ରାଞ୍ଚି, ୧୫।୯ : ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଅଧ୍ୟକ୍ଷତାରେ କ୍ୟାବିନେଟ ଦୁଇଟି ପ୍ରମୁଖ ନିଷ୍ପତ୍ତି ନେଇଛି। ୧୯୩୨ ଝାଡଖଣ୍ଡର ଖତିଆନ ଆଧାରିତ ସ୍ଥାନୀୟ ନୀତିର ଅନୁମୋଦନ କ୍ରମେ ଓବିସି, ଏସଟି ଏବଂ ଏସ୍ସିଙ୍କ ପାଇଁ ସଂରକ୍ଷଣ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି। ଏହି ବୈଠକରେ ଓବିସି, ଏସସି ଏବଂ ଏସଟିର ସଂରକ୍ଷଣ ବୃଦ୍ଧି ପାଇଁ ବିଲ ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି।
ବର୍ତ୍ତମାନ ଏହି ବିଲ ଗୁଡିକ ବିଧାନସଭା ଦ୍ୱାରା ପାରିତ ହେବା ପରେ କେନ୍ଦ୍ର ସରକାରଙ୍କ ନିକଟକୁ ପଠାଯିବ। ନବମ ସୂଚୀରେ ଉଭୟ ବିଲ ଅନ୍ତର୍ଭୁକ୍ତ କରିବାକୁ କେନ୍ଦ୍ରକୁ ଅନୁରୋଧ କରାଯିବ। ଏହା ନବମ କାର୍ଯ୍ୟସୂଚୀରେ ଅନ୍ତର୍ଭୂକ୍ତ ହେବା ପରେ ଝାଡଖଣ୍ଡରେ ଲାଗୁ ହେବ।
ବୁଧବାର ଝାଡଖଣ୍ଡର ସରକାରଙ୍କ କ୍ୟାବିନେଟ ରାଜ୍ୟରେ ବିଭିନ୍ନ ପଦବୀରେ ଖାଲିଥିବା ସ୍ଥାନଗୁଡିକରେ ସଂରକ୍ଷଣ ଆଇନ ୨୦୦୧ ରେ ସଂଶୋଧନ କରିବାକୁ ନିଷ୍ପତ୍ତି ହୋଇଛି। ରାଜ୍ୟର ବିଭିନ୍ନ ସେବାରେ ମୋଟ ସଂରକ୍ଷଣ ସୀମା ବର୍ତ୍ତମାନ ୫୦ ପ୍ରତିଶତରୁ ୭୭ ପ୍ରତିଶତକୁ ବୃଦ୍ଧି କରାଯିବ।
ଏସ୍ସିଙ୍କ ପାଇଁ ୧୨ ପ୍ରତିଶତ, ଏସଟିଙ୍କ ପାଇଁ ୨୮ ପ୍ରତିଶତ, ଓବିସି ଆନେକ୍ସୁର -୧ ପାଇଁ ୧୫ ପ୍ରତିଶତ, ଓବିସି ଆନେକ୍ସୁର-୨ ପାଇଁ ୧୨ ପ୍ରତିଶତ ଏବଂ ଅର୍ଥନୈତିକ ପଛୁଆ ବର୍ଗଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ଅନୁମୋଦନ ଲାଭ କରିଛି। ଏହାପୂର୍ବରୁ ରାଜ୍ୟରେ ଏସଟିଙ୍କ ପାଇଁ ୨୬ ପ୍ରତିଶତ ସଂରକ୍ଷଣ ରହିଥିଲା। ସେମାନଙ୍କୁ ଦୁଇ ପ୍ରତିଶତ ବୃଦ୍ଧି କରିବାକୁ ପ୍ରସ୍ତାବ ଦିଆଯାଇଛି। ଏସ୍ସିଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ବର୍ତ୍ତମାନ ବଳବତ୍ତର ରହିଛି, ଏହାକୁ ୧୨ ପ୍ରତିଶତକୁ ବୃଦ୍ଧି କରିବାକୁ ପ୍ରସ୍ତାବ ଦିଆଯାଇଛି। ପଛୁଆ ବର୍ଗଙ୍କର ଆନେକ୍ସୁର ପାଇଁ ୨୭ ପ୍ରତିଶତ ସଂରକ୍ଷଣର ଏକ ପ୍ରସ୍ତାବ ଅଛି। ସେହିପରି ଅର୍ଥନୈତିକ ପଛୁଆ ବର୍ଗଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ପ୍ରସ୍ତାବ ରହିଛି।
