ପାଟନା,୧୬ ।୮: ବିହାରରେ ଭାରତୀୟ ଜନତା ପାର୍ଟି(ଭାଜପା) ହାତ ଛାଡି ନୀତୀଶ କୁମାର ତେଜସ୍ୱୀ ଯାଦବଙ୍କୁ ଆପଣେଇ ନେଇଛନ୍ତି । ଆରଜେଡି ଓ ଜେଡିୟୁ ନୂଆ ସରକାରର ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ମଙ୍ଗଳବାର କରାଯିବ । ମେଣ୍ଟ ସରକାରର ନୂଆ ସରକାର ମନ୍ତ୍ରିମଣ୍ଡଳ ସମ୍ପ୍ରସାରଣ ପାଇଁ ସହମତି ପ୍ରକାଶ କରିଛନ୍ତି । ମଙ୍ଗଳବାର ସକାଳ ୧୧ଟା ୩୦ରେ ରାଜଭବନ ପରିସରରେ ଏକ ନିରାଡମ୍ବର ସମାରୋହରେ ନୂଆ ସରକାରର ମନ୍ତ୍ରିମଣ୍ଡଳ ସମ୍ପ୍ରସାରଣ କରାଯିବ । ଏଥର ତେଜ ପ୍ରଦାପ ଯାଦବଙ୍କୁ ମନ୍ତ୍ରୀପଦ ମିଳିପାରେ ବୋଲି ଅନୁମାନ କରାଯାଉଛି ।
ଏହି ସମାରୋହରେ ଅତିଥି ଭାବେ ରାଷ୍ଟ୍ରୀୟ ଜନତା ଦଳ(ଆରଜେଡି) ମୁଖ୍ୟ ଲାଲୁ ପ୍ରସାଦ ଯାଦବ ଯୋଗଦେଇ ପାରନ୍ତି । ଏଥିଲାଗି ସୋମବାର ସେ ପାଟନା ପହଞ୍ଚିବାର ଥିଲା ହେଲେ ଦଳ ପକ୍ଷରୁ ସୂଚନା ଦିଆଯାଇଛି କି ସେ ମଙ୍ଗଳବାର ସକାଳେ ପାଟନାରେ ପହଞ୍ଚିବେ । ବିହାର ମନ୍ତ୍ରିମଣ୍ଡଳରେ ମୁଖ୍ୟମନ୍ତ୍ରୀଙ୍କ ସମେତ ୩୬ ମନ୍ତ୍ରୀ ରହିପାରନ୍ତି ।
ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମନ୍ତ୍ରିମଣ୍ଡଳ ସମ୍ପ୍ରସାରଣରେ ୩୧ ମନ୍ତ୍ରୀ ଶପଥ ନେଇ ପାରନ୍ତି । ଏମାନଙ୍କ ମଧ୍ୟରୁ ରାଷ୍ଟ୍ରୀୟ ଜନତା ଦଳରୁ ସର୍ବାଧିକ ୧୬ ଓ ଜେଡିୟୁରୁ ୧୧ ବିଧାୟକ ମନ୍ତ୍ରୀ ହୋଇପାରନ୍ତି । ଏହା ବ୍ୟତୀତ କଂଗ୍ରେସରୁ ୨, ହମ ପାର୍ଟିିରୁ ୧ ଓ ଜଣେ ନିର୍ଦ୍ଦଳୀୟ ବିଧାୟକଙ୍କୁ ମନ୍ତ୍ରୀ କରାଯାଇପାରେ । କୁହାଯାଉଛି କି ମନ୍ତ୍ରିମଣ୍ଡଳର ସିପିଆଇ-ଏମଏଲ, ସିପିଆଇ ଓ ସିପିଏମକୁ ସ୍ଥାନ ମିଳିନାହିଁ । ମହାମେଣ୍ଟରେ ଜେଡିୟୁ, ଆରଜେଡି, କଂଗ୍ରେସ, ସିପିଆଇ-ଏମଏଲ, ହମ, ସିପିଆଇ ଓ ସିପିଏମ ମୋଟ ୭ ଦଳ ରହିଛନ୍ତି ।
