ତିହିଡ଼ି,୧୧ା୬(ସଞ୍ଜିତ ବଳ): ଭଦ୍ରକ ଜିଲା ତିହିଡ଼ି ବ୍ଲକ ପୀରହାଟ ଥାନା ଅଧୀନ ବାରସର ଓ ଗୋବିନ୍ଦପୁର ପଞ୍ଚାୟତର ଶତାଧିକ ଅଧିବାସୀ ଗୁରୁବାର ପୀରହାଟ ଥାନା ସାମ୍ନାରେ ଗଣଧାରଣା ଦେଇଛନ୍ତି। ସେମାନଙ୍କ ଜୀବନର ସୁରକ୍ଷା ଦାବି କରି ପଞ୍ଚାୟତବାସୀ ଏହି ପଦକ୍ଷେପ ନେଇଥିବା ଜଣାଯାଇଛି। ବାରସର ପଞ୍ଚାୟତର ତିଆଡ଼ିସାହିଠାରୁ ପଞ୍ଚାୟତ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିବା ରାସ୍ତାକୁ ଅବରୋଧ କରି ତିଆଡ଼ିସାହି ଗ୍ରାମର ଜଣେ ବ୍ୟକ୍ତି କିଛି ଦିନ ପୂର୍ବେ ସିମେଣ୍ଟ ଖୁଣ୍ଟ ଉଠାଉଥିଲେ। କେତେକ ପଞ୍ଚାୟତବାସୀ ଏହାକୁ ବିରୋଧ କରିବା ନେଇ ବିବାଦ ଉପୁଜିଥିଲା। ପରେ ରାସ୍ତା ଅବରୋଧ କରିଥିବା ବ୍ୟକ୍ତିଙ୍କ କେତେକ ସମ୍ପର୍କୀୟ ବିନ୍ଧା ବଜାରରେ ସେହି ୨ ପଞ୍ଚାୟତର କେତେକ ଅଧିବାସୀଙ୍କୁ ବିଭିନ୍ନ ପ୍ରକାର ନିର୍ଯାତନା ଦେବା ସହ ଧମକ ଦେଇଥିବାରୁ ପଞ୍ଚାୟତବାସୀ ଏହି ପଦକ୍ଷେପ ନେଇଛନ୍ତି। ପରେ ଆଇଆଇସି ରୋଜାଲିନ ବେହେରା ପଞ୍ଚାୟତର କେତେକ ରାଜନୈତିକ ବ୍ୟକ୍ତିଙ୍କ ସହ ଆଲୋଚନା କରିଥିଲେ। ଧମକ ଦେଉଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଆଇଆଇସି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
