ନୂଆଦିଲ୍ଲୀ,୧୨।୧୧: ଆଇପିଏଲ ୨୦୨୫ ସମ୍ବନ୍ଧରେ ପ୍ରତିଦିନ ଅନେକ ଆଶ୍ଚର୍ଯ୍ୟଜନକ ଖବର ସାମ୍ନାକୁୁ ଆସୁଛି । ଏବେ କୋଲକାତା ନାଇଟ ରାଇଡର୍ସ କ୍ୟାମ୍ପରୁ ଏକ ବଡ଼ ଖବର ଆସିଛି । ବାସ୍ତବରେ ଗତ ସିଜନରେ ଅର୍ଥାତ୍ ଆଇପିଏଲ ୨୦୨୪ରେ ଟାଇଟଲ ଜିତିଥିବା କୋଲକାତା ନାଇଟ ରାଇଡର୍ସ ଏହାର ଅଧିନାୟକ ଶ୍ରେୟସ ଆୟରଙ୍କୁ ଆଇପିଏଲ ୨୦୨୫ ପାଇଁ ରିଲିଜ କରିଛି । ଏଭଳି ପରିସ୍ଥିତିରେ ଦଳ ନୂଆ ଅଧିନାୟକ ଖୋଜୁଛି। କେକେଆରର ନୂତନ ଅଧିନାୟକଙ୍କ ବିଷୟରେ ଏକ ବଡ ଅପଡେଟ୍ ଆସିଛି। କେକେଆରର ଅଧିନାୟକଙ୍କ ବିଷୟରେ ଏପରି ନାମ ସାମ୍ନାକୁ ଆସିଛି, ଯାହାକୁ ବିଶ୍ୱାସ କରିବା କଷ୍ଟସାଧ୍ୟ ହେବ।
ରିପୋର୍ଟ ଅନୁଯାୟୀ, ଗତ ପାଞ୍ଚଟି ବଲରେ ପାଞ୍ଚଟି ଛକା ମାରି କେକେଆର ଜିତାଇଥିବା ରିଙ୍କୁ ସିଂ ଆଇପିଏଲ ୨୦୨୫ରେ କୋଲକାତା ନାଇଟ ରାଇଡର୍ସର ଅଧିନାୟକ ହେବେ। ଯଦି ଗଣମାଧ୍ୟମର ରିପୋର୍ଟକୁ ବିଶ୍ୱାସ କରାଯାଏ, ତେବେ ଆଇପିଏଲ ୨୦୨୫ରେ ଶ୍ରେୟସ ଆୟରଙ୍କ ସ୍ଥାନରେ ରିଙ୍କୁ ସିଂ ଦଳର ନେତୃତ୍ୱ ନେଇପାରନ୍ତି। ତେବେ ଫ୍ରାଞ୍ଚାଇଜ ଏପର୍ଯ୍ୟନ୍ତ ଏହାକୁ ଆନୁଷ୍ଠାନିକ ଭାବେ ଘୋଷଣା କରି ନାହିଁ। ଆଇପିଏଲ ୨୦୨୫ ପାଇଁ କେକେଆର୍ ଆନ୍ଦ୍ରେ ରସେଲ, ସୁନୀଲ ନାରିନ, ବରୁଣ ଚକ୍ରବର୍ତ୍ତୀ, ରିଙ୍କୁ ସିଂ, ରମଣଦୀପ ସିଂ ଏବଂ ହର୍ଷିତ ରାଣାଙ୍କୁ ରିଟେନ କରିଛି।
