ମହାକାଳପଡ଼ା,୨୯ା୪ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ଉପକୂଳ ଅଞ୍ଚଳରେ ୧୦ ହଜାରରୁ ଅଧିକ ପଞ୍ଜୀକୃତ ଓ ଅଣ ପଞ୍ଜୀକୃତ ମତ୍ସ୍ୟଜୀବୀ ନଦୀ, ସମୁଦ୍ର ଉପରେ ନିର୍ଭର କରିଥାନ୍ତି। ପରିବାର ପ୍ରତିପୋଷଣ ପାଇଁ କେବଳ ମାଛ ଧରିବା ଭରସା। ନଦୀ ସମୁଦ୍ରରୁ ମାଛ ମାରିଲେ ଘରେ ଚୁଲି ଜଳେ। ଅପରପକ୍ଷରେ ମତ୍ସ୍ୟ ଓ ବନ ବିଭାଗ ପକ୍ଷରୁ ସାମୁଦ୍ରିକ ପ୍ରବେଶ କଟକଣାକୁ ଜୋର୍ଦାର କରାଯାଇଛି। କାରଣ ଏପ୍ରିଲ ୧୫ ରୁ ଜୁନ୍ ୧୪ ପର୍ଯ୍ୟନ୍ତ ସମୁଦ୍ର ମଧ୍ୟରେ ମାଛ ଯାଆଁଳା ଉତ୍ପାଦନ ବୃଦ୍ଧି ପାଇବା ଲକ୍ଷ୍ୟରେ ବିଭାଗ ପକ୍ଷରୁ ଏହି କଟକଣା ଲାଗୁ ହୋଇଛି। ଏହି ସମୟରେ ସମୁଦ୍ରକୁ ଯିବା ବାରଣ କରାଯାଇଛି। ଯନ୍ତ୍ରଚାଳିତ ଡଙ୍ଗା, ବଡ଼ ଟ୍ରଲରଗୁଡ଼ିକ ସମୁଦ୍ର ମଧ୍ୟରେ ପ୍ରବେଶକଲେ ଛୋଟ ଛୋଟ ମାଛ ଯାଆଁଳା ନାଞ୍ଜି ବା ମଶୁରି ଜାଲରେ ପଡ଼ି ନଷ୍ଟହେବା ଆଶଙ୍କା ରହିଛି ବୋଲି ବିଭାଗ ପକ୍ଷରୁ କୁହାଯାଇଛ। ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳରେ ବନ ବିଭାଗ ପକ୍ଷରୁ ପାଟ୍ରୋଲିଂକୁ କଡ଼ାକଡ଼ି କରାଯାଇଛି ବୋଲି ଗହୀରମଥା ରେଞ୍ଜ ଅଧିକାରୀ ବିଚିତ୍ରାନନ୍ଦ ବେହେରା ଓ ଫରେଷ୍ଟର ନବୀନ କୁମାର କହିଛନ୍ତି।
ଅପରପକ୍ଷରେ ଏହି ଅଞ୍ଚଳର ବହୁ ଗରିବ ଶ୍ରେଣୀର ମତ୍ସ୍ୟଜୀବୀ ପାରମ୍ପରିକ ଆହୁଲା ଡିଙ୍ଗିଗୁଡ଼ିକ ମହାନଦୀ ଗଳିଆ ଶାଖା ନଦୀରୁ ମାଛ ଧରି ପରିବାର ପ୍ରତିପୋଷଣ କରନ୍ତି। ଅନ୍ୟପକ୍ଷରେ ଏହି ଅଞ୍ଚଳର ବହୁ ମତ୍ସ୍ୟଜୀବୀ ସାମୁଦ୍ରିକ କଟକଣା ଲାଗୁ ହେଉଥିବାରୁ ବାଧ୍ୟହୋଇ ଦାଦନ ଖଟିବାକୁ ରାଜ୍ୟ ତଥା ରାଜ୍ୟ ବାହାରକୁ ଯିବାକୁ ପ୍ରସ୍ତୁତ ହେଉଛନ୍ତି। ସ୍ଥାନୀୟ ମତ୍ସ୍ୟଜୀବୀମାନଙ୍କ ମଧ୍ୟରେ ହରିପଦ ମଣ୍ଡଳ, ଦିନେଶ ଗିରି, ରାମକୃଷ୍ଣ ମଣ୍ଡଳ, ଖୋକନ ମଣ୍ଡଳ, ଶକ୍ତିପଦ ମାଇତି ପ୍ରମୁଖ ଏହା କହିଛନ୍ତି। ସ୍ଥାନୀୟ ମତ୍ସ୍ୟଜୀବୀ ରାଜ୍ୟ ସରକାରଙ୍କ ପକ୍ଷରୁ ସେମାନଙ୍କୁ ବିକଳ୍ପ ଜୀବିକା ନିର୍ବାହ ପାଇଁ ଥଇଥାନ ପ୍ୟାକେଜ ଯୋଗାଇଦେବାକୁ ଅନୁରୋଧ କରିଛନ୍ତି। ବିଶେଷକରି ମହିଳା ମତ୍ସ୍ୟଜୀବୀମାନେ ନଦୀରେ ଛୋଟ ଛୋଟ ଆହୁଲା ଡିଙ୍ଗିରେ ମାଛ ଧରି ପରିବାର ପ୍ରତିପୋଷଣ କରୁଥିବା ଦେଖିବାକୁ ମିଳୁଛି। ବ୍ଲକର ବତିଘର, ଖରିନାସୀ, ରାମନଗର, ଜମ୍ବୁ, ସୁନିତି, ବଉଳକଣି ଆଦି ପଞ୍ଚାୟତ ସଂଖ୍ୟାଧିକ ମତ୍ସ୍ୟଜୀବୀ ନାହିଁ ନ ଥିବା ଦୁର୍ଦ୍ଦଶାରେ ଶିକାର ହେଉଥିବା ଅଭିଯୋଗ ହେଉଛି। ଏ ସମ୍ପର୍କରେ ମହାକାଳପଡ଼ା ସାମୁଦ୍ରିକ ବିଭାଗ ମତ୍ସ୍ୟ ଅଧିକାରୀ ଦୀପକ କୁମାର ମଲିକଙ୍କୁ ପଚାରିବାରେ ଜୁନ୍ ୧୪ ପର୍ଯ୍ୟନ୍ତ ସାମୁଦ୍ରିକ କଟକଣା ଲାଗୁ ହୋଇଥିବାରୁ ସରକାରୀ ନିୟମ ଅନୁସାରେ ସର୍ଭେ କରାଯାଇ ଆର୍ଥିକ ସହାୟତା ରାଶି ପ୍ରଦାନ କରାଯିବ ବୋଲି ସେ କହିଛନ୍ତି।
