ବେଙ୍ଗାଲୁରୁ,୨୯।୧୦ : କର୍ନାଟକରେ ଶାସକ ଭାଜପା ସରକାରରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଜଣେ ଅଧିକାରୀଙ୍କ ଦ୍ୱାରା ଦୀପାବଳିରେ କିଛି ଖବରଦାତାଙ୍କୁ ମିଠା ଡବାରେ ଏକ ଲକ୍ଷରୁ ଅଢ଼େଇ ଲକ୍ଷ ଟଙ୍କା ପର୍ଯ୍ୟନ୍ତ ନଗଦ ଟଙ୍କା ଦେଇଥିବା ଅଭିଯୋଗ ହୋଇଛି। କଂଗ୍ରେସ ଶନିବାର ଏହାକୁ ‘ମିଠା ବକ୍ସ ଲାଞ୍ଚ’ କହି ଏହାର ନ୍ୟାୟିକ ତଦନ୍ତ ଦାବି କରିଛି। ତେବେ ଭାଜପା ଏହି ଅଭିଯୋଗକୁ ଖଣ୍ଡନ କରିଛି।
ଏକ ରିପୋର୍ଟ ଅନୁଯାୟୀ, ମିଠା ଡବା ଗ୍ରହଣ କରିଥିବା ପ୍ରାୟ ୧୨ ଜଣ ଖବରଦାତାଙ୍କ ମଧ୍ୟରୁ ତିନିଜଣ ନଗଦ ଟଙ୍କା ପାଇଥିବା ସ୍ବୀକାର କରିଛନ୍ତି। ସେମାନଙ୍କ ମଧ୍ୟରୁ ଦୁଇଜଣ କହିଛନ୍ତି ଯେ ସେମାନେ ଏହାକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଫେରାଇ ଦେଇଛନ୍ତି। ଦୁର୍ନୀତି ନିବାରଣ କାର୍ଯ୍ୟକର୍ତ୍ତା ଖବରଦାତାଙ୍କୁ ଲାଞ୍ଚ ଦେବାକୁ ଉଦ୍ୟମ କରୁଥିବା ଅଭିଯୋଗରେ କର୍ନାଟକ ଲୋକାୟୁକ୍ତ ପୋଲିସ ନିକଟରେ ବାସଭରାଜ ବୋମ୍ମାଇଙ୍କ ମିଡିଆ ପରାମର୍ଶଦାତାଙ୍କ ବିରୋଧରେ ଅଭିଯୋଗ ଆଣିଛନ୍ତି।
ଅନ୍ୟ ଜଣେ ଖବରଦାତା କହିଛନ୍ତି, ଏନେଇ ମୁଁ ମୋର ସମ୍ପାଦକଙ୍କୁ ଏସମ୍ପର୍କରେ ଜଣାଇଥିଲି। ମୁଁ ସିଏମଓ ଅଧିକାରୀମାନଙ୍କୁ କହିଲି ଯେ ମୁଁ ଏହାକୁ ଗ୍ରହଣ କରିପାରିବି ନାହିଁ ଏବଂ ଏହା ଭୁଲ କାର୍ଯ୍ୟ। ସେ କହିଥିଲେ ଯେ ତାଙ୍କ ମିଠା ବାକ୍ସରେ ୧ ଲକ୍ଷ ଟଙ୍କା ନଗଦ ରହିଛି। କର୍ନାଟକ କଂଗ୍ରେସ ଟୁଇଟ କରି ଭାଜପାକୁ ପ୍ରଶ୍ନ କରିଛି, ଟିକସଦାତାଙ୍କ ଟଙ୍କାକୁ ଅପବ୍ୟବହାର କରି ଲାଞ୍ଚ ଦିଆଯାଇଛି କି? ଏହି ଅର୍ଥର ଉତ୍ସ କ’ଣ? କେତେ ଲାଞ୍ଚ ଦିଆଯାଇଥିଲା ଏବଂ ଏହାର ପ୍ରତିବଦଳରେ ତୁମେ କ’ଣ ପାଇଲ? ବିନା କାରଣରେ ଆମେ ମୁଖ୍ୟମନ୍ତ୍ରୀଙ୍କୁ ପେସିଏମ ବୋଲି କହି ନାହୁଁ।
କଂଗ୍ରେସର ଜୟରାମ ରମେଶଙ୍କ ସହିତ ରଣଦୀପ ସୁର୍ଜେ ୱାଲା ପ୍ରମୁଖ ବହୁ ନେତା ସରକାରଙ୍କଠାରୁ ସ୍ପଷ୍ଟୀକରଣ ମାଗିଛନ୍ତି। ସୁର୍ଜେ ୱାଲା ଟୁଇଟ କରି କହିଛନ୍ତି, କର୍ନାଟକର ସାହସୀ ଖବରଦାତାମାନଙ୍କୁ ନମସ୍କାର। ସେମାନେ ମୁଖ୍ୟମନ୍ତ୍ରୀ ବୋମ୍ମାଇ ଏବଂ ତାଙ୍କ କାର୍ଯ୍ୟାଳୟର ଲାଞ୍ଚ ଦୁର୍ନୀତିର ପର୍ଦ୍ଦାଫାଶ କରିଛନ୍ତି। ସେପଟେ ଏହି ଅଭିଯୋଗ ସତ୍ୟଠାରୁ ଦୂରରେ ବୋଲି ଦାବି କରି ଭାଜପା କଂଗ୍ରେସକୁ ଘେରିଛି।
