ଭୁବନେଶ୍ୱର,୨୦।୧୧(ବ୍ୟୁରୋ): ଆଉ ନାହାନ୍ତି ବିଶିଷ୍ଟ ସଂଳାପ ଲେଖକ ତଥା ନିର୍ଦ୍ଦେଶକ ନନ୍ଦଲାଲ ମହାପାତ୍ର। ୭୫ ବର୍ଷ ବୟସରେ ତାଙ୍କର ପରଲୋକ ଘଟିଛି। ଅସୁସ୍ଥତା ହେତୁ ଗତ କିଛି ଦିନ ଧରି ସେ ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ। ସେଠାରେ ସେ ଶେଷନିଃଶ୍ୱାସ ତ୍ୟାଗ କରିଛନ୍ତି।
ତେବେ ନନ୍ଦଲାଲ ଏକାଧିକ ଫିଲ୍ମ ଓ ଧାରାବାହିକର କାହାଣୀ ଲେଖିବା ସହ ନିର୍ଦ୍ଦେଶନା ମଧ୍ୟ ଦେଇଥିଲେ। ‘ନୀରବ ଝଡ଼’, ‘କ୍ଲାନ୍ତ ଅପରାହ୍ନ’, ‘ଭିଜାମାଟିର ସ୍ବର୍ଗ’ ଓ ‘ମଝି ପାହାଚ’ ପରି ଅନେକ ସିନେମାର କାହାଣୀ ଓ ସଂଳାପ ଲେଖିଥିଲେ ସେ। ସେହିଭଳି ‘ସମାନ୍ତର’, ‘ଗୁରୁବାରୀ’, କଳାତ୍ମକ ଚଳଚ୍ଚିତ୍ର ‘ପ୍ରତୀକ୍ଷା’ ଓ ‘କନିକା’ ଆଦି ଧାରାବାହିକର ସଂଳାପ ମଧ୍ୟ ସେ ଲେଖିଥିଲେ। ଏସବୁ କାମ ଲାଗି ସେ ଜନାଦୃତ ହେବା ସହ ରାଜ୍ୟ ତଥା ରାଷ୍ଟ୍ରୀୟ ପୁରସ୍କାର ପ୍ରାପ୍ତ ହୋଇଥିଲେ। ଏବେ ତାଙ୍କ ବିୟୋଗରେ ମନୋରଞ୍ଜନଜଗତରେ ଶୋକର ଛାୟା ଖେଳିଯାଇଛି।
