ଗଞ୍ଜାମ,୧୮।୯(ଡି.ଏନ୍.ଏ.): ଗଞ୍ଜାମ ସହରସ୍ଥିତ ଐତିହାସିକ ପୋତାଗଡ଼ର ବିକାଶ ଓ ପୁନରୁଦ୍ଧାର ନିମନ୍ତେ ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଶନିବାର ପୋତାଗଡ଼ ଗସ୍ତ କରି ଏହାର ସମୀକ୍ଷା କରିଥିଲେ। ତହସିଲଦାର ଅରୁଣ କୁମାର ନାୟକ, ବ୍ରହ୍ମପୁର ଡିଭିଜନ ଜଳସମ୍ପଦ ଅଧୀକ୍ଷଣ ଯନ୍ତ୍ରୀ ଜୟଦୀପ ପଣ୍ଡା, ହୁମ୍ମା ଜଳସେଚନ ସହକାରୀ ନିର୍ବାହୀ ଯନ୍ତ୍ରୀ ଅଜିତ କୁମାର ପ୍ରଧାନ, ଏନ୍ଏସି ବିଜେଡି ଯୁବ ସଭାପତି ସୁଧୀର କୁମାର ପାଢ଼ୀ, ଛାତ୍ର ସଭାପତି ରାକେଶ ରଞ୍ଜନ ଦାସ ଏବଂ ପୂର୍ବତନ ଏନ୍ଏସି ଉପାଧ୍ୟକ୍ଷ ନୀଳାଞ୍ଚଳ ବାରିକ ପ୍ରମୁଖ ସମୀକ୍ଷା ବେଳେ ଉପସ୍ଥିତ ଥିଲେ। ଋଷିକୁଲ୍ୟା ନଦୀପାର୍ଶ୍ୱରେ ଥିବା ଏହି ଐତିହାସିକ ପୋତାଗଡ଼ର ଉନ୍ନତୀକରଣ ପାଇଁ ବ୍ଲୁ ପ୍ରିଣ୍ଟ ସରିଛି। ଏଥିପାଇଁ ୬ କୋଟି ୯୪ ଲକ୍ଷ ୯୮ ହଜାର ଟଙ୍କା ବ୍ୟୟବରାଦ ହୋଇଛି। ଶୀଘ୍ର ଏହାର ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି ଏମ୍ପି ସୂଚନା ଦେଇଛନ୍ତି। ସେଠାରେ ସ୍ମାର୍ଟ ପାର୍କ, ବୋଟିଂ କ୍ଲବ, ଆକର୍ଷଣୀୟ ମୁଖ୍ୟ ଫାଟକ, ପର୍ଯ୍ୟଟକଙ୍କ ପାଇଁ ଫୁଡ୍ ପ୍ଲାଜା ଆଦି ନିର୍ମାଣ ହେବ ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭାରମ୍ଭ କରିବେ ବୋଲି ଏମ୍ପି କହିଛନ୍ତି। ପ୍ରାକ୍ତନ ଜିଲାପାଳ ବିଜୟ ଅମୃତ କୁଲାଙ୍ଗେଙ୍କ ସମୟରେ ପୂର୍ବରୁ ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ସ୍ମାର୍ଟ ପାର୍କ ପାଇଁ ୭୫ ଲକ୍ଷ ଓ ପାର୍କିଂ ସ୍ଥଳ ଉନ୍ନୟନ ଲାଗି ୧୦ ଲକ୍ଷ, ପାଚେରି ଓ ବିଶ୍ରାମସ୍ଥଳ ନିମନ୍ତେ ୧୦ ଲକ୍ଷ, ଏନ୍ଏସି ପ୍ରଶାସନ ପକ୍ଷରୁ ୩୭ ଲକ୍ଷ ୫୦ ହଜାର ଏବଂ ଆଦର୍ଶ ଶୌଚାଳୟ ପାଇଁ ୧୦ ଲକ୍ଷ ଟଙ୍କା ବ୍ୟୟବରାଦ ହୋଇଛି। ବର୍ତ୍ତମାନ ଏହାର ନିର୍ମାଣ କାର୍ଯ୍ୟ ଚାଲୁ ରହିଛି। ତତ୍ ସଙ୍ଗେସଙ୍ଗେ ପୋତାଗଡ଼ର ଉନ୍ନୟନ ପାଇଁ ବିଧାୟକ ପର୍ଯ୍ୟଟନ ସଚିବଙ୍କୁ ୨୦୨୧ରେ ଚିଠି ଲେଖିବା ପରେ ପୁଣି ୫ କୋଟି ଟଙ୍କା ମଞ୍ଜୁର ହୋଇଥିବା ବିଧାୟକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏହାପରେ ଏମ୍ପି ଓ ବିଧାୟକ ପୋଡ଼ମ୍ପେଟାଠାରେ ନିର୍ମାଣ
ହେଉଥିବା ନୂତନ ବିଜୁ ସେତୁ ଓ ହୁମ୍ମା ଶୁକୁଆ ହାଟ ପରିଦର୍ଶନ କରିଥିଲେ।
