ନନ୍ଦପୁର,୧୧।୩(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ସଦର ମହକୁମାରେ ବୁଧବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜାତିଗତ ପ୍ରମାଣପତ୍ର ଆବେଦନର ତଦନ୍ତ ବେଳେ ’ଧର୍ମ ପରିବର୍ତ୍ତନ’ ରିପୋର୍ଟ ଦେଇଥିବା କାରଣରୁ ନନ୍ଦପୁର ରାଜସ୍ବ ନିରୀକ୍ଷକ (RI) ମଧୁସୁଦନ ଖେମୁଣ୍ଡୁଙ୍କୁ ଅଶାଳୀନ ବ୍ୟବହାର ସହ ମାଡ଼ ମରାଯାଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ସୂଚନା ଅନୁଯାୟୀ, ଖିଲୁଆ ଗ୍ରାମର ଲଇଛନ ଖେମୁଣ୍ଡୁ ନିଜ ପୁଅ ପାଇଁ ଅନୁସୂଚିତ ଜାତି (SC) ପ୍ରମାଣପତ୍ର ପାଇଁ ଅନଲାଇନରେ ଆବେଦନ କରିଥିଲେ। ରାଜସ୍ବ ନିରୀକ୍ଷକ ମଧୁସୁଦନ ଏହାର ତଦନ୍ତ କରିବା ସମୟରେ ଜାଣିବାକୁ ପାଇଥିଲେ ଯେ, ସମ୍ପୃକ୍ତ ପରିବାର ଖ୍ରୀଷ୍ଟ ଧର୍ମ ଗ୍ରହଣ କରିଛନ୍ତି। ଏହି ଆଧାରରେ ସେ ତଦନ୍ତ ରିପୋର୍ଟରେ ’ଧର୍ମାନ୍ତରିତ’ ବୋଲି ଉଲ୍ଲେଖ କରିଥିଲେ, ଯାହାଫଳରେ ତହସିଲ ପକ୍ଷରୁ ଆବେଦନଟି ନାକଚ ହୋଇଯାଇଥିଲା।
ରିପୋର୍ଟ ଯୋଗୁଆବେଦନ ନାକଚ ହେବା ଖବର ପାଇ ଲଇଛନ ଓ ତାଙ୍କ ପିତା ବଲୁ ଖେମୁଣ୍ଡୁ ଉତକ୍ଷିପ୍ତ ହୋଇ RI ଅଫିସରେ ପହଞ୍ଚିଥିଲେ। ସେଠାରେ ସେମାନେ ରାଜସ୍ବ ନିରୀକ୍ଷକଙ୍କୁ ଅଶାଳୀନ ଭାଷାରେ ଗାଳିଗୁଲୋଜ କରିବା ସହ ସରକାରୀ କାଗଜପତ୍ର ଫିଙ୍ଗାଫୋପଡ଼ା କରିଥିଲେ। ପରେ RI ବସଷ୍ଟାଣ୍ଡକୁ ଆସିଥିବା ବେଳେ ସେଠାରେ ତାଙ୍କୁ ସର୍ବସମ୍ମୁଖରେ ମାଡ଼ ମରାଯାଇଥିବା ଏତଲାରେ ଦର୍ଶାଯାଇଛି।
ଘଟଣା ପରେ ନନ୍ଦପୁର ତହସିଲଦାର ଦେବବ୍ରତ ମହାରଣା ଓ ଜିଲ୍ଲା ରାଜସ୍ବ ନିରୀକ୍ଷକ ସଂଘର କର୍ମକର୍ତ୍ତାମାନେ ଥାନାରେ ପହଞ୍ଚି ଏହାର କଠୋର ନିନ୍ଦା କରିଛନ୍ତି। ପୋଲିସ ଏହି ମାମଲାରେ ଲଇଛନଙ୍କୁ ଅଟକ ରଖି ତଦନ୍ତ ଚଳାଇଛି। ବସଷ୍ଟାଣ୍ଡ ଅଞ୍ଚଳର CCTV ଫୁଟେଜ ସଂଗ୍ରହ କରାଯାଇଛି ଏବଂ ଘଟଣାର ତଦନ୍ତ ଜାରି ରହିଛି ବୋଲି ଥାନାଧିକାରୀ ତ୍ରିନାଥ ତୋଟା ପାଡ଼ିଆ ସୂଚନା ଦେଇଛନ୍ତି। ରାଜସ୍ବ କର୍ମଚାରୀ ସଂଘ ପକ୍ଷରୁ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି।
