ଜୟପୁର, ୧୩।୫(ନି.ପ୍ର.): କାଗଜକଳ ଅବସରପ୍ରାପ୍ତ ଶ୍ରମିକମାନେ ନାହିଁ ନ ଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ସେମାନଙ୍କ ପ୍ରୋଭିଡେଣ୍ଟ ଫଣ୍ଡରେ ଲକ୍ଷ ଲକ୍ଷ ଟଙ୍କା ଅଛି, ଲକ୍ଷ ଲକ୍ଷ ଟଙ୍କା ଗ୍ରାଚ୍ୟୁଇଟି ପାଇବେ। କିନ୍ତୁ ତାହା ମିଳୁ ନ ଥିବାରୁ ଜୀବନର ଶେଷ ସମୟରେ ରୋଗରେ ପଡ଼ିଲେ ଚିକିତ୍ସା ପାଇଁ ଘର, ସୁନାଗହଣା ଆଦି ବିକ୍ରି କରିବାକୁ ବାଧ୍ୟ ହେଉଛନ୍ତି। ଏହା ମଧ୍ୟରେ ୩୨ ଜଣ ଶ୍ରମିକଙ୍କ ମୃତ୍ୟୁ ହୋଇଗଲାଣି। ବର୍ତ୍ତମାନ କାଗଜକଳ ଅବସରପ୍ରାପ୍ତ ଶ୍ରମିକ ଯୁଧିଷ୍ଠିର ସ୍ବାଇଁ ହୃଦ୍ଘାତ ଯୋଗୁ ଭୁବନେଶ୍ୱର ଏମ୍ସରେ ଚିକିତ୍ସିତ ହେଉଛନ୍ତି। ତାଙ୍କର ପ୍ରୋଭିଡେଣ୍ଟ ଫଣ୍ଡରେ ପ୍ରାୟ ୫ ଲକ୍ଷ ଟଙ୍କା ଅଛି। କାଗଜକଳ ଫାଉଣ୍ଡେଶନ ବେଳରୁ କାମ କରୁଛନ୍ତି। ଗ୍ରାଚ୍ୟୁଇଟି ପ୍ରାୟ ୪ ଲକ୍ଷ ଟଙ୍କା ପାଇବେ। କିନ୍ତୁ ବର୍ତ୍ତମାନ ମେଡିକାଲ୍ ଖର୍ଚ୍ଚ ପାଇଁ ଘରବାଡ଼ି ସୁନା ରୁପା ବିକ୍ରି କରିବାକୁ ପଡ଼ୁଛି। ମ୍ୟାନେଜମେଣ୍ଟକୁ ଗୁହାରି କରିବାରୁ ମାତ୍ର ୧୫ ହଜାର ଟଙ୍କା ଦେଲେ।
କାରଖାନା ଚାଲିଛି। କାଗଜ ଉତ୍ପାଦନ ହେଉଛି, ବିକ୍ରି ହେଉଛି। ଅବସରପ୍ରାପ୍ତ ଶ୍ରମିକଙ୍କୁ ପୁନଃ ନିଯୁକ୍ତି ଦିଆଯାଉଛି ବୋଲି ମ୍ୟାନେଜମେଣ୍ଟ କହୁଛି। କିନ୍ତୁ ଏବେ ବି ୭୦ ରୁ ଊର୍ଦ୍ଧ୍ୱ ଅବସରପ୍ରାପ୍ତ ଶ୍ରମିକଙ୍କୁ ନିଯୁକ୍ତି ମିଳିନାହିଁ। ଜଣେ ଶ୍ରମିକ ହୃଦ୍ଘାତରେ ଆଜି ପର୍ଯ୍ୟନ୍ତ କୋମାରେ ଅଛନ୍ତି। କାଳିଆ ଗାଁର ଧୋବୁଲୁ ବାଘ କିଡ୍ନୀ ରୋଗରେ ପୀଡ଼ିତ। ପ୍ରୋଭିଡେଣ୍ଟ ଫଣ୍ଡ୍ କଲିକତା ଟ୍ରଷ୍ଟରୁ ବ୍ରହ୍ମପୁର ଆଞ୍ଚଳିକ ପିଏଫ୍ କମିଶନ ଅଫିସ୍କୁ ସ୍ଥାନାନ୍ତର ହୋଇପାରୁ ନ ଥିବା ଓ କାଗଜକଳ କର୍ତ୍ତୃପକ୍ଷ ଶ୍ରମିକଙ୍କ ସମସ୍ୟାକୁ ଗୁରୁତ୍ୱ ଦେଉ ନ ଥିବାରୁ ସେମାନଙ୍କ ପ୍ରାପ୍ୟ ମିଳିବାରେ ଅସୁବିଧା ହେଉଛି ବୋଲି ଶ୍ରମିକମାନେ କହିଛନ୍ତି। ଶ୍ରମିକଙ୍କ ସମସ୍ୟା ନେଇ ରାଜ୍ୟ ସରକାର, ଜିଲା ପ୍ରଶାସନ ସମସ୍ତଙ୍କ ଦୃଷ୍ଟି ଆକର୍ଷଣ କରାଯାଇଛି। ମୃତ ଶ୍ରମିକଙ୍କ ବିଧବା ସ୍ତ୍ରୀମାନେ ଆନ୍ଦୋଳନ କରିଥିଲେ। ୪ ମାସ ମଧ୍ୟରେ ଗ୍ରାଚ୍ୟୁଇଟି ଟଙ୍କା ଦେବା ପାଇଁ ଶ୍ରମ ବିଭାଗକୁ ଲିଖିତ ଭାବେ ମ୍ୟାନେଜମେଣ୍ଟ ଦେଇଛି। କିନ୍ତୁ କେବେ ମିଳିବ ସ୍ପଷ୍ଟ ହୋଇନାହିଁ। ଅବସରପ୍ରାପ୍ତ ଶ୍ରମିକଙ୍କ ସମସ୍ୟା ସମାଧାନ ପାଇଁ ପ୍ରତିଦିନ ୟୁନିଟ୍ ହେଡ୍ ବାସଭବନ ଆଗରେ ପ୍ରତୀକ ଧାରଣା ଜାନୁୟାରୀ ୩ରୁ ଚାଲିଛି। ଏହାକୁ ଆଗକୁ ଆହୁରି ଜୋର୍ଦାର କରିବା ପାଇଁ ଖୁବ୍ ଶୀଘ୍ର ମିଳିତ ବୈଠକରେ ନିଷ୍ପତ୍ତି ନିଆଯିବ ବୋଲି ଶ୍ରମିକ ନେତା ପ୍ରମୋଦ କୁମାର ମହାନ୍ତି କହିଛନ୍ତି।
