ଭୁବନେଶ୍ୱର,୨୨।୧(ବ୍ୟୁରୋ): ଶିଳ୍ପସଂସ୍ଥା ଏବଂ ସହରାଞ୍ଚଳରୁ ନିର୍ଗତ ବର୍ଜ୍ୟ ଜଳ ନଦୀ, ଜଳାଶୟକୁ ପ୍ରଦୂଷିତ କରୁଛି। ସ୍ପଞ୍ଜ୍ ଆଇରନ କାରଖାନା ଦ୍ୱାରା ବାୟୁ ପ୍ରଦୂଷଣ ବଢୁଛି। ଏହାକୁ ନେଇ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ, ପଞ୍ଚାୟତିରାଜ ବିଭାଗ, ଜଙ୍ଗଲ ଓ ପରିବେଶ ବିଭାଗ ସଚିବଙ୍କଠାରୁ ରିପୋର୍ଟ ତଲବ କରିଛି ପରିବେଶ ପ୍ରଦୂଷଣ ନିୟନ୍ତ୍ରଣ ସଂକ୍ରାନ୍ତ ଗୃହ କମିଟି। ଫେବୃୟାରୀ ୧ରେ ହେବାକୁ ଥିବା ବୈଠକରେ ସମ୍ପୃକ୍ତ ବିଭାଗ କମିଟି ନିକଟରେ ରିପୋର୍ଟ ଦାଖଲ କରିବେ। ବିଧାନସଭା ସମ୍ମିଳନୀ କକ୍ଷରେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଗୁରୁବାର ଅନୁଷ୍ଠିତ ଉକ୍ତ ବୈଠକରେ ଏହି ନିଷ୍ପତ୍ତି ହୋଇଛି।
ଶିଳ୍ପସଂସ୍ଥାର ବର୍ଜ୍ୟ ଜଳ ଜଳାଶୟକୁ ପ୍ରଦୂଷିତ କରୁଛି। ଚାଷ ଜମି ପ୍ରଭାବିତ ହେଉଛି। ସ୍ପଞ୍ଜ ଲୁହା କାରଖାନାର ବିଷାକ୍ତ ବାଷ୍ପ ଚିନ୍ତା ବଢ଼ାଇଛି। ସହରାଞ୍ଚଳ ଏବଂ ଗ୍ରାମଞ୍ଚଳ ପରିବେଶ ବିଗିଡ଼ିବାରେ ଲାଗିଛି। ଜାତୀୟ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି) ତରଫରୁ ପ୍ରଦୂଷଣ ନିୟନ୍ତ୍ରଣ ଲାଗି ବିଭିନ୍ନ ପରାମର୍ଶ ଏବଂ ରାୟ ଦିଆଯାଇଛି। ଏହି ସମସ୍ତ ବିଷୟ ବୈଠକରେ ଆଲୋଚନା ହୋଇଥିଲା। ଜଳାଶୟକୁ ଶିଳ୍ପସଂସ୍ଥା ଦ୍ୱାରା ଛଡ଼ାଯାଉଥିବା ବର୍ଜ୍ୟ ଜଳ ଉପରେ ଅନୁଧ୍ୟାନ କରିବା ପାଇଁ ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝି, ସହରାଞ୍ଚଳ ଏବଂ ଗ୍ରାମାଞ୍ଚଳର ପରିବେଶ ବିଶୁଦ୍ଧୀକରଣ ପାଇଁ କଂଗ୍ରେସ ବିଧାୟକ ଦଳନେତା ନରସିଂହ ମିଶ୍ର ଏବଂ ସ୍ପଞ୍ଜ ଲୁହା କାରଖାନାଗୁଡିକ ଦ୍ୱାରା ନିର୍ଗତ ବାଷ୍ପ ଉପରେ ଅନୁଧ୍ୟାନ ପାଇଁ ବିଧାୟକ ବଦ୍ରିନାରାୟଣ ପାତ୍ରଙ୍କ ଅଧ୍ୟକ୍ଷତାରେ ୩ ସବ୍ କମିଟି ଗଠନ କରାଯାଇଛି। ଉକ୍ତ କମିଟି ସ୍ଥିତି ଅନୁଧ୍ୟାନ କରି ବିଧାନସଭା ଅଧିବେଶନ ପୂର୍ବରୁ ରିପୋର୍ଟ ପ୍ରଦାନ କରିବେ। ବୈଠକରେ ଉପବାଚସ୍ପତି ରଜନୀକାନ୍ତ ସିଂ, ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା, ଖଣିମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ବିରୋଧୀ ଦଳ ଉପନେତା ବିଷ୍ଣୁ ସେଠୀ, ବ୍ରଜକିଶୋର ପ୍ରଧାନ, ରମେଶ ଚନ୍ଦ୍ର ବେହେରା, ଦାଶରଥି ଗମାଙ୍ଗ, ମିନାକ୍ଷୀ ମହନ୍ତ, ପ୍ରକାଶ ସୋରେନ ପ୍ରମୁଖ ଯୋଗ ଦେଇଥିଲେ।
