବିଶାଳକାୟ ବଡ଼ ବଡ଼ ପଥର ଝୁଲି ରହିଛି । ସେଗୁଡ଼ିକୁ ନ ଖସାଇବା ପର୍ଯ୍ୟନ୍ତ ଯାନବାହନ ଚଳାଚଳ କରିପାରିବ ନାହିଁ । ଶନିବାର ଏକ ବିଶେଷଜ୍ଞ ଟିମ ରାଜସ୍ଥାନରୁ ଆସିବେ ସେମାନେ ସେଇ ପଥର ଗୁଡିକୁ ଖସାଇବା ବ୍ୟବସ୍ଥା କରିବେ।
ଆସନ୍ତା ଅକ୍ଟୋବର ମାସ ଦ୍ୱିତୀୟ ସପ୍ତାହ ସୁଦ୍ଧା କଳିଙ୍ଗା ଘାଟି ଦେଇ ସମସ୍ତ ଯାନବାହନ ଚଳାଚଳ ସ୍ବାଭାବିକ କରିବା ପାଇଁ ଲକ୍ଷ ରଖିଛୁ ବୋଲି ଜାତୀୟ ରାଜପଥ ବିଭାଗର ମୁଖ୍ୟ ନିର୍ମାଣ ଯନ୍ତ୍ରୀ ବଙ୍କିମ ଚନ୍ଦ୍ର ପଣ୍ଡା କହିଛନ୍ତି । ମୁଖ୍ୟଯନ୍ତ୍ରୀ ଓ ସହକାରୀ ଯନ୍ତ୍ରୀ ପ୍ରଶାନ୍ତ କୁମାର ସାହୁ ଘଟଣାସ୍ଥଳରେ ଉପସ୍ଥିତ ରହି କାର୍ଯ୍ୟ ତଦାରଖ କରୁଛନ୍ତି। ଅନ୍ୟପଟେ ଘାଟିର ଅନେକ ସ୍ଥାନରେ ବଡ଼ ବଡ଼ ପଥର ଝୁଲି ରହିଛି। ସେଗୁଡ଼ିକୁ ପେକିଙ୍ଗ ଦେଇ ନରଖିଲେ ବିପଦ ସୃଷ୍ଟି କରିବ ତେଣୁ ବିଭାଗ ସେସବୁକୁ ମଧ୍ୟଦୃଷ୍ଟିଦେବା ଆବଶ୍ୟକ।
ଗତ ୧୧ ଦିନ ହେବ ଘାଟିରେ ଯାନବାହାନ ଚଳାଚଳ ବନ୍ଦ ରହିଛି । ଚକାପାଦ ଦେଇ ଭଞ୍ଜନଗର ଯିବାକୁ ଅଧିକ ୫୦ କିଲୋମିଟର ପଡୁଛି । ଯାଫଳରେ ଜି ଉଦୟଗିରି ରେ ପନିପରିବା ଓ ମାଛ ଦର ବହୁତ ବୃଦ୍ଧି ଘଟିଛି । ଯାତ୍ରୀମାନେ ଅଧିକ ଭଡା ଦେଇ ବ୍ରହ୍ମପୁର, ଭୁବନେଶ୍ୱର ଓ ଭଞ୍ଜନଗର ଯାଉଛନ୍ତି । ଆମ୍ବୁଲାନ୍ସ ବ୍ରହ୍ମପୁର ଯିବାକୁ ଅଧିକ ସମୟ ଲାଗୁଚି । ପୁଣି ଚକାପାଦ ରାସ୍ତା ମଧ୍ୟ ବିପଦଶଙ୍କୁଳ ଅବସ୍ଥାରେ ଅଛି । ଅତିଶୀଘ୍ର କଳିଙ୍ଗା ଘାଟି ଦେଇ ଯାନବାହାନ ଚଳାଚଳ କଲେ ଜନସାଧାରଣ ଉପକୃତ ହେବେ।
