ମୁମ୍ବାଇ,୪।୪: ପ୍ରସିଦ୍ଧ ଅଭିନେତା ମନୋଜ କୁମାରଙ୍କର ମୁମ୍ବାଇରେ ପରଲୋକ ହୋଇଛି। ସେ ୮୭ ବର୍ଷ ବୟସରେ ମୁମ୍ବାଇର କୋକିଲାବେନ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ମନୋଜ କୁମାରଙ୍କ ଶେଷକୃତ୍ୟ ଆସନ୍ତାକାଲି ମଧ୍ୟାହ୍ନ ୧୨ଟାରେ ମୁମ୍ବାଇର ଭିଲେ ପାର୍ଲେ ଶ୍ମଶାନରେ କରାଯିବ। ମନୋଜ କୁମାର ଜଣେ କିମ୍ବଦନ୍ତୀ ନାୟକ ଥିଲେ। ସେ ପରଦାରେ ଅନେକ ସୁପରହିଟ୍ ଚରିତ୍ରରେ ଅଭିନୟ କରିଥିଲେ। ମନୋଜ କୁମାର ତାଙ୍କ ଚଳଚ୍ଚିତ୍ର ମାଧ୍ୟମରେ ଲୋକଙ୍କ ମଧ୍ୟରେ ଦେଶପ୍ରେମର ଭାବନା ଜାଗ୍ରତ କରିଥିଲେ ଏବଂ ସେ ଦେଶାତ୍ମବୋଧକ ଚଳଚ୍ଚିତ୍ର ନିର୍ମାଣ କରିବାରେ ପ୍ରଥମ ବଲିଉଡ ଅଭିନେତା ହୋଇଥିଲେ। ଦେଶାତ୍ମବୋଧକ ଚଳଚ୍ଚିତ୍ର ପାଇଁ ଭାରତ କୁମାର ନାମରେ ପ୍ରସିଦ୍ଧ ମନୋଜ କୁମାରଙ୍କ ବିୟୋଗରେ ବଲିଉଡରେ ଶୋକର ଛାୟା ଖେଳିଯାଇଛି।
ମନୋଜ କୁମାରଙ୍କ ଜନ୍ମ ୨୪ ଜୁଲାଇ ୧୯୩୭ରେ ପାକିସ୍ତାନର ଆବୋଟାବାଦରେ ହୋଇଥିଲା। ବିଭାଜନ ପରେ ତାଙ୍କ ପରିବାର ପାକିସ୍ତାନରୁ ଦିଲ୍ଲୀ ଆସିଥିଲେ। ତାଙ୍କ ସମଗ୍ର ପରିବାରକୁ ଭାରତରେ ଶରଣାର୍ଥୀ ଶିବିରରେ ଦୀର୍ଘ ସମୟ ବିତାଇବାକୁ ବାଧ୍ୟ କରାଯାଇଥିଲା। ଏହି ସମୟ ମଧ୍ୟରେ ସେ ତାଙ୍କ ସାନ ଭାଇକୁ ମଧ୍ୟ ହରାଇଥିଲେ। ସେ ବଡ଼ ହେବାପରେ ଏହି କ୍ରୋଧ ଏବଂ ଯନ୍ତ୍ରଣାକୁ ଦେଶପ୍ରେମପୂର୍ଣ୍ଣ ଚଳଚ୍ଚିତ୍ରରେ ଏପରି ଭାବରେ ରୂପ ଦେଇଥିଲେ ଲୋକମାନେ ତାଙ୍କ ପ୍ରକୃତ ନାମ ମଧ୍ୟ ଭୁଲିଗଲେ। ମନୋଜ କୁମାରଙ୍କର ପ୍ରକୃତ ନାମ ହରିକୃଷ୍ଣ ଗିରି ଗୋସ୍ବାମୀ କିନ୍ତୁ ସେ ଚଳଚ୍ଚିତ୍ର ପ୍ରତି ଏତେ ଆଗ୍ରହୀ ଥିଲେ ଯେ ଦିଲୀପ କୁମାରଙ୍କ ଚଳଚ୍ଚିତ୍ର ଶବନମ ପରେ ସେ ତାଙ୍କ ନାମକୁ ମନୋଜ କୁମାର ରଖିଥିଲେ। ଦିଲୀପ କୁମାରଙ୍କ ଦ୍ୱାରା ପ୍ରଭାବିତ ହୋଇ ସେ ତାଙ୍କର ନାମ ରଖିଥିଲେ। ଏହା ପରେ ସେ ଚଳଚ୍ଚିତ୍ର ଜଗତରେ ପ୍ରବେଶ କରିବାକୁ ନିଷ୍ପତ୍ତି ନେଇଥିଲେ।
କ୍ରାନ୍ତି ଏବଂ ଉପକାର ଭଳି ଦେଶପ୍ରେମୀ ଫିଲ୍ମ ପାଇଁ ପ୍ରଶଂସକମାନେ ତାଙ୍କୁ ଭାରତ କୁମାର ବୋଲି ଡାକୁଥିଲେ। ମନୋଜ କୁମାରଙ୍କୁ ପଦ୍ମଶ୍ରୀ, ଦାଦାସାହେବ ଫାଲକେ ପୁରସ୍କାର ସହିତ ଜାତୀୟ ପୁରସ୍କାରରେ ସମ୍ମାନିତ କରାଯାଇଛି। ୧୯୫୭ ମସିହାରେ ତାଙ୍କ ଫିଲ୍ମ କ୍ୟାରିଅର ଆରମ୍ଭ କରିଥିବା ମନୋଜ କୁମାର ୧୯୫୬ ମସିହାରେ ରାତାରାତି ଷ୍ଟାର ହୋଇଗଲେ। ଶହୀଦ ଚଳଚ୍ଚିତ୍ରରେ ଭଗତ ସିଂହଙ୍କ ଭୂମିକା ନିଭାଇବା ପରେ ତାଙ୍କୁ ସବୁଠି ପ୍ରଶଂସା କରାଯାଇଥିଲା। ଏହା ପରେ ସେ କେବେ ପଛକୁ ଫେରି ଚାହିଁ ନ ଥିଲେ।
