ଆନନ୍ଦପୁର,୧୯ା୬(ସୁଶାନ୍ତ କୁମାର ସାହୁ): ଓଭର ବ୍ରିଜ୍ ଓ ରାସ୍ତା ନିର୍ମାଣରେ ବିଳମ୍ବକୁ କେନ୍ଦ୍ର କରି ଏନ୍.ଏଚ୍ ଅବରୋଧ କରିଛନ୍ତି ଲୋକେ। ରାସ୍ତାରୋକୋ ଯୋଗୁ ଅଟକି ରହିଥିଲା ଅନେକ ଯାନବାହନ। କେନ୍ଦୁଝର ଜିଲାର ଲାଇଫ୍ଲାଇନ୍ କୁହାଯାଉଥିବା ୨୦ ନଂ ଜାତୀୟ ରାଜପଥର ଆନନ୍ଦପୁର ଉପଖଣ୍ଡ ଶାଳପଡ଼ାଠାରେ ନିର୍ମାଣ ଚାଲିଛି ନୂଆ କରି ଆଉ ଏକ ଓଭରବ୍ରିଜ କାମ। ଫଳରେ ମଧ୍ୟ ରାସ୍ତା ପରିବର୍ତ୍ତେ ଗାଡ଼ିଗୁଡ଼ିକୁ ରାସ୍ତାର ଉଭୟପାଶର୍ବରେ ଥିବା ସର୍ଭିସ୍ ରୋଡ୍କୁ ମଧ୍ୟ ରାସ୍ତା ଭାବେ ବ୍ୟବହାର କରାଯାଉଛି। ହେଲେ ଏହି ସର୍ଭିସ ରୋଡ୍ରେ ମାତ୍ରାଧିକ ଆଇରନ ଗାଡ଼ି ଚଳାଚଳ ଯୋଗୁ ରାସ୍ତାରେ ବଡ଼ବଡ଼ ଖାଲ ହୋଇଯାଇଥିବାରୁ ଯାତ୍ରୀମାନେ ଯମଯନ୍ତ୍ରଣା ଭୋଗୁଛନ୍ତି। ସର୍ଭିସ ରୋଡ୍ଗୁଡ଼ିକ ମରାମତି ହେଉନାହିଁ। ଯାହା ଫଳରେ ଧୂଳିଧୂଆଁରୁ ଅତିଷ୍ଠ ସ୍ଥାନୀୟ ଲୋକେ ଗୁରୁବାର ସକାଳ ୧୦ ଘଟିକା ସମୟରେ ଆନନ୍ଦପୁରରୁ ଯାଜପୁର ଯିବା ପାଇଁ ବ୍ୟବହାର ହେଉଥିବା ଶାଳପଡ଼ା ବାମପାଖ ସର୍ଭିସ ରୋଡ୍କୁ ବନ୍ଦ କରି ବସିଛନ୍ତି। ଉଭୟ ରାସ୍ତା କାମ ଓ ଓଭରବ୍ରିଜ୍ କାମ ଏକ ମାସ ମଧ୍ୟରେ ସମ୍ପନ୍ନ କରିବାର ଲିଖିତ ପ୍ରତିଶ୍ରୁତି ପାଇଁ ଜିଦ୍ ଧରି ବସିଛନ୍ତି ଲୋକେ। ଘଟଣାସ୍ଥଳରେ ଘଷିପୁରା ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କଲା ପରେ ରାସ୍ତା ଓ ଓଭରବ୍ରିଜ ନିର୍ମାଣକାରୀ ଠିକାସଂସ୍ଥା ସୁପରଭାଇଜର ପୁନିତ ଡିଙ୍ଗ୍ରା ଘଟଣାସ୍ଥଳରେ ପହଞ୍ଚି ପ୍ରତିଦିନ ସର୍ଭିସ ରୋଡ୍ ମେଣ୍ଟେନାନ୍ସ ପାଇଁ ପ୍ରତିଶ୍ରୁତି ଦେବାରୁ ରାସ୍ତାରୋକୋ ହଟିଥିଲା।
